የባልደራስ ለእውነተኛ ዴሞክራሲ ፓርቲ መርሃግብር

በማህበራዊው በኩል ያለን መርህ በቀዳሚነት የሰው ልጆች በሙሉ አንድ መሆናቸውን የሚያምን፣ ከዚያም በቀዳሚነት በኢትዮጵያዊነቱ፣ ብሎም በሁሉም ማንነቶቹ የሚኮራ ዜጋን ከፍ የሚያደርግ ሀገራዊ ድባብ መፍጠር ነው፡፡ ለዚህም የኃይማኖት፣ የቤተሰብ፣ የትምህርት፣የጤና፣ የሴቶች፣ የወጣቶች፣ የባህል፣ የኪነ ጥበብ፣ የአካባቢ ጥበቃና የስፖርት ዝርዝር ፖሊሲዎች እንዲወጡ ሊደረግ ይገባል፡፡

11.1. ስለ ኃይማኖት አቅጣጫዎች
11.1.1. ማንኛውም ዜጋ የፈለገውን ኃይማኖት የመከተል የማራመድና የማስፋፋት መብቱ የተጠበቀ ሊሆን ይገባል
11.1.2. መንግስታዊ ኃይማኖት አይኖርም፤ መንግስት በኃይማኖት ጉዳዮች ጣልቃ ሊገባ አይገባም
11.1.3. የኃይማኖት ተቋማት መንግስትን የመተቸትና የመገሰፅ ህጋዊ መብት ሊኖራቸው ይገባል፤ ሆኖም፣ የመንግስትን ስልጣን በቀጥታ ለመቆጣጠር የሚንቀሳቀስ የኃይማኖት ተቋም ሊኖር አይገባም
11.1.4. በሀገራችን ኢትዮጵያ በኃይማኖቶች መካከል መቻቻል እና መከባበር እንዲኖር ድርጅታችንና አባላቱ በሙሉ ተግተው ሊሰሩ ይገባል፡፡

11.2. ስለ ትምህርት አቅጣጫዎች

11.2.1. የትምህርት ፖሊሲ ዋነኛ ትኩረት ከብዛት ወደ ጥራት ሊዞር ይገባል
11.2.2. የትምህርትን ጥራት የመጠበቅና የመከታተል ኃላፊነት የመንግስት ሊሆን ይገባል
11.2.3. ሁሉም ወላጆች ከስድስት ዓመት አንስቶ ልጆቻቸውን የመጀመሪያ ደረጃ ት/ቤት የማስገባት ግዴታ ሊጣልባቸው ይገባል
11.2.4. ሁሉም ኢትዮጵያዊ ከ1 – 12ኛ ክፍል በነፃ የመማር መብትና ግዴታ ሊኖረው ይገባል፤ ለከፍተኛ ትምህርት የወጪ መጋራት አሰራር ተግባራዊ ሊሆን ይገባል
11.2.5. ሥርዓተ ትምህርትን ለመቅረፅ መምህራን፣ የትምህርት ባለሙያዎች፣ ወላጆችና ተማሪዎች ሁለንተናዊ ተሳትፎ ሊኖራቸው ይገባል
11.2.6. መደበኛ ትምህርት ከአንደኛ እስከ አስራ ሁለተኛ ክፍሎች የተከፋፈለ ሊሆን ይገባል፤ በዚህም መሰረት አንደኛ ደረጃ ከአንደኛ እስከ ስድተኛ ክፍል መለስተኛ ሁለተኛ ደረጃ ከሰባተኛ እስከ ስምንተኛ ክፍል ከፍተኛ ሁለተኛ ደረጃ ከዘጠነኛ እስከ አስራ ሁለተኛ ክፍል ሆኖ ሊዋቀር ይገባል
11.2.7. የዓለም የሳይንስና ቴክኖለጂ ቋንቋ ለሆነው እንግሊዘኛ ልዩ ትኩረት የሚሰጥ የትምህርት ፖሊሲ ሊቀረፅ ይገባል፤ ትምህርቱን የሚሰጡት መምህራን በቂ እውቅት እንዳላቸው የሚያረጋግጥ ፖሊሲም መሆን ይገባዋል

11.2.8. የኢትዮጵያዊያን መግባቢያ የሆነው ዐማርኛ ቋንቋ በሀገር አቀፍ ደረጃ በአግባቡ እንዲሰጥ የሚያደርግ የትምህርት ፖሊሲ ሊኖር ይገባል
11.2.9. በዋናነት በሳይንስና በቴክኖሎጂ ላይ ያነጣጠረ የትምህርት ፖሊሲ ሊኖር ይገባል
11.2.10. ሁሉም ተማሪ እስከ አስራ ሁለተኛ ክፍል ድረስ የቀለም ትምህርት ሊከታተል ይገባል፤ ከአስራ ሁለተኛ ክፍል በኋላ የሙያ ትምህርት መከታተል ለሚፈልጉ ተጨማሪ ስልጠና እንዲያገኙ ሊደረግ ይገባል፤ በቀለም ትምህርት ለመቀጠል የፈለጉ ወደ ከፍተኛ የትምህርት ተቋማት እንዲገቡ ሊደረግ ይገባል
11.2.11. በመንግስት አንደኛ ደረጃ ትምህርት ቤቶች ሕፃናት በአፍ መፍቻ ቋንቋቸው ወይም ወላጆች
በሚመርጡላቸው ቋንቋ እንዲማሩ ሊደረግ ይገባል
11.2.12. መለስተኛና ሁለተኛ ደረጃ ት/ቤቶች (ከሰባተኛ እስከ አስራ ሁለተኛ ክፍል) ሁሉንም የትምህርት ዓይነቶች በእንግሊዝኛ ቋንቋ ሊያስተምሩ ይገባል
11.2.13. ሀገር አቀፍ የትምህርት ደረጃን በጠበቀ መልኩ የግል ት/ቤቶች በመረጡት ቋንቋ እንዲያስተምሩ ሊፈቀድላቸው ይገባል
11.2.14. ልዩ ትምህርት ለሚያስፈልጋቸው ዜጎች ችግሮቻቸውን ግምት ውስጥ የሚያስገባ የትምህርት ሥርዓት ሊዘረጋ ይገባል

11.2.15. በትምህርታቸው ከፍተኛ ውጤት የሚያመጡ ተማሪዎችን የሚያበረታታ ዝርዝር ፖሊሲ ሊቀረፅ ይገባል

11.2.16. በትምህርት ዘርፉ የግል ባለሃብቶችና መንግስታዊ ያልሆኑ ድርጅቶች በስፋት እንዲሳተፉ የሚያበረታታ ፖሊሲ ሊቀረፅ ይገባል
11.2.17. መምህራንና የትምህርት ባላሙያዎች(የግል የመንግሰት ሳይባል) እንዲከበሩ፣ የሙያ ብቃታቸውን እንዲያዳብሩ፣ የተሻለ ጥቅምና ማበረታቻዎች እንዲያገኙ ሊደረግ ይገባል፡፡

11.3. ስለ ጤና አቅጣጫዎች

11.3.1. ከጤና ተቋማት ግንባታ ባልተናነሰ በጥራት ላይ ትኩረት የሚያደርግ ፖሊሲ ሊቀረፅ ይገባል
11.3.2. በሽታን አስቀድሞ ለመከላከልና ለህፃናት ክትባት ከፍተኛ ትኩረት የሚሰጥ ፖሊሲ ሊኖር ይገባል
11.3.3. የጤና ባለሙያዎች ብቃት ላይ ከፍተኛ ትኩረት የሚሰጥ ፖሊሲ ሊቀረፅ ይገባል
11.3.4. ዝቅተኛ ገቢ ያላቸው ዜጎች፣ አቅመ ደካሞችና የተለየ ትኩረት የሚስፈልጋቸው ነፃ ህክምና ሊያገኙ ይገባል
11.3.5. መካከለኛና ከፍተኛ ገቢ ያላቸው ዜጎች በመንግስት የጤና ተቋማት ሲገለገሉ ተመጣጣኝ ክፍያ እንዲከፍሉ ሊደረግ ይገባል፤ ይህንንም ተፈፃሚ ለማድረግ ደምወዝተኞች ለራሳቸውና ለቤተሰቦቻቸው የጤና መድን (ኢንሹራንስ) እንዲያገኙ የሚያስችል ሀገራዊ አሰራር ሊዘረጋ ይገባል
11.3.6. በወረርሽኝ መልክ የሚሰራጩ በሽታዎችን የሚከታተልና የሚቆጣጠር መንግስታዊ ተቋም ማቋቋም ያስፈልጋል
11.3.7. የጤና ባለሙያዎች ወደ ሌሎች ሀገራት እንዳይሰደዱ የሚከላከል ፖሊሲ ሊቀረፅ ይገባል
11.3.8. በጤናው ዘርፍ መንግስት ወሳኝ ድርሻ እንዲኖረው የሚያስገድድ ነባራዊ ሁኔታ ቢኖርም፣ የግልና መንግስታዊ ያልሆኑ ድርጅቶችም በዘርፉ እንዲሳተፉ የሚያበረታታ ፖሊሲ ሊኖር ይገባል፡፡
11.4. ስለ ማህበራዊ ዋስትና አቅጣጫዎች
11.4.1. በመንግስትም በግል ድርጅቶችም ያሉ ሠራተኞች የማህበራዊ ዋስትና ሽፋን ሊያገኙ ይገባል
11.4.2. ሰራተኞች በጡረታ ወይም በፕሮቪደንት ፈንድ የመጠቀም መብታቸው ሊጠበቅላቸው ይገባል፤
ጡረተኞች በዋጋ ግሽበት እንዳይጎዱ አስፈላጊው የህግ ጥበቃ ሊደረግላቸው ይገባል
11.4.3. መንግስት በጦርነት፣ በሰው ሠራሽና በተፈጥሮ አደጋ የተፈናቀሉ ወገኖችን መልሶ የማቋቋም ግዴታ ሊጣልበት ይገባል
11.4.4. የአካልና የአእምሮ ጉዳተኞች፣ ረዳት የሌላቸው ህፃናትና አረጋውያን እንክብካቤና ጥበቃ
እንዲደረግላቸው ህገ መንግስታዊ ዋስትና ሊሰጣቸው ይገባል፡፡
11.5. ስለ ሴቶች አቅጣጫዎች
11.5.1. ሴቶችን ያገለለ ማንኛውም ዓይነት ፖሊሲ ውጤታማ እንደማይሆን ሀገራዊ መግባባት እንዲፈጠር ሊሰራ ይገባል

11.5.2. ሴቶች በፖለቲካው መስክ በስፋት እንዲሳተፉ የሚያበረታታቸው ፖሊሲዎችን በድርጅትም በመንግስትም ደረጃ ሊቀረፅ ይገባዋል
11.5.3. የሴት ባለሀብቶችን በብዛት ለመፍጠር የሚያስችል ፖሊሲዎች መቅረፅ ያስፈልጋል
11.5.4. ሴቶች በከፍተኛ የትምህርት ተቋማት ያላቸውን ተሳትፎ የሚያሳድጉ ፖሊሲዎች ሊቀረፁ ይገባዋል
11.5.5. ሴቶችን ከጥቃትና ከአድልኦ የሚከላከሉ ጠንካራ ህጎች ማውጣት ያስፈልጋል፡፡
11.6. ስለ ወጣቶች አቅጣጫዎች
11.6.1. ወጣቶች በሀገሪቱ ፖለቲካ ውስጥ ተሳትፎ እንዲያደርጉ የሚያስችላቸውን ድርጅታዊና መንግስታዊ ፖሊሲ ሊቀረፅ ይገባዋል
11.6.2. ወጣቱን ደረጃ በደረጃ ከጫት፣ ከሺሻና ከተለያዩ ሱሶች ለመታደግ የሚያስችሉ የህግ ድንጋጌዎች መውጣት ይገባቸዋል፤
11.6.3. ወጣቱን በተለይ ከጫት የሚያላቅቀው ሀገራዊ ንቅናቄ መፍጠር ያስፈልጋል
11.6.4. ወጣቱ ተቀጣሪ ከመሆን ስራ ፈጣሪ እንዲሆን የሚያስችል መጠነ ሰፊ የብድር፣ የስልጠና፣ የምክርና የክትትል ስርዓት መፍጠር የሚያስችል ፖሊሲ ሊቀረፅ ይገባል፡፡
11.7. ስለ ባህል አቅጣጫዎች
11.7.1. ባህሎቻችን ዓለም አቀፋዊ እውቅና እንዲያገኙ፣ እንዲሁም ለሁሉም ኢትዮጵያዊያን የኩራት ምንጭና ኢኮኖሚያዊ ጥቅም እንዲሰጡ የሚያስችል ፖሊሲ ሊቀረፅ ይገባል 11.7.2. ጎጂ ባህሎችን የሚከላከሉ ህጎች ማውጣት ያስፈልጋል
11.7.3. ኢትዮጵያዊያን ሁሉ በኢትዮጵያ ያሉ ባህሎችን እንዲያውቁ እና ብሄራዊ ስሜታቸውን እንዲያጎለለብቱ የሚያስችል ፖሊሲ በትምህርት ፍኖተ ካርታ ውስጥ ሊካተት ይገባል፡፡

11.8. ስለ ኪነ -ጥበብ አቅጣጫዎች
11.8.1. ኪነ-ጥበብ እንዲያድግና እንዲጠናከር ሁሉን አቀፍ ድጋፍ ሊደረግለት ይገባል
11.8.2. የኪነ ጥበብ ባለሙያዎች በነፃነት እንዲሰሩ የህግ ዋስትና ሊሰጣቸው ይገባል
11.8.3. ለኪነ-ጥበብ ባለሙያዎች የአእምሮ ፈጠራና የባለቤትነት መብት የሚያስከብር ጥብቅ ህግ ሊወጣ  ገባል፤ ህጉንም ለማስከበር የሚያስችል ቁርጠኛ የመንግስት አመራር ሊኖር ይገባል
11.8.4. የኪነ-ጥበብ ሙያን ለማዳበር የማሰልጠኛ ተቋማት እንዲያስፋፉ ሁሉን አቀፍ ጥረትና ድጋፍ ሊደረግ ይገባል፤

11.9. ስለ አካባቢ ጥበቃ አቅጣጫዎች
11.9.1. የተፈጥሮ ሀብትን ከብክለት ለመታደግ የሚያስችል ጠንካራና ዓለም አቀፍ ደረጃን የጠበቀ ፖሊሲ ሊኖር ይገባል

11.9.2. የአካባቢ ጥበቃ ህጎች ኢንቨስትመንትን እንዳይጎዱ ተደርገው መቀረፅ ይገባቸዋል
11.9.3. በአካባቢ ጥበቃ ላይ የተሰማሩ የበጎ አድራጎት ድርጅቶችና ግለሰቦች ሊበረታቱ ይገባል
11.9.4. የቆሻሻ ማስወገጃ ስፍራዎች ከቆሻሻ ማጠራቀሚያነት አልፈው ለመልሶ መጠቀም፣ ለማዳበሪያነት፣ ለኃይል ምንጭነት እንዲውሉ የሚያስል ፖሊሲ ሊቀረፅ ይገባል
11.9.5. ኢንዱስትሪዎች አካባቢን ሊበክሉ የሚችሉ ተረፈ ምርታቶችን በተለየ መልኩ እንዲያስወግዱ
የሚያስገድድ ህግ ሊወጣ ይገባል፡፡
11.10. ስለ ስፖርት አቅጣጫዎች
11.10.1. ሀገራቸውንና ራሳቸውን የሚያስጠሩ ምርጥ ስፖርተኞችንና ብድኖችን ለማፍራት የሚያስችል ዝርዝር የስፖርት ፖሊሲ መቅረፅ ያስፈልጋል
11.10.2. የተለያዩ የስፖርት ፌዴሬሽኖች ከመንግስት ጣልቃ ገብነት ነፃ ሆነው ሊንቀሳቀሱ ይገባል

11.10.3. ለስፖርትና ለመዝናኛ የተመደቡ ቦታዎች ሊስፋፉ ይገባል
11.10.4. የግል ባለሀብቶች የስፖርት ተቋማትን እንዲያስፋፉ ሊበረታቱ ይገባል፡፡

11.11. ስለ ማህበራት አቅጣጫዎች
11.11.1. ዜጎች የጋራ ጥቅምና መብቶቻቸውን ለማስከበር መንግስታዊ ባልሆኑ ማህበራት ተደራጅተው
የመንቀሣቀስ መብታቸው የተከበረ ሊሆን ይገባል
11.11.2. ሀገራዊ የሆኑ መንግስታዊ ያልሆኑ ድርጅቶች የገንዘብ ምንጫቸውን ካለምንም ገደብ ከሀገር ውስጥም ሆነ ከውጭ እንዳያገኙ የሚገድባቸው ህግ ሊኖር አይገባም
11.11.3. መንግስታዊ ያልሆኑ ድርጅቶች በቀጥታ ለመንግስት ስልጣን የማይወዳደሩ ቢሆኑም፣ ለመረጡት የፖለቲካ አመለካከትም ሆነ ድርጅት ድጋፍ የመስጠት መብታቸው ሊጠበቅላቸው ይገባል
11.11.4. ዓለም አቀፋዊ የሆኑ የሰብዓዊ መብትና ግብረ ሰናይ ማህበራትና ድርጅቶች በህግ አግባብ እንዲንቀሳቀሱ ሊፈቀድላቸው ይገባል፤ በፖለቲካ ውሳኔም እንዳይዘጉ የህግ ጥበቃ ሊሰጣቸው ይገባል፡፡