Menu

balderas

About balderas

Posts by :

በእነ እስክንድር የክስ መዝገብ የፌዴራል ከፍተኛ ፍ/ቤት ለየካቲት 24 ቀን 2013 ዓ.ም ተለዋጭ ቀጠሮ ሰጠ

በእነ እስክንድር የክስ መዝገብ ጉዳዩን በዋነኛነት የያዘው የፌደራል ከፍተኛ ፍ/ቤት አስቀድሞ በሰጠው ቀጠሮ መሰረት ፦ የምስክር አቀራረብ ሒደት ላይ ፤ ለምስክሮች ደሕንነት ሲባል በምስክር ጥበቃ አዋጁ መሰረት በዝግ ችሎትና ከመጋረጃ ጀርባ ቃላቸውን እንዲሰጡ ይፈቀድልኝ ሲል ፤ ዐቃቤ ሕግ ያቀረበውን መቃወሚያ ውድቅ አድርጓታል ።

በዚህም መሰረት ዐቃቤ ሕግ ምስክሮችን አቅርቦ እንዲያሰማ ቀጠሮ በተሰጠበት ቀን ፤ ዐቃቤ ሕግ ከጠቅላይ ፍ/ቤት እግድ ይዞ በመቅረብ የምስክሮች አቀራረብ በተመለከተ ይግባኝ የጠየኩ በመሆኑ በጉዳዩ ላይ ውሳኔ እስኪ ሰጠ ተለዋዋጭ ቀጠሮ ይሰጠኝ በማለት ያመለከተ ሲሆን ፤ የፌደራል ከፍተኛ ፍ/ቤት የእግዱ ውሳኔ በመቀበል ተለዋጭ ቀጠሮ ሰጥቷል ።

ይሁን እንጂ ጉዳዩ በይግባኝ የቀረበለት ጠቅላይ ፍ/ቤት የፌደራል ከፍተኛ ፍ/ቤት ውሳኔ በማጽናት ፣ ዐቃቤ ሕግ ምስክሮችን በግልጽ ችሎት እንዲያሰማ እና የእግድ ትዕዛዝ በመሻር ፣ የዐቃቤ ሕግ አቤቱታ ውድቅ አድርጓል ።

ዐቃቤ ሕግ በከፍተኛ ፍ/ቤት እንዲሁም በጠቅላይ ፍ/ቤት ውድቅ የሆነበትን ይግባኝ ፤ ለፌዴራል ጠቅላይ ሰበር ሰሚ ችሎት ይግባኝ ጠይቋል። ሰበር ሰሚ የቀረበለትን ይግባኝ ተመልከት ፤ ጠቅላይ ፍ/ቤት ጉዳዩን ግራና ቀኝ አከራክሩ ይወስን በማለት ፤ መልሶ ወደ ጠቅላይ ፍ/ቤት መርቶታል።

ጉዳዩ በዚህ ደረጃ ላይ እንዳለ ዛሬ የካቲት 16 ቀን 2013 ዓ.ም ከዚህ ቀደም በተሰጠው የጊዜ ቀጠሮ መሰረት ፣ እነ እስክንደር በፌዴራል ከፍተኛ ፍ/ቤት ልደታ ምድብ ችሎት የቀረቡ ሲሆን ፤ ፍ/ቤቱ ዛሬ በዋለው ችሎት ምስክሮች ለመስማት የተቀጠረ መሆኑን በመግለጽ ፤ በቅድሚያ በጠቅላይ ፍ/ቤት የተሰጠውን ትዕዛዝ በተመለከተ ግራና ቀኝ ሃሳባቸውን እንዲገልጹ ፍ/ቤቱ የጠየቀ ሲሆን ፤ ዐቃቤ ሕግ ይግባኝ በጠየኩበት የምስክሮች አቀራረብ ላይ በነገው እለት የካቲት 17 ቀን 2013 ዓ.ም በጠቅላይ ፍ/ቤት ቀጠሮ የተሰጠ በመሆኑ ጉዳዩ ውሳኔ እስኪያገኝ ድረስ ተለዋዋጭ ቀጠሮ ይሰጠኝ በማለት ለፍ/ቤቱ ጥያቄውን አቅርቧል ።

የእነ እስክንድር ጠበቆች ለዐቃቤ ህግ በሰጡት ምላሽ ፤ ዐቃቤ ህግ የመጀመሪያው ጥያቄ በዚሁ ፍ/ቤት ውድቅ ሆኖበታል ፣ በጠቅላይ ፍ/ቤት በተመሳሳይ መልኩ ጥያቄው ተቀባይነት አላገኘም ። ጉዳዩን በመጨረሻም ጠቅላይ ሰበር ሰሚ ችሎት ዐቃቤ ሕግ ይዞ ቢቀርብም ፤ ሰበር ሰሚ ችሎት ወደ ጠቅላይ ፍ/ቤት መርቶታል።

ይሁን እንጂ በነገው እለት ቀጠሮ ስለ መኖሩ ደንበኞቻችን እንዲሁም እኛ የምናውቀው ነገር የለም ። መጥሪያ አልደረሰንም ። ዐቃቤ ህግ ምስክሮችን በግልጽ ማቅረብ አልቻለም ።

በዚህ መሐል ደንበኞቻችን ያለ አግባብ በእስር ላይ ይገኛሉ ፤ ይህም በመሆኑ ፍ/ቤት ጉዳዩ በቀጥታ የሚመለከተው ስለ ሆነ ደንበኞቻችን ከእስር ሊለቀቁ ይገባል። ከጠቅላይ ፍ/ቤት መጠሪያ ሲቀርብ ደንበኞቻችን የቀረበባቸውን ክስ ከእስር ቤት ውጪ ሆነው መከራከር ይችላሉ። በማለት የእነ እስክንድር ጠበቆች ለዐቃቤ ሕግ ምላሽ በመስጠት የህግ ክርክር አድርገዋል ።

ግራና ቀኝ የህግ ክርክር የሰማው ከፍተኛው ፍ/ቤት ፤ ይህ ችሎት በጀመረው ሥራ ይቀጥላል ። አስቀድመን የሰጠነው ውሳኔ አለ ፤ ዐቃቤ ህግ ምስክሮችን በግልጽ ችሎት አቅርቦ ያስመስክር። እስካሁን ድረሰ ለዚህ ችሎች የቀረበ እግድም ሆነ የተለየ ትዕዛዝ አልደረሰም ፤ ይህም በመሆኑ እኛ ሥራችንን እንቀጥላለን ። በማለት ለየካቲት 24 ቀን 2013 ዓ.ም ጠዋት 3:30 ላይ ዐቃቤ ህግ ምስክሮችን ይዞ ይቅረብ በማለት ፍ/ቤቱ ትዕዛዝ ሰጥቷል ።

ይህ በእንዲህ እንዳለ ፤ ዐቃቤ ህግ ይግባኝ ጠይቄበታለው ባለው ጉዳይ በነገው እለት የካቲት 17 ቀን 2013 ዓ.ም በጠቅላይ ፍ/ቤት ዐቃቤ ሕግ ቀጠሮ መኖሩን ገልጸዋል ። ሆኖም ግን የነገው ቀጠሮ በተመለከተ እነ እስክንድር የደረሳቸው ምንም አይነት መጥሪያ አለመኖሩን በችሎት ተገልጿል ።

ፍርድ ቤቱ ሆይ!  (አስካለ ደምሌ፤ ከቃሊቲ ወህኒ ቤት (የፖለቲካ እስረኛ))

መነሻ

በእነ እስክንድር ነጋ መዝገብ በሽብር ወንጀል ተከስሸ ያለ አንዳች ጥፋት ቃሊቲ ወህኒ ቤት እገኛለሁ። ችሎት በምንቀርብበት ጊዜ ጉዳያችንን ዘርዝረን እንድናስረዳ በቂ ጊዜ አልተሰጠንም። ንግግሮቻችን በሽራፊ ደቂቃዎች የተገደቡ ናቸው። በመሆኑም ለፍርድ ቤቱም ሆነ ለሰፊው ሕዝብ ይደርስ ዘንድ ይህንን መጣጥፍ አዘጋጀሁ።

“መንግሥት ላይ ጫና መፍጠር እና የእርስ በእርስ ግጭት ማስነሳት” በሚል ክስ ተመስርቶብኝ እስር ቤት ሆኜ ጉዳዬን እየተከታተልኩኝ መሆኑ ይታወቃል፡፡ ይሁን እንጂ ለመታሰሬ ምክንት የሆነው ጉዳይ ከመከሰቱ በፊት፡-

  1. በመንግሥት ተቋም ውስጥ በምሠራበት ወቅት በእያንዳንዱ እንቅስቃሴዬ ልክ መንግሥታዊ የስለላ አባላትን በመመደብ፣ኮልፌ ቀራኒዮ ክፍለ ከተማ ወረዳ 11 የብልጽግና ፓርቲ አመራሮች “መንግሥት ደሞዝ እየከፈለሽ በባልደራስ ለእውነተኛ ዴሞክራሲ ፓርቲ መሳተፍ የለብሽም” ብለው በአካል እና በስልክ ተፅዕኖ ሲፈጥሩብኝ ነበር።
  2. የፖለቲካ ተሳትፎዬን ብቻ በማየት በርቀት መከታተያ (GPS) አማካኝነት ሲሰልሉኝ ቆይተዋል። ግንቦት 21 ቀን 2012 ዓ.ም ከሌሊቱ ስድስት ሰዓት ስልክ ደውለው አስፈራርተውኛል። ይህንን ፍርድ ቤቱ ሊረዳው ይገባል። ለክሱ ሰበብ የሆነው ክስተት ከተፈጠረ ከ42 ቀናት በኋላም ያለ አንዳች ማስረጃ አስረውኛል። እነኝሁ ሰላዮች በአካል አግኝተው ፖለቲካዊ አቋሜን እንድቀይር ጠይቀውኛል። ይህንን ካደረግኩ የጋራ መኖሪያ ቤት እንደሚሰጠኝና የኦሕዴድ/ብልፅግና አመራር እንደምሆን ነግረውኛል። ይህን ካልፈለግኩ ከሀገር ወጥቼ መኖር የምችልበትን ዕድል እንደሚያመቻቹም ገልፀውልኛል። እነኝህን መደለያዎች ባለመቀበሌና አቋሜን ባለመቀየሬ ወደ እስር ቤት የተወረወርኩ መሆኑን ሕዝብም ሆነ ፍርድ ቤቱ ሊያውቁት ይገባል። ከዚህም በተጨማሪ የደህንነት መሥሪያ ቤቱ ሠራተኞች በሄድኩበት እየተከታተሉ ፎቶ ግራፍ ሲያነሱኝ ነበር።

 

  1. አዲስ አበባ ኮልፌ ቃራኒዮ ክፍለ ከተማ ዓለም ባንክ ፋኑኤል በሚባል ቦታ ለተፈናቀሉ ህዝቦች ከባልደራስ የተደረገውን ድጋፍ ልናደርስ ቦታው ላይ በተገኘንበት ወቅት እኔን ጨምሮ ብዛት ባላቸው የመንግሥት የፀጥታ አካላት ተረጂዎችና የባልደራስ አመራሮች ታግተን ቆይተናል። ካራ ፖሊስ ጣቢያ ታስረን ከሰዓታት በኋላ እርዳታውን ሳናከፋፍል ከእገታው ተለቀን መመለሳችን ወትሮም ለክስ ሰበብ እየተፈለገልን እንደነበር አመላካች ነው።

በለገሀር የይሁዳ አንበሳ ሃውልት እና ዙርያውን ለማፅዳት፣ ችግኝ ለመትከል እና የዘርዓይ ደረስን 82ኛ ዓመት ዝክረ በዓል በማክበር ላይ እያለን ፕሮግራሙን ሳንጨርስ እኔን ጨምሮ የባልደራስ ከፍተኛ አመራሮች እና ደጋፊዎችን ብዛት ያላቸው የመንግሥት  ፖሊሶች  አስቆሙን። ቀጥሎም ወደ ለገሀር ፖሊስ ጣቢያ ወስደውን ካገቱን በኋላ ለቀውናል።

 በባልደራስ 6ኪሎ ከተፈሪ መኮንን ከፍ ብሎ የሚገኘው ዋና ጽ/ቤት ውስጥ ሥራ ላይ እያለን የፌዴራል ፖሊሶች መጥተው ጠመንጃ ደቀኑብን።  በማስፈራራት አቋሜን ለማስቀየር፣ የፖለቲካ ተሳትፎዬን ለመግታት ጥረት ሲደረግ እንደ ነበረና ይህ እስርም የዛው አካል መሆኑ ይታወቅ።

ፍርድ ቤቱ ሆይ በቁጥጥር ስር ከዋልኩኝ በኋላም የፌዴራል ወንጀል ምርመራ ቢሮ (ማዕከላዊ) እያለሁኝ ሁሉም ተጠርጣሪ ተቆጥሮ ወደ ቤት ከገባ በኋላ ሰዓት እላፊ መስኮት ከተው ለምስክሮች ሲያስጠኑኝ፣ የተለያዩ ማስፈራራቶች ሲደርስብን እንደ ነበረ እና በወቅቱ ለሚመለከተው አካል ሪፖርት ያደረግኩኝ መሆኑ ይታወቅልኝ።

  1. በምርመራ ላይ በነሐሴ 5 ቀን 2012 ዓ.ም በመርማሪው ስጠየቅ ከነበሩት ውስጥ፤ “የአፄ ምኒልክ ሃውልት እንዳይፈርስ የአዲስ አበባን ሕዝብ አደራጅተሸ ታግለሻል፣ መንግሥት ደሞዝ እየከፈለሽ ለምን የተቃዋሚ ፓርቲ አመራር መሆን አስፈለገ፣ አዲስ አበባ የነዋሪዎቿ ነች በማለት በአስሩ (10) ክፍለ ከተማ ወጣቶችን ወይም ህዝቦችን ለባልደራስ ለእውነተኛ ዲሞክራሲ ፓርቲ ስታደራጅ ነበረ” በማለት መርምሮኛል።  ከዚህ መረዳት የሚቻለው ጉዳዩ የፖለቲካ እንጂ የሕግ እንዳልሆነ ነው። 
  2. በአዲስ አበባ የሥራ ዕድል ፈጠራን አስመልክቶ እና ለአዲስ አበባ የመጣ የተዘዋዋሪ ፈንድ ብድር ብሔርን ያማከለ ስለ ነበር ለሁሉም ብሔር እድሉ መድረስ አለበት በማለት የበኩሌን ድርሻ ተወጥቻለሁኝ። ይህም ለመታሰሬ አንድ ምክንያት ነው፡፡
  3. በአዲስ አበባ ውስጥ በብዙ ወረዳዎች ላይ የቀበሌ መታወቂያ ሕጋዊ ሂደቶችን ሳይከተል ማለትም መሸኛ ሳይመጣ፣ በሀሰተኛ የድንች ማህተም በወረዳዎች ግቢ ውስጥ መዘጋጀቱ እየታወቀ፣ ያለ ባለቤት ፍቃድ በሰው ቤት ቁጥር መታወቂያ ለኦሮሚኛ ተናጋሪዎች ብቻ እየታደለ፣ ህጋዊ መስፈርቶችን አሟልተው ከሌላ የኢትዮጵያ ጫፍ ለሚመጡ እየተከለከለ ብሎም መሸኛቸው ላይ ከጀርባ ከ6 ወር በኋላ ነው የምትስተናገዱት መባለቸውን፣ በጋሃድ ስለተቃወምኩኝ ብቻ ሳይሆን ስለ ታገልኩኝ ሚዛናዊ አገልግሎት መኖር አለበት ስላልኩኝ መታሰሬ ይታወቅ።
  4. በአዲስ አበባ የወረዳ ሥራ አስፈፃሚዎች ላይ መታወቂያ በዜሮ ዜሮ (00) ኮድ እንድያወጡ በሥም ዝርዝር ከበላይ አካል መርተውላቸው እሱንም ወደ መታወቂያ ክፍል እንዲያስተላልፉ ጫና ሲደረግባቸው ስለነበረ ይህ አግባብ አለመሆኑን ተቃውሜያለሁ። ታግያለሁ። የእስሬ ምክንያትም ይኸው ነው።

 

  1. ያለአንዳች ህጋዊ እና አስተዳደራዊ ምክንያት ከኦዴፓ (የብልጽግና ፓርቲ ኦሮሚያ ቅንጫፍ አባላት) ውጪ የሆኑትን ዜጎች (ብሔረሰቦች) ከሥራ ገበታቸው ሲባረሩ፣ ከአመራርነት ዝቅ ሲደረጉ በማየቴ እና በመታገሌ የደረሰብኝ እንግልት እና እስር ነው።
  2. በመንግሥት መሥሪያ ቤት ብሄርን የማጣራት ሥራ ስለ ተጀመረ ለምን አስፈለገ?፣ የሚል ተቃውሞ በማስነሳቴ ምክንያት የመጣ እስር እንጂ እንደ ተባለው ወንጀል ሰርቼ እንዳልሆነ ፍ/ቤቱ እንዲገነዘብልኝ እጠይቃለሁ፡፡
  3. የብልጽግና ፓርቲ ኦሮሚያ ቅርንጫፍ የአዲስ አበባ ክፍለ ከተማ አመራሮች በሥራ ልምድ፣ በትምህርት ዝግጅትና በመፈፀም ብቃት የተሻለ እያለ በብሔር ተረኛ ነኝ ባዮች ሲመዳደቡ እና እነዚሁ አመራሮች ደግሞ በዚሁ ተረኝነት ስሜት ሌሎችን በትምህርት ዝግጅት እና ልምድ ያነሱበትን ለመመደብ ሲንቀሳቀሱ አይቼ ታግያለሁኝ። ወደ ፊትም እታገላለሁ። እስሩም ከዚሁ የመነጨ መሆኑ ይታወቅ።

 

  1. ከ1997 ዓ.ም. እና 2005 ዓ.ም. የጋራ መኖሪያ ቤት የተመዘገቡትን ባለ እድሎችን አስመልክቶ ባልደራስ ለእውነተኛ ዴሞክራሲ ፓርቲ በእጣ አወጣጡ፣ ቅድመ ቁጠባ ቆጥቦ ጨርሶ እጣ ውስጥ ያለ መካተታቸውን አስመልክቶ፣ ሙሉ ክፍያ ከፍሎ ዕጣ ውስጥ ያለው መግባታቸው፣ ቤቱ የደረሳቸው ደግሞ ቤቱን አለመረከባቸውን፣ ሳይቆጥቡ የተሰጣቸውን እና ፍትሀዊ ባልሆነ መንገድ ለአንድ ብሔር ብቻ መታደላቸውን አስመልክቶ ፓርቲው የማህበረሰቡን ቅሬታ ለመቀበል በማህበራዊ ሚዲያው የግል ስልኬን ለጥፎ ስለ ነበር የመንግሥት አካላት ደውለው “የተለጠፈውን ስልክ አንሺ” እያሉ ሲዝቱብኝ ነበር፣ ይህን አስመልክቶ ብዙ ቅሬታዎችን አስተናግደናል። እኔም ይህንን ድርጊት በመቃወሜ የመጣ እስር እንጂ እንደ ተባለው ወንጀል ሰርቼ እንዳልሆነ ፍርድ ቤቱ ሆይ እንድትረዳልኝ እጠይቃለሁ።
  2. እኔን ጨምሮ የመንግሥት ሠራተኞችን ብልግጽና ፓርቲን ትቀበላላችሁ አትቀበሉም በማለት የተለያዩ ማስገደዶች ሲደርሱ አይቼ ለምን በማለት ስለ ተቃወምኩኝ የመጣ እስር እንጂ ወንጀል አልሠራሁም።
  3. አዲስ አበባ የምትተዳደረው በቻርተር ሆኖ ሳለ በቻርተሩ ላይ የሥራ ቋንቋ አማርኛ መሆኑን በግልፅ ደንግጎ እያለ በ2011 ዓ.ም “እኔ የምሠራበት መሥሪያቤት አዲስ ብድር እና ቁጠባ ተቋም” (አማ) ለክፍት የሥራ መደብ ማስታወቂያ አውጥቶ ማስታወቂያ ላይ ኦሮምኛ መናገር መፃፍ የሚችል የሚል መስፈርት አመጣ። ይህንን በመቃወሜም ታስሬያለሁ።
  4. ሚያዚያ 27 ቀን 2012 ዓ.ም የአርበኞች የድል ቀን ሲከበር የባልደራስ ለእውነተና ዴሞክራሲ ፓርቲ የሰማዕታት ሃውልት ላይ የድርጅቱ ከፍተኛ አመራሮች እኔን ጨምሮ የአበባ ጉንጉን አስቀምጠን ስለ ነበር ይህ ሁኔታ በማህበራዊ ሚዲያ ፎቶ ተሰራጭቶ ነበር። የመንግሥት አመራሮች ይህን ፎቶ በማየት ይህንን ድርጊት አቁሚ ብለው ከፓርቲው ጋር ያለኝን ግንኙነት ለማስቆም ብዙ ጥረት ሲያደርጉ ቆይተዋል፡፡ የሀሰት ክሱም የመነጨው ከዚህ ነው።
  5. በኢትዮጵያ ቤተመንግሥት መግቢያ በር ላይ የተገነቡት የፒኮክ ምልክቶች የሀገራችንን ምልክት የማይገልፁ በመሆናቸው ባልደራስ ለእውነተኛ ዴሞክራሲ ፓርቲ አግባብ አይደለም በማለት የተቃውሞ ፊርማ ማሰባሰቡ ይታወቃል፡፡ እኔም ከፓርቲው ከፍተኛ አመራሮች ጋር በመሆን “እኔ ብሄራዊ ምልክቴ አንበሳ እንጂ ፒኮክ አይወክለኝም” የሚል ቪዲዮ በማህበራዊ ሚዲያ አሰራጭቻለሁ፡፡ የመንግሥት ባለ ሥልጣናት ይህንን ቪዲዮ በማየት ከፍተኛ ተፅዕኖ ከመፍጠራቸውም በዘለለ ለእስር ዳርጎኛል፡፡
  6. አዲስ አበባ ሲቪል ሰርቪስ 2012 ዓ.ም በወጣው ክፍት የሥራ መደብ ላይ ምዝገባውም ቅጥሩም ብሄር ብሔረሶችን የሚወክል አይደለም፣ አንድ ብሔር ማለትም ኦሮምኛ ተናጋሪዎችን ብቻ የሚወክል ነው በማለት መቃወሜ ለእስር እና ለተለያዩ የመብት ጥሰቶች ያጋለጠኝ መሆኑን ፍ/ቤቱን ማስገንዘብ እፈልጋለሁ፡፡

16 . አዲስ አበባ የነዋሪዎቿ ነች፣ ማንኛውም ዜጋ መጤም ሰፋሪም ሊባል አይገባም በማለቴ የመጣ እስር ነው። ክሱ በራሱ ማንነትን መሠረት  ያደረገ፣ የመናገር፣ የመቃወም፣ የመደራጀት፣ ህገ መንግስታዊ መብትን የሚጥስ ብቻ ሳሆን አማራ እና የደቡብ ተወላጆችን (የጋሞ ተወላጅ) በጋራ ማደራጀት የሚለው ክስ በእራሱ ልዩነትን  የሚያስፋ ነው። ሁለቱ ሕዝቦች በአንድ ላይ ቢደራጁም የሚያለሙ እንጂ የሚያጠፉ አይደሉም። ስለዚህ ክሱ መሠረተ ቢስ ነውና ሊዘጋ ይገባል፡፡

  1. አረንጓዴ፣ ቢጫ ቀይ ቀለም ያላቸውን አልባሳት፤ የአጼ ምኒልክ ምስል ያላቸው ቲሸርቶችን በመሥሪያ ቤት አካባቢ ስለብስ አረንጓዴ፣ ቢጫ፣ ቀዩ አልፀደቀም በማለት እና ቲሸርቱ ላይ ያላቸው እይታ መጥፎ በመሆኑ ለመታሰሬ ምክንያት ሆኗል።
  2. የብልጽግና ፓርቲ አመራሮች በኮቪድ 19 ወረርሽኝ ወቅት ማህበረሰቡ ውስጥ ገብተው 1 ለ 5 ሲያደራጁ ለማህበረሰቡም ሆነ ለመንግሥት መሥሪያ ቤት ሰራተኞች ከፍተኛ አደጋ ያጋልጠናል በማለት ስለ ተቃወምኩኝ የታሰርኩ መሆኔን ፍ/ቤት እንዲገነዘብልኝ እፈልጋለሁ።

20 . በሀገሪቷ በአጠቃላይ እንደ ባልደራስ ለእውነተኛ ዲሞክራሲ ፓርቲ ካለን ብዙ ሃሳቦች በጥቂቱ የንፁሃን ዜጎች ሞት፣ መፈናቀል፣ የዘር ማጥፋት፣ የንብረት መውደም፣ የኃይማኖት ተቋማት ማለትም የመስጊድ፣ቤተክርስቲያን እና ሌሎችም መቃጠል፣ መፍረስ፣ መዋረድ የለባቸውም በማለት ስለ ተቃወምን እና ስላወገዝን ለእስር የተዳረግን መሆናችን ግልፅ ነው። መንግሥት አቻ የፖለቲካ ፓርቲዎችን በተለያዩ ሀገራዊ አጀንዳዎች ላይ ጠርቶ ሲያወያይ ባልደራስ ለእውነተኛ ዴሞክራሲ ፓርቲን ግን አንድም ውይይት ላይ አላሳተፈውም። ይህ ደግሞ የሚያመላክተው ካለን ሕዝባዊ  ቅቡልነት የተነሳ መንግሥት በጥላቻ  የሚመለከተን መሆኑን ነው። ፍ/ቤቱም ሆነ መንግሥት እንዲረዳ የምንፈልገው ሌላኛው ጉዳይ ደግሞ ኢትዮጵያ ውስጥ ማንኛውም ሰው በአመለካከቱ ልዩነት ምክንያት፣  በብሄሩ ምክንያት፣ በኃይማኖቱ ምክንያት፣ በፖለቲካ አቋሙ ምክንያት ለእስር እና ለተለያዩ መገለሎች መዳረግ የለበትም የሚል ነው፡፡

  1. የመንግሥት አካላት የፖለቲካ ተሳትፎዬን በማወቅ የእጅ ስልኬን ቀድመው በመጥለፍ ሲከታተሉኝ ነበር። አሁንም በእጃቸው ላይ የሚገኘውን ስልኬን የኢንተርኔትና የስልክ ጥሪ እየተጠቀሙበት ነው። የፌዴራል ጠቅላይ ዐቃቤ ሕግ የመሠረተብኝ ክስ አንድም ለመጠርጠር እንኳን የሚያበቃኝ በሌለበት፣ አንድም አካል ለህገ ወጥ ዓላማ ማደራጀቴን ማስረጃ ባልቀረበበት ነው።
  2. የባልደራስ ለእውነተኛ ዴሞክራሲ ፓርቲ የመመስረቻ ጉባኤ ላይ መስራች አባል ስለሆንኩኝ፣ በጉባኤው ላይ መገኘቴን ከማህበራዊ ሚዲያ መረጃ በማየት፣ የመንግሥት ደህንነት አካላት ከፍተኛ ክትትል ከማድረግም ያለፈ የፓርቲው አባልነቴን እንዳቆም ጥረት አድርገዋል። የምሠራበት ተቋም ማለትም አዲስ ብድርና ቁጠባ ተቋም (አማ) የሠራተኞችን መብት የሚጥስ፣ጉልበት (በብዙ ኃይል የሚሠራን ሥራ አንድ ሰው ላይ በመጫን) ሠራተኞች ሲቀጠሩ የሥራ ድርሻ የማይሰጥበት፣ የሠራተኛ ጥቅማ ጥቅም የማይከበርበት፣ ሠራተኛ ከሥራ ሲለቅ የሠራውን ሥራ በሥራ ልምዱ ላይ በዝርዝር አለማስቀመጥ፣ እውቀት፣ ልምድና ትምህርት ዝግጅት የተሻለ እያለ ከዚህ ያነሱትን ማስቀደም ስለሌለ፤ ይህ መሆን የለበትም መሥሪያ ቤቱ የሠራተኛ ደም መጣጭ ነው በማለት ስለ ተቃወምኩኝ የታሠርኩ መሆኔን ፍ/ቤቱን ማሳወቅ እፈልጋለሁ፡፡ 

በአጠቃላይ ከላይ የተዘረዘሩት ተግባራት  ለእስር ካጋለጡኝ ጉዳዮች መካከል ከብዙ በጥቂቱ ናቸው። በመሆኑም የግል ጥቅሜን ባለማስቀደም፤ ለሀገር ህልውና በመታገሌ የመጣ ክስ መሆኑን አውቆ ፍርድ ቤቱ ውድቅ እንዲያደርግልኝ እጠይቃለሁ። ስለ እውነት ብላችሁ ከእስር እንድንፈታ በልዩ ልዩ መንገዶች በአሳሪዎች ላይ ጫና እየፈጠራችሁ ላላችሁ ሰዎች ሁሉ ምስጋናዬ ይድረሳችሁ።

ፈሪሃ እስክንድር (ጌጥዬ ያለው)

                                 
 ደንበ – ተግባቦት

  የዚህ መጣጥፍ ርዕስ እስክንድር ነጋ ከአሳሪዎቹ እንደሚበልጥ ለማሳየት የተሰየመ እንጂ ስጋ ለባሹን ሰው ከፈጣሪ ለማስተካከል እንዳልሆነ ይታወቅ፡፡ ‹ፈሪሃ እስክንድር›፤ ‹ፈሪሃ ፈጣሪ› ከሚለው ሀረግ ትይዩ ተደርጎ ሊተረጎም አይገባም፡፡ በችሎት ዘገባ ፍርድ መስጠት የተወገዘ ነው፡፡ የፍርድ ሂደቱን ሊያዛባ የሚያስችል ትንተና ማድረግም ክልክል ነው፡፡ በጋዜጠኝነት ውስጥ የችሎት ዘገባ ከጦርነት ዘገባ ያልተናነሰ ብዙዎችን የሚያስፈራ እንደሆነም አውቃለሁ፡፡ እስክንድር ነጋ እና በእርሱ መዝገብ የተከሰሱት ከደሙ ነፃ መሆናቸውን ለመፍረድ ግን ይህ ሁሉ አያስፈራም፡፡ ምክንያቱም የማያሻማ እውነት ከሩቅ ይታያልና ነው፡፡ ስለዚህ መጣጥፌን የምቀጥለው እነእስክንድርን በነፃ አሰናብቼ ይሆናል፡፡ እነኝህ ሁለት ደንቦች ይከበሩ፡፡

                            መነሻ

‹‹. . . ሕዝብን የምትጨቁኑበትን መንግሥት በፍፁም እቃወማለሁ፡፡ በዚህ ምክንያት ልትገድሉኝ ትችላላችሁ፡፡ ሞት ስትፈርዱብኝም የምፀፀት ይመስላችኋል፡፡ እኔ በዚህ ብፀፀት እንደናተ ቂል ነኝ፡፡ መጥፎ ሥራችሁን እና ሕዝብን መጨቆናችሁን የምትተው ካልሆነ መቶ ጊዜ እሞታለሁ፡፡ እንደገና ብወለድ መቶ ጊዜ የገደላችሁኝ መሆናችሁንም ባስታውስ ይህ መቀጣጫ ሁኖኝ ዝም ልላችሁ አልችልም፡፡ . . .››  የሀቀኛው እና እምቢተኛው ደራሲ አቤ ጉበኛ ንግግር ነው፡፡ አቤ ይህንን ሃሳብ ‹አልወለድም› በተሰኘው ድርሰቱ ፅፎት ብቻ አላለፈም፡፡ የሕይወቱ መመሪያ አድርጎት በመንግሥት ስለት አልባ መሳሪያ ማለትም በዱላ ተደብድቦ አስከተገደለበት (ኤልያስ አያልነህ የአቤ ጉበኛ ብእራዊ ተጋድሎ በሚለው መፅሐፉ ይፋ አድርጎታል) ጊዜ ድረስ ኑሮበታል፡፡  የእስክንድር ነጋን ተመልሶ ወህኒ ቤት መግባት ሳስብ ይህ አባባል ትዝ ይለኛል፡፡ በሀቀኝነታቸው፣ ድፍረታቸውና ፅናታቸው ከአቤ ጋር ይመሳሰሉልኛል፡፡ በጀርመን የናዚዎች ክስ ምስክሮች በግልፅ ችሎት ተሰምተዋል፡፡ በተመሳሳይ በሩዋንዳ የጅምላ ጭፍጨፋ ክስ እማኞች በግልፅ ቃላቸውን ሰጥተዋል፡፡ በኢትዮጵያም የደርግ ባለሥልጣናት በዘር ማጥፋት ወንጀል ተከሰው ችሎት በቆሙ ጊዜ የዐቃቤ ሕግ ምስክሮች ፊት ለፊት ግጥም አድርገው መስክረዋል፡፡ በእነእስክንድር ላይ ግን ሰዎች በመጋረጃ ተከልለው እንዲመሰክሩ ተደርጓል፡፡ አሁንም በድጋሜ ዐቃቤ ሕግ ምስክሮቹ ከመጋረጃ ጀርባ ቃላቸውን እንዲሰጡ ይባኝ ጠይቋል፡፡

                                  እነእስክንድር ለምን ታሰሩ?

የአገዛዙ ሊቀ መንበር አብይ አሕመድ በወያኔ/ኢሕአዴግ እቅፍ ያደጉ እንደመሆናቸው እስክንድር ነጋን ጠንቅቀው ያውቁታል፡፡ ፓስተር አብይ ከፈጣሪያቸው ይልቅ ፈሪሃ እስክንድር ያደረባቸው ናቸው ማለት ይቻላል፡፡ እንደ ፈጣሪ በበጎ ባይሆንም በክፉ ይፈሩታል፡፡ ፈርተውም ይፈታተኑታል፡፡ እነእስክንድር የታሰሩት ለጅምላ ጨፍጫፊው የአብይ አገዛዝ ስላልተመቹ በመፈራታቸው እንደሆነ እያንሰላሰልን ወደ ፍርሀቱ ቀዳሚ መገለጫ እንለፍ፡-

‹‹. . .የሚቀጥለው ምርጫ ፍፁም ዴሞክራሲያዊ እንዲሆን እፈልጋለሁ፡፡ አብርሃ ደስታ (አብርሃ ምሳሌ ነው) ካሸነፍህ በ24 ሰዓታት ውስጥ አቅፌ አስረክብሃለሁ፡፡ ሳታሸንፍ አሁን ባለአደራ፤ አደራ እንደሚባለው አይነት ጨዋታ የምትጫዎት ከሆነ ግን ግልፅ የሆነ ጦርነት ውስጥ እንገባለን ማለት ነው፡፡ ይሄ መታወቅ አለበት፡፡ የፖለቲካ አቋም ያለው ሰው ቢፈልግ በግሉ፤ ቢፈልግ በፓርቲ መወዳደር ይችላል፡፡›› በዚህ ንግግራቸው ጠቅላይ ሚንስትሩ በወቅቱ የአዲስ አበባ ባለአደራ ምክር ቤት በሚል አደረጃጀት ይንቀሳቀስ የነበረውን ሲቪክ ሕዝባዊ ተቋም አስጠነቀቁ፡፡ ለተቋሙ መሪ እስክንድር ነጋ ያላቸውን ፍርሀት የገለፁበትም ነው ማለት ይቻላል፡፡ ፖለቲካዊ የሲቪክ ተቋም እንዲኖር እንደማይፈቅዱም ተናገሩ፡፡ ለፖለቲካ ሥልጣን ከሚወዳደር ግለሰብና ተቋም ውጭ ፖለቲካውን መተቸትና መግራት የሚችል ተቋም መኖር የለበትም የሚል ነበር ይህ ንግግራቸው፡፡  ምክንያቱም ለፖለቲካ ሥልጣን የሚወዳደር ከሆነ ከወያኔ በወረሱት ሴራ ለመጥለፍ ያመቻቸዋል፡፡ ‹ለሕዝብ ጥቅም ሳይሆን ራሱን ሥልጣን ላይ ለማውጣት ነው የሚቸኩለው› ለሚሉት የአባይ ጠንቋይ ወሬ ይመቻቸዋል፡፡ ለዚህም ነው ‹አብይ ወያኔ የጣለውን እንቁላል ነው ሰብሮ የወጣው› የምንለው፡፡

የአብይ አሕመድ አገዛዝ የከለከለው እስክንድር የሲቪክ ተቋም እንዳያቋቁም ብቻ አይደለም፡፡ የቴሌቪዥን ጣቢያ በሀገር ውስጥ እንዳይመሰርትም ጭምር ነው፡፡ ‹ሰናይ› ቴሌቪዥንን ለመመስረት በሀገር ውስጥ የአክስዮን ሽያጭ ተጀምሮ ነበር፡፡ ሆኖም እንኳንስ የስርጭት ፈቃድ ሊሰጠው ጉዳዩን አስመልክቶ ጋዜጣዊ መግለጫዎችም እንዳይሰጡ በመከልከሉ ሳይሳካ ቀርቷል፡፡ የተሰበሰበው አክስዮንም ለባለቤቶቹ ተመልሷል፡፡ ይህ ሁሉ ሲሆን እስክንድር ነጋ ጠብ ጫሪ አልነበረም፡፡ ቴሌቪዥኑንም ሆነ የሲቪክ ተቋሙን ምስረታ ትቶ ጠቅላይ ሚንስትሩ ወደ ፈቀዱት የፖለቲካ ፓርቲ ምስረታ ተመለሰ፡፡ (እዚህ ላይ ባልደራስ የፖለቲካ ፓርቲ ሆኖ እንዲመጣ የሕዝብ ግፊትም እንደነበረበት አይካድም)

ነገሩ የጨነቀው ርጉዝ ያገባል ሆነ፡፡ ባልደራስ የፖለቲካ ድርጅት ሆኖ ቢመጣም ፈሪሃ እስክንድር በአብይ ላይ አደረ፡፡ ድርጅቱ የምስረታ ጉባዔውን ለማካሄድ ከነጋዴ የተከራየውን የሆቴል አዳራሽ በመንግሥት ተከለከለ፡፡ በኢትዮጵያ የፖለቲካ ታሪክ መጠሪያ ስሙን እና መሪውን ጎዳና ላይ በተደረገ ስብሰባ መርጦ መንገድ ላይ የተመሰረተ የመጀመሪያው ፓርቲ ሳይሆን አይቀርም፡፡  ባልደራስ እንደ ግራ ዘመም የፖለቲካ ድርጅቶች ሁሉ በፕሮቶኮል ፖለቲካ ብቻ ተወስኖ አልቀጠለም፡፡ ከቢሮና ከአዳራሽ ፖለቲካዊ እንቅስቃሴዎች በተጨማሪ በእያንዳዱ የአስተዳድራዊ ችግሮች ሰለባ ዜጋ ቤት የወረደ ሥራውን ጀመረ፡፡ እስክንድር ፓርቲውን በሦስት መልኩ ለማንቀሳቀስ ችሏል፡፡ አንደኛው በግራ ዘመም ፖለቲከኞች የተለመደው የፕሮቶኮል ፖለቲካ ነው፡፡ ሌላኛው ደግሞ የአገዛዙ ተጎጂዎችን የሚያፅናናበትና መልሶ የሚያቋቁምበት የአክቲቪዝም ፖለቲካ ነው፡፡ ሦስተኛው የመረጃ ፖለቲካ ነው፡፡ ይህ አጫጭር መረጃዎችን በልዩ ልዩ መንገዶች ከማድረስ ጀምሮ ጋዜጣዊ መግለጫዎችን በተከታታይ እስከ መስጠት የሚደርስ ሲሆን በመረጃ እና ማስረጃ የተደገፈ ፖለቲካዊ ትንተና ነው፡፡ ዛሬ በየአካባቢው እየተፈፀመ ያለው ጅምላ ጭፍጨፋ እና የኦሮሙማ ወረራ አስቀድሞ ያመላከታቸው የዚህ ትንተና ውጤቶች ናቸው፡፡ በእነኝህ ሦስት የእንቅስቃሴ ምህዋሮቹ የአብይ አሕመድን አገዛዝ ፖለቲካዊ ውንብድና አጋልጧል፡፡ ሊያቀርቡትም ሆነ ሊያጠቁት ቢሞክሩ የሚንበረከክ አልሆነም፡፡ የጠቅላይ ሚንስትሩ ፅህፈት ቤት በማህበራዊ መገናኛ ብዙሃን ያሰማራቸው ዘላፊ ሰራዊቶች እስክንድር የአእምሮ ህመምተኛ እንደሆነ ለማስመሰል ብዙ ጥረዋል፡፡ የእስካሁኑ የመጨረሻው አማራጭ ሰበብ ፈልጎ ማሰር ሆኗል፡፡ እስክንድር ዳግም በሽብር መከሰሱ ብዙዎችን አስገርሟል፡፡ ምስክሮች ከመጋረጃ ጀርባ እንዲሰሙ መደረጉም ሌላኛው አስገራሚ ጉዳይ ነው፡፡ ታህሳስ 16 ቀን 2013 ዓ.ም. የዋለው ችሎት ደግሞ ከወትሮው የተለየና የችሎት ድሪቶ ሳይሸፍነው እውነት የተገለጠበት ታሪካዊ ክስተት ነበር፡፡

                             ከታህሳስ 16 እስከ መጋቢት 29

ታህሳስ 16 በዋለው ችሎት እነእስክንድር የእምነት ክህደት ቃላቸውን ሰጥተዋል፡፡ ከዚህ ቀደም በተደረጉ ችሎቶችም ጭምር በመጭው ምርጫ እንዲዘጋጁ የፍትህ ሂደቱ እንዲፋጠንና ከእስር እንዲወጡ ደጋግመው ጠይቀዋል፡፡ ለአንድ ወር ከ20 ቀናት የተራዘመ ቀጠሮ ተሰጥቷቸው ነበር፡፡ ለቀጠሮዎች መራዘም ጉዳዩ ከችሎቱ አቅም በላይ መሆኑንንም ዳኞች ደጋግመው ገልፀዋል፡፡ ይሁን እንጂ እነእስከንድር ለፌዴራል ከፍተኛ ፍርድ ቤት እና ለፌዴራል ጠቅላይ ፍርድ ቤት ደብዳቤ ቢፅፉም አወንታዊ ምላሽ አላገኙም፡፡ አሁንም ለ3 ወራት ከ15 ቀናት ተራዝሞ ተቀጥረዋል፡፡ ለትውልድ ይተላለፍ ዘንድ የእነእስክንድርን ደብዳቤ ሙሉ ቃል ቀጥሎ አስቀምጨዋለሁ፡- 

ለፌደራል ጠቅላይ ፍ/ቤት ፕሬዘደንት 
                 እና
ለፌደራል ከፍተኛ ፍ/ቤት ፕሬዘደንት
ጉዳዩ፡- የተፋጠነ ፍትህ ስለመጠየቅ

 

በፌደራል ከፍተኛ ፍ/ቤት ልደታ ምድብ ችሎት እነ እስክንድር ነጋ በተከሰስንበት የወንጀል መዝገብ፣ ከዚህ በታች የተዘረዘሩትን ምክንያቶች አቅርበን፣ ጉዳያችንን የያዘው ችሎት የተፋጠነ ፍትህ እንዲሰጠን መጠየቃችን ይታወሳል፡-

1ኛ. ተከሳሾች በህጋዊ መንገድ የተመዘገበ የፖለቲካ ድርጅት አባላት መሆናችንን፣

2ኛ. የታሰርነው በያዝነው ዓመት ይደረጋል ተብሎ እቅድ በተያዘለት ምርጫ ለመሳተፍ በዝግጅት ላይ በነበርንበት ጊዜ መሆኑን፣

3ኛ. የክሱ አላማ፡-

ሀ. ጥፋተኝነታችንን በፍ/ቤት አረጋግጦ ለማስቀጣት አለመሆኑን

ለ. በኮቪድ 19 ሳቢያ ተዘግተው የቆዩት ፍ/ቤቶች ያሉባቸውን የተደራረቡ መዝገቦች ግምት ውስጥ በማስገባት፣ ዋስትና የሚያስከለክል ክስ በመመስረት ጉዳዩ በእንጥልጥል እያለ በምርጫው እንዳንሳተፍ  ማድረግ መሆኑን፣

ሐ. በምርጫው እንዳንሳተፍ በፈጠራ ክስ የታሰርን መሆናችንን፣

መ. በተዘዋዋሪም ቢሆን፣ ፍ/ቤት የዚህ ህገ-ወጥ ተግባር ተባባሪ መሆን እንደሌለበት

4ኛ. ፍ/ቤቱ ከምርጫ ጋር ባሉታዊ መልኩ በቀጥታም ሆነ በተዘዋዋሪ ላለመነካካት ለመዝገቡ ፈጣን ውሳኔ መስጠት እንዳለበት፣ ይህንንም ለመተግበር የሚከተሉትን የመፍትሄ እርምጃዎች አስፈላጊ እንደሆኑ፣

 

ሀ. በ1998 ዓ.ም በእነ ኢንጂነር ኃይሉ ሻውል መዝገብ እንደተደረገው፣ ይህን መዝገብ ብቻ የሚመለከት ችሎት እንዲቋቋም፣

ለ. እንደገና፣ በ1998 ዓ.ም በእነ ኢንጂነር ኃይሉ ሻውል መዝገብ እንደተደረገው ጉዳዩ በየእለቱ በተከታታይ እንዲታይ፣

ሐ. በምርጫው የሚሳተፉ እጩዎች ምዝገባ ከመጀመሩ በፊት በመዝገቡ ላይ የመጨረሻ ውሳኔ መሰጠት እንዳለበት አሳስበናል፡፡

በዚህም መሠረት፣ ጥቅምት 12 ቀን 2013 ዓ.ም በነበረን ቀጠሮ ምላሽ እናገኛለን ብለን ጠብቀን የነበረ ቢሆንም፣ በዕለቱ ተግባራዊ ምላሽ ሳናገኝ ቀርተናል፡፡ ችሎቱ በሰጠን የቃል ምላሽም፣ ጥያቄያችንን ለበላይ አካል አቅርቦ ምላሽ እንዳልተሰጠው አስረድቶናል፡፡

ስለዚህም፣ አሁን ጥያቄያችንን የበላይ ስለሆናችሁ  የህግ ተርጓሚው አካላት እያቀረብን ሲሆን፣ በሀገራችን በቀጣይነት የሚደረገው ምርጫ ፍትሃዊና ሰላማዊ እንዲሆን በዚህ በኩል አስተዋፅኦ እንድታደርጉ በትህትና እንጠይቃለን፡፡

ከሠላምታ ጋር!

1ኛ. ተከሳሽ እስክንድር ነጋ

2ኛ. ተከሳሽ ስንታየሁ ቸኮል

3ኛ. ተከሳሽ ቀለብ ስዩም

4ኛ. ተከሳሽ አስካለ ደምሌ

ግልባጭ፡-

ለኢትዮጵያ፡- ምርጫ ቦርድ

ለኢትዮጵያ፡- ሰብአዊ መብት ኮሚሽን

 

ታሪክን ሽሽት (የችሎት ማስታወሻ)

ታህሳስ 16 በዋለው ችሎት ተከሳሾችን እና ዳኞችን ካላግባቡ ጉዳዮች መካከል አንዱ የመረጃ ስነዳ ጉዳይ ነው፡፡ ተከሳሾች ከእምነት ክህደት ቃላቸው ጋር የሚሰጡት ማብራሪያ በድምፅ ተቀርፆ ቢቀመጥላቸው ደስተኛ እንደሚሆኑ ገልፀው ይህ እንኳን ባይሆን የሚናገሩት ከአራት መስመር የእጅ ፅሁፍ ያልበለጠ ኃሳብ ቃል በቃል እንዲፃፍላቸው ጠየቁ፡፡ ከሦስቱ ዳኞች መካከል ቃላቸውን እየመዘገቡ የነበሩት የግራ ዳኛዋ በዚህ ተስማምተዋል፡፡ ሆኖም በአፍታ ልዩነት ምላሳቸው ታጠፈ፡፡ የሃሳቡን ጭብጥ እንጂ እያንዳዱን ቃል እንደማይመዘግቡ ተናገሩ፡፡ ንግግሩ ቃል በቃል ወረቀት ላይ እንዲሰፍርለት በተለይ እስክንድር ነጋ በብርቱ ተሟገተ፡፡ ‹‹የምናገረው ዝም ብሎ የሕግ ጉዳይ ብቻ አይደለም፡፡ እንደማንኛውም ወንጀል የሚታይ አይደለም፡፡ የታሪክ ጉዳይ ነው፡፡ የፖለቲካ ጉዳይ ነው፡፡ ቃል በቃል ይመዝገብልኝ፡፡›› በማለት ጠየቀ፡፡ እንዲመዘገብለት የፈለገው ንግግር ቃል በቃል የሚከተለው ነው፡-

‹‹ሁሉም በሚያየው ሁሉም በሚሰማው በእግዚዓብሔር ስም እኔ ንፁህ ነኝ፡፡ አብረውኝ የተከሰሱትም ንፁህ ናቸው፡፡ ይህ ክስ አንድም እውነት የለበትም፡፡ በታሪክ ፊት እያደረ እውነቱ ግልፅ ይሆናል፡፡››

ይህንን የሰሙት ዳኛዋ ‹‹የወንጀል ድርጊቱን አልፈጸምኩም፡፡ እውነቱ እያደረ ግልፅ ይሆናል›› ብለው መዘገቡት፡፡ ዳኞች ጉዳዩን ቃል በቃል ለመመዝገብ ያልቻሉት በሰዓት ማነስ ምክንያት እንደሆነ ተናግረዋል፡፡ አለመመዝገብ ብቻ ሳይሆን ተከሳሾች ቅሬታቸውን በደብዳቤ እንዲያሳውቁ በማዘዘ በግልፅ ችሎት እንዳይናገሩም ተደጋጋሚ ክልከላዎች ተደርገዋል፡፡ ይህም በግልፅ ችሎት የሚታደሙት ጥቂት ሰዎችም ሆኑ በመገናኛ ብዙሃን በኩል ዘገባው የሚደርሰው ሕዝብ ትክክለኛ መረጃ እንዳይኖረውና ነገ የታሪክ ምስክር እንዳይሆን የሚደረግ ጥረት ነው፡፡ በችሎቱ ላይ ፀጉሩን እየፈረፈረ ክስ የሚቀያይረው ጎረምሳ ዐቃቤ ሕግም ክሱን ከታሪክና ከፖለቲካ ለማራቅ ይሞክራል፡፡ ከመደበኛ ክሶች ጋር ለማመሳሰል ላይ ታች ይላል፡፡

ተከሳሾች በሚናገሩበት ጊዜ ዳኞች ቶሎ ቶሎ ጣልቃ እየገቡ ያስቆሟቸዋል፡፡ ስንታየሁ ቸኮል ቀጠለ፡- ‹‹<አሥራ አራት ሰዎች ገድላችኋል> ተብለን ነው የተከሰስነው፡፡ እኛ ተፈናቅለው፣ በኮሮና ምክንያት ተቸግረው 14 ሰዎች መግበናል፡፡ አልገደልንም፡፡ ይህንን ሕዝብ ያውቀዋል፡፡ ፍፁም የሀሰት ክስ ነው የቀረበብን፡፡ ውስጣችን ተቃጥሏል፡፡ እኛ ውስጥ እውነት አለ፡፡ ይህንን ስሙን ነው ያልነው፡፡ ከለበስነው ቢጫ ልብስ (የእስር ቤቱ) ጀርባ እውነት አለ፡፡ ልንደመጥ ይገባል፡፡ ፍርድ ቤቱ ሊያስቆመን አይገባም፡፡ ማንንም አልበደልንም፡፡ ዐቃቤ ሕግ ያቀረበው ክስ ፖለቲካዊ ነው፡፡ ስለዚህ ፖለቲካዊ ቋንቋ ተጠቅመን ነው የምንከራከረው፡፡ የእኛ ክስ ከእኛ መዝገብ በተጨማሪ አጠቃላይ የፍትሕ ስርዓቱን ያሳያል፡፡ በሚቀጥለው ምርጫ ተሳትፈን ሕዝብን የሥልጣን ባለቤት ማድረግ እንፈልጋለን፡፡ አሁን በስልጣን ላይ ያለው ተረኛው ኃይል በሀሰት ክስ ነው ያሰረን፡፡ ባልደራስ በምርጫ እንዳይሳተፍ ማሰር አይቻልም፡፡ ሕዝብ ማሰር አይቻልም›› የምሀል ዳኛው አቋረጠው፡፡ ሲናገር ለስ እራሱ ብቻ መሆን እንዳለበት እና ‹እኛ› እያለ በጋራ መደብ መግለፅ እንደሌለበት ምክር ይሁን ማስጠንቀቂያ ያልለየለት ሃሳብ ተናግረው ዳኞች ወደ ሦስተኛዋ ተከሳሽ አስቴር ስዩም አልፈዋል፡፡ ‹አስቴር› የትግል ስሟ ነው፡፡ ዶሴው የሚጠራት ግን ቀለብ ስዩም በሚለው ነው፡፡

ለመንፈቅ ያህል በጀርባ ህመም እየተሰቃየች እንደሆነ ተናግራ ህክምና እንድታገኝ ፍርድ ቤቱን ጠየቀች፡፡ ይህ ባለፉት ችሎቶችም ጭምር ስታቀርበው የነበረ ጥያቄ ነው፡፡ ቀለብ ስዩም ሕፃን ልጇን ባለቤቷ መምህር በለጠ ጌትነት ወህኒ ቤት እያመላለሰ የምታጠባ እናት ነች፡፡ የወንጀል ድርጊቱን እንዳልፈፀመች ስታብራራ ከተናገረችው ውስጥ የሚከተለው ይገኝበታል፡-

‹‹ባለፈው ስርዓት (ሕወሓት/ኢሕአዴግ ማለቷ ነው) የሰው ወይም የሰነድ ማስረጃ ሳይቀርብብኝ በምሀል ዳኛ ‹‹ጠርጥረንሻል›› ተብዬ ተቀጥቻለሁ፡፡ ይሄን በሚመስል ችሎት ተዳኝተናል፡፡ ዳኞች ከስርዓቱ ተፅዕኖ ነፃ ሆናችሁ እንድትዳኙን እጠይቃለሁ፡፡ ችሎቱ ላይ አድሏዊነት አይቻለሁ፡፡ እኛ ተከሳሾች ነን፡፡ በልባችን ውስጥ መድሃኒያለም የሚያውቃት እውነት አለች፡፡ ለዐቃቤ ሕግ እና ለእኛ እኩል እድል እየተሰጠን አይደለም፡፡ በአጠቃላይ ክሱ የሀሰት ነው፡፡ ፖለቲካዊ ነው፡፡ በማንነታችን ላይ የተደረገ የብሔር ክስ ነው፡፡ የbalance ክስ ነው፡፡ (እዚህ ላይ ‹ጃዋር ታስሮ እስክንድር አይቀርም› በሚል የደቦ ሚዛንን ለማስጠበቅ የተፈፀመ ክስ እንደሆነ መጠቆሟ ነው) እምነትን የካደ ክስ ነው፡፡ ሰብዓዊነትን የጣሰ ነው፡፡ የፍትሕ ስርዓቱን ያዋረደ ክስ ነው፡፡ ዐቃቤ ሕግ የስርዓቱ ቡችላ ነው፡፡››

ዐቃቤ ሕግ ሥነ ስርዓት ሲል፤ በተመሳሳይ ቅፅበት ዳኞች ንግግሯን እንድታቆም አዘዙ፡፡ ታላቁን ሕግ ጥሰው ንፁሃንን በሀሰት ክስ የዶሮ ማደሪያ በሚመስል እስር ቤት ውስጥ እያሰቃዩ ለትንሽዬ የችሎት ስነ ስርዓት መቆርቆር አስቂኝ ነው፡፡ ዛፉን ከግንዱ ቆርጠው ከጣሉት በኋላ ለቅጠል ደህንነት እንደ መጨነቅ ይቆጠራል፡፡ ዐቃቤ ሕግን ‹‹የሥርዓቱ ቡችላ›› ማለት ተገቢ እንዳልሆነ ዳኞች እያብራሩ ነው፡፡ እስክንድር በተራው ዳኛውን አቋረጠው፡፡ ‹‹የተከበረው ፍርድ ቤት አባባሉ እኛም የምንጋራው ነው፡፡ ‹ዐቃቤ ሕግ የሥርዓቱ ቡችላ ነው› ማለት እውነት መናገር እንጂ ዘለፋ አይደለም፡፡›› በዚህ ጊዜ ስንታየሁ ቸኮልና አስካለ ደምሌ ‹‹የጋራ አቋማችን ነው፡፡ ቃሉ ይገልፀዋል›› በማለት በጋራ ተናገሩ፡፡

በዚህ ንግግራቸው እንዲቀጡለት ዐቃቤ ሕግ ዳኞችን ጠየቀ፡፡ ከተከሳሾች በላይ ራሳቸው እውነቱን ከነማስረጃው እያወቁ ንፁሃንን በሃሰት ክስ የሚያሰቃዩ ወንጀለኞች መሆናቸውን የሚያውቁት ዳኞች ጉዳዩን በይቅርታ አለፉት፡፡

‹‹የመንግሥት ሠራተኛ ሆኜ ሥሠራ በጥቅማጥቅም ደልለው ኃሳቤን ለማስጣል ሞክረዋል፡፡ ከደረጃየ በላይ አመራር እንድሆን እና የጋራ መኖሪያ ቤት እንዲሰጠኝ ተጠይቄያለሁ፡፡ በኋላም ‹መንግሥት ደሞዝ እየከፈለሽ መንግሥትን መቃወም አትችዪም› ተብያለሁ፡፡ ሦስት ጊዜ ታግቻለሁ፡፡ ደህንነቶች (መንግሥታዊ ሰላዮች ማለቷ ነው)  አስፈራርተውኛል፡፡  በተመሳሳይ የመንግሥት የወረዳ አመራሮች አስፈራርተውኛል፡፡ ለችሎቱ መናገር የማልችላቸው ወንጀሎች ተፈፅመውብኛል፡፡ ‹የአማራ እና የደቡብ ተወላጆችን አንድ ላይ አደራጅተሻል› ተብየ ነው የተወነጀልኩት፡፡ የደህንነቶችን ስልክ ቁጥር መዝግቤ ይዣለሁ ማንነታቸው ይጣራልኝ፡፡›› አለች አስካለ ደምሌ፡፡

ተከሳሾች የእምነት ክህደት ቃላቸውን ሰጥተው ካጠናቀቁ በኋላ ችሎቱ 3 ወር ከ15 ቀናት ጉዳዩን ወደ ኋላ አስረዝሞ ለመጋቢት 29 ቀን 2013 ዓ.ም. ተለዋጭ ቀጠሮ ሰጠ፡፡ ይህ ራሱን ችሎ ከፍርድ የሚስተካከል ቀጠሮ ያላግባብ የተራዘመ መሆኑን በመጥቀስ እንዲያጥርላቸው ተከሳሾች ጠየቁ፡፡ ይህ ከጉርምርምታም አልፎ ስርዓቱን የጠበቀ ቢሆንም እንኳን የችሎቱን ድባብ ለብ አደረገው፡፡  ከዚህ ጊዜ ጀምሮ ጠባቧ የችሎት አዳራሽ ውስጥ የተገኘው ታዳሚ በግዳጅ እንዲወጣ ተደረገ፡፡ ወታደሮች በአዳራሹ የነበሩ ጋዜጠኞችን ጭምር አስወጡ፡፡ ሌሎች ተጨማሪ ወታደሮች ገቡ፡፡ ‹ቡችላ› የሚለው ቃል ለመጀመሪያ ጊዜ ችሎቱ ላይ እንደተሰማ ጀምሮ የተለያየ መለዮ የለበሱ ወታደሮች ቁጥር እየበዛ ነበር፡፡ አንዳንድ ጊዜ ተከሳሾች፣ ዳኞች፣ ጠበቆች፣ ዐቃቤ ሕግ እና ታዳሚዎች እርስ በእርስ እንዳይተያዩም የወታደሮች ብዛት እንቅፋት ሆኖ ነበር፡፡ ዳኞች ሳይቀር ተከሳሾች በሚናገሩበት ጊዜ ፊት ለፊት እንዳይተያዩ እየከለሏቸው ወታደሮችን ‹ዞር በሉ› ሲሉ ሰምቻለሁ፡፡ እኔም በበኩሌ የሚናገሩትን እያዳመጥኩ የማስታወሻ ደብተሬ ላይ ከመፃፍ በቀር ለማየት ተቸግሬ ነበር፡፡ ከአጠገቤ ቁመውና ተቀምጠው የምፅፈውን እየተከተሉ የሚያነቡ ፖሊሶች እንደነበሩ ደርሸበታለሁ፡፡

በዚህ ሁኔታ ከሌሎች ጋዜጠኞችና ታዳሚያን ጋር አዳራሹን ለቅቄ እንድወጣ ሁለት ወታደሮች እየተፈራረቁ ቢያዝዙኝም ታሪካዊ ክስተቱን የመዘገብ ግዴታ እንዳለብኝ አስረድቼ በሙግት ሳልወጣ ቀረሁ፡፡ ቀጥሎ የሆነው ሁሉ በዝግ ችሎት ነበር፡፡ ታዳሚውና ጋዜጠኞች እንዳይወጡ እነእስክንድር አጥብቀው ቢጠይቁም በታጣቂ ኃይል ሁሉም ወጥተዋል፡፡ ‹‹መታፈናችንን ለኢትዮጵያ ሕዝብ ንገሩ›› እያሉ ታዳሚውን ተሰናበቱ፡፡ ይህንን ሲሉ እስክንድር ነጋን ጨምሮ ሁሉም ተከሳሾች ጀርባቸውን ለዳኞች ሰጥተው ሙሉ በሙሉ ወደ ታዳሚው ዙረው ነበር፡፡ የታዳሚያኑም ሆኑ የእነርሱ እጆች ከፍ ብለው የመኪና መስታውት እንደሚወለውል አይነት እየተወዛወዙ ነው፡፡

‹‹እባካችሁ የተሰጠው የጊዜ ቀጠሮ በጣም ረዝሞብናል፡፡ እባካችሁ ስሙን፡፡ በምርጫ መሳተፍ አለብን›› አለ እስክንድር፡፡ ሌሎች ተከሳሾችም እየተቀባበሉ ለምርጫ መዘጋጀት እንዳለባቸው ጠቅሰው አፋጣኝ ፍትሕ እንዲሰጣቸው ጠየቁ፡፡ የዳኛ እና የጊዜ እጥረት እንዳለበት ጠቅሶ ችሎቱ ይህንን አለመቀበሉን አረዳቸው፡፡

‹‹እናንተም የመንግሥት አገልጋዮች ናችሁ፡፡ ተለጣፊዎች ናችሁ፡፡ በዚህ ችሎት መዳኘት በራሱ ያሳፍራል›› አለቻቸው አስካለ ደምሌ፡፡ በዚህ ጊዜ በንግግሯ የተበሳጩት ወታደሮች ችሎቱ ሳይዘጋ እጆቻቸውን በካቴና አስረው ከአዳራሹ አስወጧቸው፡፡ በር ላይ ከደረሱ በኋላ ዳኞች እንደገና እንዲመልሷቸው አዘዙ፡፡ ‹‹ከእኛ ጋር ያልተግባባነው በቀጠሮ ነው አይደል? ለሌሎቻችሁ ክብር ሲባል ይቅርታ አድርገንልሻል›› ብለው የመሀል ዳኛው የዕለቱን ችሎት ዘጉት፡፡ ይህንን ሲሉ ‹ከእናንተ ጋር የፖለቲካ አመለካከት ልዩነት የለንም፡፡ ትክክል ናችሁ፡፡ መሰረታዊ ሀሳባችሁ ስህተት የለበትም› ለማለት የፈለጉ ይመስለኛል፡፡ ይህንን  በግልፅ ለመናገር የተቀመጡበት ወንበር ባይፈቅድላቸውም እንኳን ልቦናቸው እንደሚያንሰላስለው መገመት አይከብድም፡፡ እነእስክንድር እንደገና እጆቻቸውን በካቴና ታሠሩ፡፡ ቀደም ብሎ ከአዳራሽ የተባረረው ታዳሚ በር ላይ በጭብጨባ ተቀበላቸው፡፡ ጭብጨባው ሳይቋረጥ በመስታዎት ፋንታ በፍርግርግ ብረት የተሸበበው አውቶብስ ውስጥ በወጠምሻ ወታደሮች ታጅበው ገቡ፡፡  

 

መንግሥታዊው የገዳ ወረራ (ስንታየሁ ቸኮል፤ ከቃሊቲ ወህኒ ቤት (የህሊና እስረኛ))

 (በተለይ ለኢትዮ 360 ሚዲያ የተላከ)

ሰኔ 22 ቀን 2012 ዓ.ም. የአክቲቪስት አጫሉ ሁንዴሳ ግድያ ከተሰማ በኋላ በሀገራችን ኢትዮጵያ በርካታ ችግሮች ተከስተዋለል፡፡ አምባገነኑ የአብይ አሕመድ ቡድን ክስተቱን ተገዳዳሪዎቹን ሁሉ የመደብደቢያ ዱላ አድርጎታል፡፡ ባለፉት ሰባት ወራት ፖለቲካዊ አሰላለፎች እንዳልነበር ሆነዋል፡፡ ዜጎች ማሕበራዊ ረፍት አጥተዋል፡፡ ዐማራዎች በየቦታው እየታደኑ እንደ አውሬ መታረዳቸው እጅግ ተባብሶ ቀጥሏል፡፡ መንግሥት ተብየውም አራጅ፤ አሳራጅ ሆኗል፡፡ ፖለቲካዊ ውጥንቅጡ በዐማራ ደም እየዋኘ ወደ 6ኛው ሀገራዊ ምርጫ እየቀዘፈ ነው፡፡ መሄጃ ያጣ የስቃይ ድምፅ ከጉራ ፈረዳ እስከ ምዕራብ ኦሮሚያ፣ ከመተከል እስከ ማይካድራ ይጮሃል፡፡ የሚሰማው ግን የለም፡፡ አብረን እንዳንጮህ እንኳን መጮህም ተነፍገን በእስር ቤት እንገኛለን፡፡ ለዚህም ነው በአምባገነኖች የሀሰት ክስ ሀቀኛ ታጋዮች ከታሠርንበት ቃሊቲ ወህኒ ቤት ውስጥ ታጉሬ ይህንን ትንሽ መጣጥፍ የምሞነጫጭረው፡፡ ብቻ ዐማራነት የሞት ቅጣት የሚያስከትል ያልተፃፈ ወንጀል ሆኗል፡፡ ደሙ እንደ አባይ ወንዝ ሀገር አቋራጭ ማዕበል ሆኗል፡፡ ከኢትዮጵያም አልፎ እንደ አባይ ግብፅ፤ ካይሮ ድረስ ይፈሳል፡፡ አረንጓዴ፣ ቢጫ፣ ቀይ ሰንደቃላማ ይዘው የተገኙ ዐማራዎች በዚያው በሚገኙ የኦነግ የመገንጠል አርማ አውለብላቢዎች ጥቃት ተፈፅሞባቸዋል፡፡ ይህ ሕዝብ ድሮም ኢትዮጵያን ያቆማት ደሙን አፍስሶ እንደነበር ስናስታውስ ታሪክ ያፅናናል፡፡ የኢትዮጵያ የድል ችቦ የሚያበራበት ጊዜ ቅርብ እንደሆነም አምናለሁ፡፡ በዐማራ ላይ እየደረሰ ያለው የጅምላ ጭፍጨፋ አዋጅ የኦሕዴድ/ብልፅግና የትግል አልፋና ኦሜጋ ነው፡፡ የአዋጁ ደራሲ ጃዋር መሐመድ ብሎም አስፈፃሚዎቹ ሽመልስ አብዲሳ፣ ታከለ ኡማ እና አዳነች አቤቤም የኦሕዴድ/ብልፅግና ቼጉቬራዎች ናቸው፡፡ ታላቁ የጥቃት ማዕከላቸው ደግሞ አዲስ አበባ ነው፡፡

 

                     አዲስ አበባን እንደ ወልቃይት

 

የወያኔ የጥቃት እና የጥቅል ጥቅም (ልዩ ጥቅም ገላጭ አልመሰለኝም) ማዕከላት ወልቃይት፣ ጠለምት እና ራያ ነበሩ፡፡ መተከል፣ ደራ እና አዲስ አበባም የውክልና ማጥቂያ ማዕከላቱ ነበሩ፡፡ ተረኛው ኦሕዴድ/ብልፅግና ደግሞ አዲስ አበባን የጥቅል ጥቅም ማዕከሉ፣  ቤንሻንጉል/ጉምዝን ደግሞ የውክልና ማጥቂያ ማዕከሉ አድርጎ ቀጥሏል፡፡ በሀገራችን ጫፍና ጫፍ የሚሰሙ የጭፍጨፋ መርዶዎችን ወደ መሀል ሀገር ለመሳብ እየሠራ ነው፡፡ አዲስ አበባን እንደ ትንሽ ጉብታ ንዶ ለማፍረስ ተነስቷል፡፡ ይህንንም የሚያደርገው በወያኔ የከፋፍለህ ግዛ ሕገ መንግሥታዊ ቅሪት ነው፡፡ አዲስ አበባን የቀውስ ሜዳ  ለማድረግ እየሠራ ነው፡፡ ባልደራስን ጨምሮ የሕጋዊ ድርጅቶችን ስም በመጥቀስ ፎቶ ግራፍ አሸክሞ በሰላማዊ ሰልፍ ጠባ ጫሪ መፈክሮችን አሰምቷል፡፡ በተደጋጋሚ ከድንጋይ እስከ ቦምብ የታጠቁ መንጋዎቹን በአዲስ አበባ ላይ አዝምቷል፡፡ በጥባጭ ሰራዊት የሚመለምለውም መሬትና ገንዘብ በሕገ ወጥ ሂደት በማደል ነው፡፡ ይህንን ለማሳካት ባለፉት ሦስት ዓመታት ሠርቷል፡፡ በታከለ ኡማ የተጀመረው የሃብት ሽግግር በአዳነች አቤቤ ቀጥሏል፡፡ መንግሥታዊ የመሬት ወረራ እና ንጥቂያው ተፋፍሞ አዲስ አበባን ለማጥፋት እየተሠራበት እንደሆነ የራሱ የመንግሥት ሪፖርቶች ብቻ በቂ ናቸው፡፡ ይህም ለዘመናት ተቋርጦ የነበረው የገዳ ወረራ ዳግም የተጀመረበት ምዕራፍ ተደርጎ ሊወሰድ ይችላል፡፡ የዚህ ወረራ ማጠንጠኛዋ ደግሞ አዲስ አበባ ሆናለች፡፡ ለዚህም ነው ከተማዋ ራስ ገዝ (አድያም) መሆን አለባት የምንለው፡፡

ገዥው ኦሕዴድም ሆነ እንደ አሸን የፈሉት ተቃዋሚ የኦሮሞ ብሔርተኛ ድርጅቶች በአዲስ አበባ ላይ ተመሳሳይ አቋም አላቸው፡፡ ለዘመናት የተቃቡትን ደም ረስተው የሚተሸሹት ስለ አዲስ አበባ ሲያስቡ ነው፡፡ ሁሉም ከተማዋን ለመዋጥ ይጎመጃሉ፡፡ ለዚህም አምስቱ የኦሮሞ ድርጅቶች በኢሊሌ ሆቴል በበቀለ ገርባ አንደበት ያነበቡትን መግለጫ ማስታወሱ በቂ ነው፡፡ ይህንን ከተማ አፍራሽ የፖለቲካ አሰላለፍ ገዥው ፓርቲም ሲቀላቀል በታከለ ኡማ ‹አዲስ አበባ የኦሮሞ የትግል ማዕከል ነች› የሚል መፈክር ታጅቦ ነው፡፡ በቀድሞዎቹ የመዲናዋ ግዛቶች ማለትም በቡራዩ፣ በለገጣፎ እና በሱልልታ ብሎም  በገላን፣ በቱሉ ዲምቱ በኮዬፈጨ እና በሌሎችም የአዲስ አበባ አካባቢዎች የተፈፀሙ አረመኔያዊ ድርጊቶች ለውጥ ተብየው ከሩቅ የሚለይባቸው ቀለሞቹ ናቸው፡፡  

 የሚቀያየሩ ከንቲባዎችም የከተማዋ የሕዝብ ተወካዮች ምክር ቤት አባል ሳይሆኑ ሕግ እየተጣሰ እና አዲስ አፓርታይዳዊ ማሻሻያ እየተደረገ የመጡ ናቸው፡፡ ኦህዴድ/ብልፅግና የቀድሞውን  ምክትል ከንቲባ ታከለ ኡማን ወደ ስልጣን ሲያመጣ ድርጅቱ ባስቀመጠላቸው ርዕይ አፈፃፀሙን እንዲተገብሩ ነበር፡፡ አቶ ታከለ ተሳካላቸው ወይስ አልተተሳካ ለሚለው ክርክር በዚህ ፁሁፍ ለመዳሰስ ከጊዜ አኳያ አልፈዋለሁ፡፡ የአዲስ አበባ ነዋሪ ላይ የተጫኑት ታከለ ኡማ አዲስ አበባን የኦህዴድ እስር ቤት ለማድረግ ብሎም የሕዝብ ስብጥር ለውጥ ለማምጣት ብዙ ጥረዋል፡፡ በድርጅት መዋቅር የታገዘ ስራ ተከናውኗል፡፡ የሕዝብ ስብጥር ቅየራውን የወቅቱ የኦሮሚያ ርዕሰ መስተዳድር ለማ መገርሳ በአዲስ አበባ ውስጥ ጣልቃ ገብተው በነሲቡ አቀላጥፈውታል፡፡ ከሶማሌ ‹ክልል› ‹ተፈናቀሉ› ተብለው የመጡ ሰባት መቶ ሺህ ኦሮሞዎች እውን ተፈናቅለው ሳይሆን በለማ ትዕዛዝ ከሰላማዊ ኑሯቸው ተነስተው የመጡ ናቸው፡፡ ይህንን ጉዳዩ በቀጥታ ከሚመለከታቸው ሰዎች አረጋግጠናል፡፡ እንቅስቃሴውም የገዳን ወረራ በአዲስ አበባ ለማስጀመር ያለመ ነበር፡፡ ለዚህም ነው በአንድ አካባቢ ብቻ ራሱን የቻለ ዘመናዊ የጋራ መኖሪያ መንገር በመንግሥት ተገንብቶ የተሰጣቸው፡፡ ዜጎች እውን ተፈናቅለው ከሆነ በዚያው በሶማሌ ‹ክልል› ቦታ የመስጠት ፍላጎት እንደነበራቸው የወቅቱ የአካባቢው ገዥዎች ጠይቀው እንደነበርም ግልፅ ነው፡፡ ይህ አዲስ አበባን ከመውረርም በተጨማሪ የሶማሌን ማሕበረሰብ ያለወንጀሉ ደም የመቀባት አባዜ ነው፡፡ በዚህ ከአዲስ አበባ ሕዝብ ያልተናነሰ የሶማሌም ሕዝብ ተጎጂ ነው፡፡ ሕዝቡ አሁንም ይቅርታ ሊጠየቅና እውነታው ግልፅ ሊሆን ይገባል፡፡

 

                             የገዳ ወረራ

በኦህዴድ በጠላትነት የተፈራጀና መጤ የተባለ ሕዝብ በየሰበቡ ተፈናቅሏል፡፡ እየተፈናቀለም ነው፡፡ በአንፃሩ የልማት ተነሽ አርሶ አደር ልጆች በሚል ሽፋን ኦሮሙማን ለመትከል እየተሠራ ይገኛል፡፡ ከልዩ ጥቅም በላይ የባለቤትነት ጥያቄው የህግ መሰረት እንዲኖረው ተረኝነት ያልተፃፈ ህግ እንዲሆን አቅም በፈቀደላቸው መጠን እየሠሩ መሆኑ እሙን ነው፡፡  በአዲስ አበባ የተፈፀሙ አሁንም እየተሰራበት የሚገኘው የድሆች መፈናቀል ቤት ፈረሳ ከተማዋን በማስዋብ ስም ቀጥሏል፡፡  የቅርስ ፈረሳውም ሌላ ዘመቻ ነው፡፡  የጋራ መኖሪያ ቤቶችን ከድሆች ነጥቆ ለወቅቱ የኦህዴድ ባለስልጣናት ማደል፣ ለተመረጡ ቄሮዎች ማከፋፈል የወረራው መገለጫዎች ናቸው፡፡ የስርዓቱ ዐይን አውጣነት የሚታየውም እዚህ ላይ ነው፡፡ የባልደራስ አመራሮች እስር ቤት የተወረወርነው የዚህ ወረራ ተከላካዮች በመሆናችን ነው፡፡

ድሃው ሕዝብ ከዕለት ጉርሱ ቆጥቦ የሠራው የጋራ መኖሪያ ቤት  ለተመረጡ ግለሰቦች ሲታደል ከመቃወም የዘለለ የዳሰሳ ጥናቶች ተደርገው በርካታ መረጃዎችን በመሰብሰብ ላይ በነበርንበት ወቅት ወደ እስር ቤት ብንመጣም እውነታው ግን ሊታሰር አልቻለም፡፡ በታከለ ኡማ መንበር የተተኩት የኦህዴድ ከንቲባ አዳነች አበቤ በ18/06/13 በኮተቤ ሜትሮፖሊቲያን ዩኒቨርሲቲ በባለሙያዎች ‹አስጠናሁ› ባሉት እና ስም ባወጡለት ዘረፋ 2695 የጋራ መኖሪያ ቤቶች በውቅቱ ዘራፊዎች እንደተያዙ አረጋግጠዋል፡፡ ለዚህ ንጥቂያ ተጠያቂ ያደረጉት የወቅቱ አመራሮችን ነው፡፡ ኦሕዴድ  ሌባም፣ ከሳሽም፣ አጣሪም፣ ፈራጅም ራሱ የሆነበት ገጠመኝ፡፡

አቶ ታከለ ኡማ ከሓላፊነታቸው ከተነሱ በኋላ ለሪፖርተር ጋዜጣ በሰጡት ቃለ መጠይቅ 21 ሺህ የጋራ መኖሪያ ቤቶችን ለኦሮሞ ተወላጆች ማደላቸውን በኩራት ተናግረዋል፡፡ እቅዳቸው ለ65 ሺህ የኦሮሞዎች ገበሬዎች ማደል እንደነበርም ጨምረዋል፡፡ ታከለ እና የኦሕዴድ ጓዶቻቸው ራሳቸው ባመኑት መሠረት ቢያንስ በዚህ ወንጀል መጠየቅ ነበረባቸው፡፡ አሁንም ሊጠየቁ ይገባል፡፡ ፍርዱን ለታሪክ መተው ይሻላል፡፡ በአዳነች አቤቤ ሪፖርት መሠረት እንኳን ከጋራ መኖሪያ ቤቶች መካከል 5 ሺህ ያህሉ ለመንግሥት አመራሮች ብቻ ነው የተሰጡት፡፡ ይህ መንግሥታዊ ውንብድና ነው፡፡ ለየትኞቹ አመራሮች እንደተሰጠም ስም ተጠቅሶ መብራራት አለበት፡፡ ደላሎቹ እነማን እንደሆኑም ሪፖርቱ ምላሽ ሊሰጥ ይገባል፡፡  ይህ ብቻ ሳይሆን ቤቶቹን ሊመልሱ እና በሂደቱ ተሳታፊ የሆኑ ሁሉ በሕግ ሊጠየቁ ይገባል፡፡

በአዲስ አበባ የሚደረገው የኦህዴድ መቆሚያ ያጣ ተረኝነት ድርጅቱ ከምርጫ ይልቅ ለውጊያ የተዘጋጀ በሚመስልበት በአሁኑ ጊዜ ፖለቲካው እንዳይረጋጋ አድርጎታል፡፡ ባለመረጋጋቱ ውስጥ ደግሞ የገዳ መንግሥታዊ ወረራ እየተስፋፋ ነው፡፡ በአዲስ አበባ እና በቤንሻንጉል ጉምዝ እየተሰጠ ያለው የኦሮምኛ ትምህርትም የወረራው መገለጫ ተደርጎ ቢወሰድ ስህተት አይሆንም፡፡ ደቡብ ኢትዮጵያን የመተልተሉ እንቅስቃሴ ለዚህ ማስፈፀሚያ ስልት የተቀየሰ ነው፡፡

                   

                          መጪው ምርጫና አዲስ አበባ

 

የአዲስ አበባ ለአመታት የተወሳሰቡ ችግሮችና አስተዳድራዊ ጥያቄዎቿ በመጭው ምርጫ መልስ ያገኛሉ ብየ አስባለሁ፡፡ ሕዝቡ በፌዴሬሽን ምክር ቤት የፖለቲካዊ ውክልና ጥያቄ አለው፡፡ የኑሮ ውድነት ሰቀቀን ሆኖበታል፡፡ የመኖሪያ ቤት ችግሮች፣ የሥራ አጥነት ጣጣ፣ የትራንስፖርት የትራንስፖርት ስቃይ በጥቂቱ የሚጠቀሱት ችግሮቹ ናቸው፡፡ አሁንም ችግሮቹ አድማስ አልፈው የሕልውና ጉዳይ ሆነዋል፡፡ ለዓመታት ከኖሩበት ቤታቸው ውጡ የሚባሉት፣ እላያቸው ላይ ቤታቸው የሚፈርሰው፣ ኮሽ ባለ ቁጥር ቆንጨራ የሚቃጣባቸው እና ከድንጋይ እስከ ቦምብ የሚወረወርባቸው አዲስ አበቤዎች ቀላል አይደሉም፡፡ ኗሪው የእኩል ተጠቃሚነት መብትም የለውም፡፡ ኦሮሞ ያልሆነ ሁሉ ሁለተኛ ዜጋ ሲሆን ዐማራ ደግሞ በግልፅ በጠላትነት ተፈርጆ እየተሳደደ ይገኛል፡፡

አዲስ አበባ ለዚህ መልስ የሚሰጥ አስተዳድር መሰየም ይኖርባታል፡፡ በቅርቡ ከ51 ሺህ በላይ ለጋራ መኖሪያ ቤት ዕጣ የወጣላቸው እድለኞች በህጋዊ መንገድ ተመዝግበው ከእለት ጉርስ ቆጥበው የደረሳው መኖሪያ ቤት አይናቸው እያየ ለኦህዴድ ተረኞች ሲሳይ ተደርጓል፡፡ መጭው ምርጫ ለአዲስ አበባ ወሳኝ የሚሆነውም ለዚህ ነው፡፡ ሂደትና ውጤቱንም በአይነ ቁራኛ መከታተል ያስፈልጋል፡፡

የአዲስ አበባ ነዋሪዎች በገዛ ሀገራቸው ተገፍተው ሜዳ ላይ ወድቀዋል፡፡ የቤት ተስፋቸው የቄሮ ውርስ ሆኗል፡፡ በአዲስ አበባ አስሩም ክፍል ከተሞች፣ በ116 በወረዳወችና በ817 ቀጠናዎች ባዶ መሬት በጠራራ ፀሐይ ለወራሪ ቡድን በማደል በአንድ ጀንበር ቱጃር ሀብታም ሲፈጠር እያየን ነው፡፡ ከፊሎቹም የመሬት ንግዱን አጧጡፈውታል፡፡ አዲስ አበቤ እስከ ሃያ ዓመታት የኖረበት ቤት እላዩ ላይ ሲፈርስበት ‹መጤ› እና ‹ሰፋሪ› የሚል መለዮ እየተለጠፈበትም ጭምር ነው፡፡ ይህ ችግር ተደማምሮ ነው እኛም ወደ ፓርቲ ትግል የገባነው፡፡

  እነዚህና መሰል ነገሮች እየተስፋፉ በመምጣታቸው በህዝብ እሮሮ ባልደራስ ለእውነተኛ ዴሞክራሲ ፓርቲ (ባልደራስ) ተመስርቷል፡፡ ፓርቲያችን የልዩ ጥቅም ፍላጎት ችግሮችን በመንቀስ ስርዓቱን ለማሳየት በስፋት ተንቀሳቅሷል፡፡ ለመፍትሄው ህዝቡ እንዲዘጋጅ ሃቀኛ የፖለቲካ ዝግጅት በመፍጠር ብዙ ሰርቷል፡፡ በርካታ የታሪክ አሻራዎችን አስቀምጧል፡፡ መሰረታዊ የድርጅት ግንባታን ከወቅቱ ፖለቲካዊ አክቲቭዝም ጋር በማጣጣም ህዝብን ለማንቃት ተችሏል፡፡ ይህ ተግባር በኢትዮጵያ የፓርቲ ፖለቲካ  ታሪክ ውስጥ ያልተለመደ ነው፡፡ የሕዝቡን ችግሮች አብረን በመቅመሳችንም ባልደራስ በአጭር ጊዜ ውስጥ ወደ ህዝብ ልብ እንዲገባ  አስችሎታል፡፡

የአርቲስት ሀጫሉ ሁንዴሳ ግድያን አስመልክቶ ታከለ ኡማ አዲስ አበባን ዙሪያ አስከብበው ባሰማሩት ቄሮ የጥፋት ተልዕኮ ከሽመልስ አብዲሳ ጋር ማስፈፀማቸው የአደባባይ ሚስጥር ሆኖ አልፏል፡፡ በግለሰቡ ጥያቄ ሳይኖራቸው በተለዋጭ ሹመት ሚንስትር አድገውቸ ለሌላ ዝርፊያ አመቻችተዋቸዋል፡፡ ወደ ማዕድን ሚንስትርነት በተዘዋወሩ አፍታ የክፋት ጡንቻቸውን የሚድሮክ የወርቅ ኩባንያዎች ላይ አሳርፈዋል፡፡

 ታከለ ከከንቲባነት ከተነሱ በኋላ በምክትላቸው የመጡት የኦህዴድ/ብልፅግና ቀዳማዊ እመቤት አዳነች አበቤ የድርጅታቸውን እኩይ ርዕይ እያስቀጠሉ እንደሆነ አያጠራጥርም፡፡

  ኦህዴድ ተነስቶ ኦህዴድ መጣ፡፡ አዲስ አበባ ከታከለ ኡማ ወደ አዳነች አበቤ ተሸጋገረች፡፡ በአሁኑ ወቅት በመዲናዋ እየተባባሰ ያለው የኦሮሙማ መስፋፋትና አስደንጋጭ ወረራ ቀደም ሲል የተያዘ የኦህዴድ ዘመቻ ተጠናክሮ እንደቀጠለ እንግሊዝ ኢምባሲ አካባቢ ያለው ሁኔታ ጥሩ ማሳያ ነው፡፡

በመሆኑም በሀገራችንም ሆነ በከተማችን አዲስ አበባ ትውልዱን የመታደግ ሓላፊነት  ከፊታችን እየመጣ እንደሆነ ይሰማኛል፡፡ የአዲስ አበባ ችግር የሚፈታው በማዘጋጃ ቤት ሳይሆን በ4 ኪሎ  እንደሆነ ባምንም የማዘጋጀት ቤትን 138 ወንበር መቆጣጠር የፕሮቶኮል ጉዳይ ሳይሆን የህልውና ጥያቄ መፍቻ ነው፡፡

የነዋሪው ሰላምና ደህንነት ማስጠበቂያ ነው፡፡ የዚህ ትውልድ አድዋ ነው፡፡ አዲሱ ታሪክ ብረት ማንገብ ሳይሆን  የምርጫ ሰራዊት መፍጠር ነው፡፡ ህልውናውን በካርዱ ድምፅ  በአደባባይ አብዮት ማሰጠበቅ ምርጫችን ሳይሆን ግዴታችን ጭምር ተደርጓል፡፡  ይህ ምርጫ በተለይ ለአዲስ አበቤ ነፃነቱን የሚያውጅበት ሕዝበ ውሳኔ ነው ማለት ይቻላል፡፡ ምርጫ የተበታተነ ድምጽ ይዞ እንዳይመጣ ፖለቲካዊ ቅንጅቶች ተጠናከረው ሊቀጥሉ ይገባል፡፡ ከዚህ አንፃር የአማራ ብሔራዊ ንቅናቄ ፣ ባልደራስ ለእውነተኛ ዴሞክራሲ፣ የመላው ኢትዮጵያ አንድነት ድርጅት እና የኢትዮጵያ ብሔራዊ አንድነት ፓርቲ የጀመርነው ጥምረት ይበል የሚያሰኝ ነው፡፡ ሌሎች ፓርቲዎችም ጥምረቱን ሊቀላቀሉ ይገባል፡፡

አዲስ የኃይል አስላለፍ ያስፈልጋል፡፡ በተመረጡ ሀሳቦች ላይ አብሮ መቀናጀት የህልውና ጥያቄው ቁልፍ መሳሪያ ነው፡፡ መንግሥታዊውን የገዳ ወረራ መመከቻ መንገዱም አብሮነት ነው፡፡

 

ታሪክ ምስክር ነው (ውቤ ደነቀው መኮንን)

ይላል የቀድሞ ሰው ጉድ ነው የፍንጅርቱ

እናቲቱን አንች ልጅዬውን አንቱ

ማድረጉ ሲገርመው ሌንጮን አማካሪ እስኬውን ታሳሪ

ብሎ እያጠየቀ የመሪ ተግባር ነው? ወይስ የመሰሪ?

እንግዲህ ኢትዮጵያ ጠንክረህም ታገል ከችግር ተማር

ባልደራስ መጣልህ እራሱነን ፈቶ ፍፁም ነፃወጥቶ ከህሊና እስር በፍፁም ተላቆ ከፍርሃት ቆፈን

መሪውን አድርጎ ታላቅ እስክንድር

ስንታዬው ይልሃል አሻግሮ ሲያማትር

ቀለቡን ሰንቆ ወንዝ የሚሻገር

በአስካል በፀዳሉ ተውቦ በሀገር

በትግል ጠንክሮ ምርጫን አሸንፎ  ሊያፀና ሀገር

ይመስገን ይወደስ  ከባደረቦቹ ታጋይ እስክንድር ታላቁ እስክንድር፡፡

በቦሌም በየካ ባልደራስ ለምልሟል

በአዲስ ከተማና በአራዳም አብቧል

በኮልፌ ነፋስ ስልክ በአቃቂም አሽቷል

በቂርቆስ ጉለሌ ልደታም አፍርቷል

መላው አዲስ አበቤ በሙሉ ኢትዮጵያ ከባልደራስ ጋራ ለድል ተዘጋጅቷል

ባልደራስ ሲያሸንፍ ባልደራስ ድል ሲያደርግ ሁሉም ሰላም ይሆናል፡፡

ሀገሬ ኢትዮጵያ ሞኝ ነሽ ተላለ የሞተልሺ ሳይሆን የገደለሽ በላ

እንዳይሆን ተረቱ ከአሁን በኋላ አሳልፎ የማይሰጥ ድሉንም ለሌላ

ይፈጠራል ዜጋ ይፈጠራል ወጣት በእውቀት የተሞላ ወኔው የማይላላ

የጀግና ልጅ ጀግና የእሳት ልጅ እረመጥ ይሉሀል፣ ይሉሻል ይሄ ነው

የቴዎድሮስ ልጁ የሚኒሊክ ወንድም የበላይ ዘለቀ የንጉስ ሚካኤል የአብዲሳ አጋም ነው

ለሀገሩ ሞቶ ወገኑን ያኖረው

(በካድራ ወንዝ) ሞቶ ኢትዮጵያን ያኖረው

በፍጹም አይሞትም በጭራሽ አልሞተም ምን ጊዜም ህያው ነው

ጊዜ የሚያወጣው ጊዜ የሚገልጠው ታሪክ ምስክር ነው፡፡ 

 

ታሪክ ምስክር ነው (ውቤ ደነቀው መኮንን)

ሀገር ወዳዱ የአዲስ አበባ ሕዝብ ሆይ !

ሀገር ወዳዱ የአዲስ አበባ ሕዝብ ሆይ !

,

ነገ የካቲት 14 እግሮች ሁሉ ወደ መስቀል አደባባይ ያቀናሉ !

ከተማህን የመምረጥ፣ የማስተዳደር እና የመወሰን ሥልጣንህን የማስመለስ ንቁ ተሳትፎ እንድታደርግ ባልደራስ ለእዉነተኛ ዴሞክራሲ ፓርቲ ጥሪውን ያቀርባል።

የአዲስ አበባ ህዝብ ተስፋ የሆነው ባልደራስ የ2013 ዓ.ም የምርጫ ቅስቀሳ ጀምሯል።

ሀገር ወዳዱ የአዲስ አበባ ሕዝብ ሆይ !

ሀገር ወዳዱ የአዲስ አበባ ሕዝብ ሆይ ! ነገ የካቲት 14 እግሮች ሁሉ ወደ መስቀል አደባባይ ያቀናሉ ! ከተማህን የመምረጥ፣ የማስተዳደር እና የመወሰን ሥልጣንህን የማስመለስ ንቁ ተሳትፎ እንድታደርግ ባልደራስ ለእዉነተኛ ዴሞክራሲ ፓርቲ ጥሪውን ያቀርባል።
ባልደራስ ከውጪ ሀገራት አምባሳደሮች ጋር ተወያየ

ባልደራስ ከውጪ ሀገራት አምባሳደሮች ጋር ተወያየ

የባልደራስ ለእውነተኛ ዲሞክራሲ ፓርቲ ከፍተኛ አመራሮች በአዲስ አበባ ከሚገኙ የተለያዩ የውጪ ሃገራት አምባሳደሮች ጋር በራዲሰን ብሉ ሆቴል በወቅታዊ ጉዳዬች ላይ ተወያዩ፡፡

ባልደራስ ከውጪ ሀገራት አምባሳደሮች ጋር ተወያየ መጪው ሃገር አቀፍ ምርጫ፣ የባለደራስ ፓርቲ ከፍተኛ አመራሮች ህገወጥ እስር ፣በኢትዮጵያ በተለያዩ አካባቢዎች ዜጎች በሐይማኖታቸውን እና በማንነታቸው እየተለዩ በሚደርስባቸው ሞት እና መፈናቀል በተመለከተ ፣ እንዲሁም በትግራይ ክልል የተካሄደው ጦርነት እና እሱን ተከትሎ አሁን የታዩ ችግሮችን አስመልክቶ በባልደራስ ፓርቲ ከፍተኛ አመራሮች ገለጻና ማብራሪያ ተሰጥቷል ፡፡

የባልደራስ ፓርቲ ከፍተኛ አመራሮች ከአምባሳደሮች ጋር ያደረጉት ቆይታ ሙሉ ዘገባ በቅርቡ እናቀርባለን፡፡

የባልደራስ ከፍተኛ አመራሮች እና አባላት በሰማዕታት የመታሰቢያ ሀውልት የአበባ ጉንጉን አስቀመጡ

የባልደራስ ከፍተኛ አመራሮች እና አባላት በሰማዕታት የመታሰቢያ ሀውልት የአበባ ጉንጉን አስቀመጡ

በዛሬው እለት የካቲት 12/ የሰማዕት ቀን ምክንያት በማድረግ የባልደራስ ለእውነተኛ ዲሞክራሲ ፓርቲ አመራርና አባላት ስድስት ኪሎ በሚገኘዉ የጀግኖች ሰማዕታት የመታሰቢያ ሐዉልት በመገኘት የአበባ ጉንጉን አስቀምጠዋል። በባለፈው ዓመት የባልደራስ ለእዉነተኛ ዲሞክራሲ ፓርቲ ፕሬዝደንት እስክንድር ነጋ ለጀግኖች ሰማዕት የአበባ ጉንጉን በማስቀመጥ ፤ በቦታው ለተገኙ የሚዲያ አካላት ” ባልደራ በምርጫ አሸንፎ ህዝብ እዱሉን ከሰጠዉ ይህንን ቀን እጅግ በጎላ ሁኔታ እንደሚያከብረው ገልጾ በደብረ ሊባኖስም ገዳም ለተጨፈጨፉት መነኮሳት ተመሳሳይ መታሰቢያ ሐውልት እንደሚሰራ ” የባልደራስ ለእዉነተኛ ዲሞክራሲ ፓርቲ ፕሬዝደንት አቶ እስክንድር ነጋ መግለጻቸው የሚታወሰው ነው ። ድል ለእውነተኛ ዴሞክራሲ !

Load More