እነ እስክንድር ነጋ ለሚያዝያ 11 ተለዋጭ የችሎት ቀጠሮ ተሰጣቸው
በግፍ እስር ላይ የሚገኙት የባልደራስ ለእውነተኛ ዴሞክራሲ ፓርቲ (ባልደራስ) አመራሮች እስክንድር ነጋ፣ ስንታየሁ ቸኮል፣ አስቴር ስዩም እና አስካለ ደምሌ ዛሬ መጋቢት 15 ቀን የከፍተኛው ፍርድ ቤት ችሎት ቀርበዋል። ፍርድ ቤቱ ብይን መስጠት የሚችለው የጠቅላይ ፍርድ ቤቱን ውሳኔ ካወቀ በኋላ እንደሆነ በመጥቀስ ለሚያዝያ 11 ቀን 2013 ዓ.ም. ተለዋጭ ቀጠሮ ሰጥቷል። በጠቅላይ ፍርድ ቤቱ የሚዳኘው የይግባኝ ችሎት የፊታች መጋቢት 28 ቀን 2013 ዓ.ም. ስድስት ኪሎ በሚገኘው የጠቅላይ ፍርድ ቤት ቅጥር ግቢ ውስጥ ይካሄዳል።
የባልደራስ ፕሬዚደንት አቶ እስክንድር ነጋ ዐቃቤ ሕግ ይግባኝ የጠየቀበት ሰነድ ግልባጭ እንዲሰጣቸው በዛሬው ችሎት ቢይቁም አልተሰጣቸውም። ዐቃቤ ሕግ በሰዓቱ ሰነዱን አለመያዙን ገልፆ በሌላ ጊዜ እንደሚሰጣቸው ቃል ገብቷል።
“አሁንም እድሎች ሙሉ በሙሉ አላለፉም፤ አፋጣኝ ፍትሕ ስጡን እና ከእስር ቤት ወጥተን ለምርጫው አስተዋፅኦ ማድረግ እንፈልጋለን” ሲሉ አቶ እስክንድር ጠይቀዋል።
የከፍተኛው ፍርድ ቤት ዳኞች በበኩላቸው ጠቅላይ ፍርድ ቤቱ አፋጣኝ ምላሽ ከሰጠ እነርሱም ፈጣን ብይን እንደሚሰጡ ገልፀዋል።
አቶ ስንታየሁ ቸኮል ወቅቱ ዐብይ ፆም የሚጾምበት መሆኑን ጠቅሰው የምልኮ ስፍራ ወዳለበት የእስር ቤቱ ክፍል (ዞን) አራቱንም የህሊና እስረኞች ወህኒ ቤቱ እንዲያዘዋውራቸው ጠይቀዋል። ይህ ካልሆነም በያሉበት የአምልኮ ስፍራ እንዲሰጣቸው ፍርድ ቤቱ ወህኒ ቤቱን ያዝዝ ዘንድ አሳስበዋል። እምነታቸው የኢትዮጵያ ኦርቶዶክስ ተዋሕዶ ቤተክርስቲያን በምትፈቅደው መሰረት በፀበል ቅዱስ መፈወስ እንደሚፈልጉ የጠቆሙት አቶ ስንታየሁ ፀበል እንዲገባላቸውም ጠይቀዋል። ከዚህ በፊት ቤተሰቦቻቸው ያመጡትን ፀበል ወህኒ ቤቱ አላስገባ ብሎ መልሶታል።
ወ/ሮ አስቴር ስዩም በበኩላቸው “የመደመር መንገድ የተባለው የጠቅላይ ሚንስትሩ መፅሐፍ እስር ቤት ውስጥ እየገባ ነው። ‘ሀገር ስታምጥ’ የተሰኘውን የእኔን መፅሐፍ ግን ማስገባት አልቻልኩም። ተከልክያለሁ። ለምን?” ሲሉ ጠይቀዋል።
