Menu

balderas

About balderas

Posts by :

ለእስር ያላት ብዕር (ርብቃ አብርሐም)

ከፅንሰት እስከ ልደት፣

ከእድገት እስከ እውቀት፤

ሰብዓዊነት እኩልትን – በመርህ ብትፅፍ፣

ለአንድነት ህብረት – ቆርጣ ብትሰለፍ፣

ሌብነት ጭቆናን – አድሎን ብትፀየፍ፣

ዘረኝነት ልዩነትን – የአንባገነንን ግፍ፤

በሰላም በታገለች፣

አምርራ በሞገተች፣

ዘብጥያ ተጣለች።

ለውይይት ድርድር – የቆረበች ታጋይ፣

ለሕዝቦቿ ታማኝ – ቃል ለምድር ሰማይ፤

ስነ-ልቦናዋ – ለትውልድ የሚተርፍ፣

ሰንደቅ ያነገበች – የነፃነት ደጃፍ፣

ለፅኑ ዓላማዋ – ህሊናዋ ማይነጥፍ፣

‹ክልል› ለምኔ – ኢትዮጵያን ብታገዝፍ፤

ቃሊቲ ወረደች፣

ቂሊንጦ ታሰረች፣

ሽብርተኛ ሆነች።

ለእስር ያላት ብዕር – ምታነባ ቀለም፣

ነብስ የማታጠፋ – የማታፈስ ደም፣

የተሠራን ሀገር – ጥላቻ ማታወድም፤

ከስለት ከሹለት – ከመሳሪያም በላይ፣

በሀሳብ ንፉጋን – ተፈርታ ምትታይ፤

የሽግግር ሰነድ – አስልታ በከተበች፣

የሕገ-መንግሥቱን – ጉድለት በነቀሰች፣

አስታራቂ ሀሳብ – ለውይይት ባለች፤

በኃይል  ለመናድ – በግድ ተፈርጃ፣

ከወህኒ ቤት ዋለች – በፈሪ ጠመንጃ፣

ፍትህ ተነፈጋት – በስጋት ማስረጃ፣

ወይ የብዕር ፍርጃ፣

መጨረሻዋን እንጃ።

 

(ርብቃ አብርሐም፤ ከአውስትራሊያ)

የድንጋይ ሽበት (በቃሉ ሰው መሆን)

                                                     የድንጋይ ሽበት

እስኪ ልጠይቅሽ እውቀት ተናገሪ

ገድ ነሽ መሰጠት ወይንስ መርማሪ

ጨለማውን ገላጭ ብርሀን አብሳሪ

የተቆለፈውን ሚስጥርን ሰርሳሪ፤

በዘመን ዥረት ውስጥ ጥበብ አቀባባይ

በትናንቱ በኩል የዛሬውን ሁነሽ የነገን የምትስይ

በዘመን ፍሰት ውስጥ እየተጠራቀምሽ

ጥልመቱን ድቅድቁን ድንቁርናን ገርሳሽ

እስኪ ልጠይቅሽ እውቀት ተናገሪ

ለመድሽ ወይስ ነሳሽ ዋጥሽ ሳትመረምሪ

በመጠይቅሽ ላይ መጠይቅ ደራርበሽ

በውዝግብ ዓለም  በመንታ መንገድ ላይ ቀጠልሽ እንደዋለልሽ

ወይስ መልስ አገኘሽ ለጥያቄዎችሽ

እስኪ ልጠይቅሽ እውቀት ተናገሪ

ጉዞሽ እንዴት ነበር ቁልቁለት ነው ዳገት

ምን አትርፎ ይሆን እንዲያው ያለፍሽበት

ካለፈው ምን ወሰድሽ ምን ሰጠሸ ለመጪው

           እህህ…

እንዲም ነኝ እንዲያም ነኝ የምለውም የለኝ

የሰጡኝን ሁሉ ነሺ ተቀባይ ነኝ

በዘመን ዥረት ውስጥ ሳልጸንስ የማምጥ

ሳልጠይቅ አውቄ ሳልቀድም የምበልጥ

የሆንኩትን ሳልሆን

ያልሆንኩትን የሆንኩ

ሳልወለድ የሞትኩ

ያለስንቅ የተጓዝኩ

ሳልጀምር የደረስኩ

ብክንክን መናኛ ለመሆን ተዳረኩ፤

          ግና…..

መናኛ መሆኔ በመቸት ሲለካ

በአንድ አውድ በስዬ ባንዱ አራለው ላካ

በአንዱ ፈክቼ በሌላው ከስማለው

የሆንኩትን ልሆን እንዳልሆንኩ ሆናለው

አንድዜ አበጅጄ አንድዜ እበጃለው

በአንዱ ቤዥቼ በአንዱ እቤዣለው፤

በአንዱ ቃዥቼ በሌላ አልማለው፤

እራሴን በራሴ መዝኜ ባየውም

ፍሬ-ዘርን እንጂ ማብቀያ አይደለሁም

መብቀያዬ ሰው ነው መብሰያዬ እድሜ

የምጓዝ በቀና ስተቴን አርሜ

ለትውልድ የምተርፍ ቀስሜ አቅስሜ

ሲቃና ሰልቼ ሲታመም ታምሜ

ሲፈጥን ሰግሬ ሲደክም አዝግሜ

የተጎዳኘሁኝ በሰው ህላዌ ውስጥ

ሲጠል ሰፍፌ ሲሰምጥ የምዘቅጥ

ባንድ ጎኔ ብስል ባንደኛው ጥሬ ነኝ

ባንደኛው መንገዴ ጪንጫ ይገጥመኛል

መብቀያም ማበቢያም አልሆንሽ ይለኛል

ማለፊያም መድረሻም አልሆንሽ ይለኛል

ቆሞ ቀር ሆኖ ገትሮ ያስቀረኛል

አማትሬ እንዳላይ ገዝፎ ይከልለኛል

ነጭ ቆቡን ደፍቶ ጠቁሮ ይታየኛል

በድንጋይ ላይ በቅሎ ገዝፎ ይታየኛል

አንተ ማነህ ስለው ይሰወርብኛል

ልዳስህም ብልው አልያዝ ይለኛል

ሳይጀምር ጨርሶ ወድቆ ይጥለኛል

የመክሰሬ ሚስጥር የመናኛነቴ

ዋና መገለጫው የድንጋይ ሽበቴ

ልዩ ዋቢነቱም “መራራ ፍሬዬ  መራራ እድገቴ” 

 

(በቃሉ ሰው መሆን)

“ገበታ ለሀገር” – ከዶሮና ዓሳ ወግ አንጻር(ከማለፊያ ደርሰህ)

ዶሮና ዓሳ የቀረበ ገበታ አይተው ወግ ይጀምራሉ:: በገበታው ላይ የቀረበው ምግብ የዕንቁላል ጥብስና ዓሳ ነው:: ዶሮው “ይህ ገበታ ጣፋጭ ሆኖ ትላልቅ መሳፍንትና መኳንንት ተደስተው እንዲመገቡ ለማድረግ የእኔ አስተዋጽኦ ከፍ ያለ ነው:: ምክንያቱም እንቁላሉን የጣለችው ሚስቴ ዶሮ ነች፤ እንቁላሉ የሁለታችንም ዶሮዎች አበርክቶ ነው” ብሎ ተኩራራ::

ዓሳውም ተደንቆ “እናቱ የሞተችበትና ገበያ የሄደችበት እኩል ያለቅሳሉ” ብሎ ተረተና “ሰማህ ዶሮ፣ ገበታው ላይ ካለው ምግብ አንዱ ከዶሮ የተገኘ ዕንቁላል መሆኑ እርግጥ ነው:: ገበታው ላይ የቀረበው ዓሳ ግን እኔ ታርጄና ተበልቼ የቀረበ የእኔ አካል ነው::እኔ ነኝ” ብሎ ተናገረ:: ይህ የዶሮና የዓሳ ታሪክ በጠቅላይ ሚንስትር ዐብይ አህመድ (ዶክተር) የቀረበውን “ገበታ ለሀገር” አስታወሰኝ::

የጽሑፌ ዋና ጉዳይ ግን ጠቅላይ ሚንስትሩ በ”ገበታ ለሀገር” ለመገንባት ላቀዷቸው የወንጪ፣ የጎርጎራ እና የኮይሻ ፓርኮች ግንባታ ከመንግሥት ሠራተኞች የአንድ ወር ደመወዝ መቆረጡን የተመለከተ ነው:: በሦስቱም ቦታዎች የሚገነቡት ፓርኮች ለቱሪዝም፣ ለኢኮኖሚ፣ የተፈጥሮ ሀብትን ለመጠበቅ፣ ለዜጎች የሥራ ዕድል ለመፍጠር እና ለሌሎችም ዘርፈ ብዙ ጉዳዮች እንደሚጠቅሙ አያከራክርም:: ዋናው ቁም ነገር ግን አሁን በበርካታ ችግሮች ለምትጠበሰው ሀገራችን ከዚህ የሚቀድሙ መሠራት ያለባቸው አጣዳፊ ጉዳዮች የሉም ወይ? የሚለው ነው::

ሀገራችን በዘረኝነት መርዝ በተዘራው ጎጠኝነት የተነሳ ሰው ውሎ መግባቱ አሳሳቢ በሆነበት፣ በበርካታ የሀገራችን ክፍሎች የበረሃ አንበጣ መንጋ ሰብል በማውደም ላይ ባለበት፣ የኑሮ ውድነቱ “ውድነት” በሚለው ቃል ሳይሆን እንደ “ሰደድ በሚንበለበል እሳት” በተመሰለበት፣ የብር የመግዛት አቅም ቀኑ እንዳለፈበት እንደ ትናንት ጋዜጣ ዋጋ ባጣበትና ገበያው በሳጥናኤል የሚመራ በሚመስልበት በዚህ ወቅት “ገበታ ለሀገር” አንገብጋቢ ሀገራዊ አጀንዳ ነውን?

በኑሮ ውድነቱ በከፍተኛ ሁኔታ በመጠቃት ላይ ካሉት የኅብረተሰብ ክፍሎች ውስጥ የመንግሥት ሠራተኛው አንዱ ነው:: በማይመጥን ዝቅተኛ ደመወዝ በስቃይ የሚኖረው የመንግሥት ሠራተኛ ከዓመት ዓመት ከድኅነት ወለል በታች እየወረደ የበለጠ ድሃ እየሆነ ነው::

 “ገበታ ለሀገር” – የእናት ሀገር ጥሪ?  

ሀገር ችግር ላይ ስትወድቅ ለልጆቿ (ለዜጎቿ) የድረሱልኝ ጥሪ ታቀርባለች:: ከ42 ዓመት በፊት ሀገራችን ያጋጠማትን ክፉ ጊዜ ለአብነት ላንሳ:: ኢትዮጵያ በ1969 ዓ.ም በምስራቅ 700 ኪሎ ሜትር በደቡብ ደግሞ እስከ 300 ኪሎ ሜትር ድረስ በሱማሊያ ጦር በተወረረችና የሰሜን ተገንጣይ ኃይሎች ኤርትራን ለማስገንጠል አስመራና ዙሪያዋን በከበቡት ቀውጢና ፈታኝ ወቅት ሌተናል ኮሎኔል መንግሥቱ ኃይለ ማርያም ሚያዝያ 04 ቀን 1969 ዓ.ም “እናት ሀገርህ ተወራለች፤ ተነሥ! ታጠቅ! ዝመት!” ብለው የእናት ሀገር ጥሪ አቀረቡ:: የኢትዮጵያ ሕዝብ ጥሪውን ተቀብሎ 300 ሺ ሰው ታጠቅ ጦር ሰፈር በመክተት በአጭር ጊዜ ሰልጥኖ ሰኔ 18 ቀን 1969 ዓ.ም በአዲስ አበባ ሰልፍ አደረገ:: ወደ ጦር ግንባር ዘመተ:: አበቃላት የተባለችው ኢትዮጵያም የሱማሊያን ጦር ጠራርጋ ከድንበርዋ በማስወጣት አይበገሬነቷን አረጋገጠች:: ዕድሮች፣ የመንግሥት ሠራተኞች በአጠቃላይ ሕዝቡ ጦር ግንባር ለዘመተው ኃይል ደጀን በመሆን ባደረገው ሁለገብ ድጋፍ ያ ክፉ ቀን ታለፈ:: ኢትዮጵያም ከውርደት ዳነች:: በኋላም ከሰሜን ተገንጣይ ኃይሎች ጋር በተደረገው ረጅምና አሰልቺ ጦርነት ደርግ በአዋጅ በማስገደድ የመንግሥት ሠራተኞች የአንድ ወር ደመወዛቸውን በአንድ ዓመት ክፍያ በተደጋጋሚ ዓመታት እንዲከፍሉ አድርጓል::

 ሲያልቅ አያምር እንዲሉ ደርግም ወደቀ:: ኤርትራም ተገነጠለች:: ሕወሓትም የዘረኝነት መርዙን በሀገራችን ዘራ:: በ1983 ዓ.ም ግንቦት ወር ላይ በኢትዮጵያ፣ በሻዕቢያና በኢሕአዴግ (ሕወሓት) እና ሻዕቢያ መካከል በአሜሪካዊው ኸርማን ኮህን አደራዳሪነት የሰላም ድርድር ተካሔደ:: ደርግ አብቅቶለት ነበር:: ኸርማን ኮህን ኢሳይያሥ አፈወርቂን አሳምነው አሰብ ለኢትዮጵያ እንዲሆን ድርድር እንዲካሔድ ሲጠይቁ መለስ ዜናዊ “አሰብ የኤርትራ ናት” በሚል ሀሳቡን ውድቅ እንዳደረጉባቸው ኮህን ለተለያዩ ሚዲያዎች ገልጸዋል:: ሕወሓት በዚህ ታሪኩ አለማፈሩ ይገርመኛል:: ታሪክ ይቅርታ በማይደረግለት ስህተት መዝግቦታል::

 ሀገርን የተፈጥሮ፣ የጦርነት እና ሌሎች ችግሮችና አደጋ ሲያጋጥማት አንድ ዜጋ እንኳን ገንዘቡንና ሕይወቱን ሊሰጥ የተገባ ነው:: በዚህ በኩልም ኢትዮጵያውያን የሚያኮራ ታሪክ እንዳለን ይታወቃል:: በቅርብ ዘመናት ኢትዮጵያውያን ከማጂ እስከ ጃጂ፣ ከመቀሌ እስከ ሞያሌ፣ ከኦሜድላ እስከ ጋምቤላ፣ ከጅጅጋ እስከ ጅጋ፣ ከበደሌ እስከ ቶጎ ውጫሌ፣ ከጠገዴ እስከ ጎዴ፣ ከሁመራ እስከ ሰመራ በአንድነት ያነሳሳቸው ታላቁ የአባይ ግድብ ነው:: የዚህ ጽሑፍ አቅራቢ ለግድቡ በሦስት የተለያዩ ዓመታት የሦስት ወር ደመወዙን ለግሷል:: ልገሳው ወደ ቦንድ እንዲዛወር በመደረጉ ደስተኛ ነው:: ኢትዮጵያውያንን ከአጽናፍ እስከ አጽናፍ ያስማማ በኩር ብሔራዊ አጀንዳ በመሆኑ ሠራተኛው ተቸግሮም ቢሆን ደመወዝ በመለገሱ ለሀገሩ ታላቅ ድርሻ አበርክቷል:: በዚህም እንደሚኮራ ይታመናል::

 ዓሳው – የመንግሥት ሠራተኛ

 ከካድሬና ካድሬ ቀመስ፣ ከገንዘብ እንቅስቃሴ ጋር ግንኙነት ካላቸው ሌባ የመንግሥት ሠራተኞችና በ‹ኤክስፐርቲዝነት› ሙያቸው የተሻለ ክፍያ ከሚያገኙ ጥቂት ሠራተኞች በስተቀር አብዛኛው የመንግሥት ሠራተኛ ኑሮው የሰቆቃ ነው:: ምሳቸውን ሳይበሉ የሚውሉ፣ ሲያማቸው እንኳ መታከሚያ በማጣት በሽታቸውን ተሸክመው የሚሰቃዩ ሠራተኞች እንዳሉ ይታወቃል:: ለሠራተኞቻቸው ነጻ የሕክምና አገልግሎት የሚሰጡት የመንግሥት የልማት ድርጅቶች ብቻ ናቸው:: አብዛኛዎቹ ባለ በጀት መስሪያ ቤቶች ለሠራተኞቻቸው ነጻ የሕክምና አገልግሎት አይሰጡም::

 ኅብረተሰቡም ቢሆን ለመንግሥት ሠራተኞች የሚሰጠው ክብር ዝቅ ያለ ነው:: በዛሬዪቱ ኢትዮጵያ በአነስተኛ ደመወዝ ተመግቦ፣ለብሶ፣ቤተሰብ ያለው ቤተሰቡን አስተዳድሮና ልጆቹን አስተምሮ መኖር በአስማት ካልሆነ በቀር እንዴት ይቻላል? ሲያስቡት ያማል::

 ጠቅላይ ሚንስትር አብይ አህመድ (ዶክተር) ወደ ስልጣን እንደመጡ የመንግሥት ሰራተኛ በነጻ የሚያገለግል መሆኑን በመግለጽ ማሞካሸታቸው ይታወሳል:: በወቅቱም የበርካታ መንግሥት ሠራተኞች ተስፋ መብራት ጀምሮ ነበር:: በኋላ ግን በተደጋጋሚ ባደረጓቸው ንግግሮች፣ ለመንግሥት ሠራተኞች ደመወዝ መጨመር የኑሮ ውድነቱ እንዲጨምር ከማድረግ ውጭ የሚፈይደው ነገር የለም በማለት ተናግረዋል::

 ጠቅላይ ሚንስትሩ በስልጣን ዘመናቸው ለመንግሥት ሠራተኛው አንድ ሳንቲም የደመወዝ ጭማሪ አላደረጉም:: ቀደም ሲል በባለበጀት መስሪያ ቤቶች የሚሰራ አንድ ሠራተኛ የደረጃ ዕድገት ሲያገኝ ያገኘው ጭማሪ በሙሉ ይከፈለው ነፃ ሃሳብ “ገ ቁጥር 04 ታህሳሥ 10 ቀን 2013 ዓ.ም. 13 ነበር:: ጠቅላይ ሚንስትሩ ከመጡ በኋላ ግን አንድ ሠራተኛ የደረጃ ዕድገት ካገኘ የሚከፈለው ለ3 ተከፍሎ በ3 ዓመታት ውስጥ ነው:: በምሳሌ አስደግፌ እንዳስረዳ ይፈቀድልኝ:: አንድ ሠራተኛ ከሐምሌ 1 ቀን 2012 ዓ.ም ጀምሮ የብር 900.00 ጭማሪ የደረጃ ዕድገት ቢያገኝ የመጀመሪያው ብር 300.00 የሚከፈለው እስከ ሰኔ 30 ቀን 2013 ዓ.ም፣ ሁለተኛው ብር 300.00 የሚከፈለው እስከ ሰኔ 30 ቀን 2014 ዓ.ም እና ሦስተኛው ብር 300.00 የሚከፈለው እስከ ሰኔ 30 ቀን 2015 ዓ.ም ነው:: የተጨመረለትን ብር 900.00 በሙሉ የሚያገኘው በሦስተኛ ዓመቱ ነው:: ይህ በዘመነ ብልጽግና በመንግሥት ሰራተኛው ላይ እየተፈጸመ ያለ ግፍ ነው::

 በርግጥ መንግሥት፣የመንግሥት ሠራተኛውን ኑሮ ቀዳዳ ሁሉ የሚሞላ የደመወዝ ጭማሪ የማድረግ አቅም እንደሌለው ይታወቃል:: የኑሮ ውድነቱ መነሻና መድረሻ መፍትሔ ለመንግሥት ሠራተኛ ከሚጨመር የደመወዝ ጭማሪ ጋር አይገናኝም:: በምጣኔ ሀብት ባለ ሙያዎች ዘንድ ለዋጋ ግሽበት መንስዔና መፍትሄ ቁልፉ ጉዳይ “የፍላጎትና የአቅርቦት መጣጣም” እንጂ ለመንግሥት ሠራተኛው ደመወዝ የመጨመርና ያለመጨመር ጉዳይ አይደለም:: ደመወዝ ሳይጨመርም በብርሃን ፍጥነት የዕቃዎች ዋጋ ግሽበት ሲጨምር እንጂ ሲቀንስ አይታይም::

 

በዚህም አንጻር “በእንቅርት ላይ ጆሮ ደግፍ” እንዲሉ በ“ገበታ ለሀገር” ስም አብዛኛው ሠራተኛ ሳያምን በካድሬ አደረጃጀት የአንድ ወር ደመወዙን እንዲሰጥ መደረጉ የመንግሥት ሰራተኛን ደመወዝ እንደመንጠቅ ይቆጠራል::

የመጣው ሥርዓት ሁሉ ጉልበቱን የሚፈትሸው በመንግሥት ሠራተኛው ላይ ነው:: የሚያሳዝነው ነገር ቢኖር የመንግሥት ሠራተኛው የግልገልና ዋና ካድሬዎች የስብሰባ ማድመቂያ፣ንግግር መለማመጂያ፣በአግባቡ ያልተኮረጁና ከሀገራችን ነባራዊ ሁኔታ ጋር ያልተዛመዱ ፍልስፍናዎች መሞከሪያና በስሙ የሚነገድበት የኅብረተሰብ ክፍል መሆኑ ነው::

 በዘመነ ሕወሓት ሥራ ለመቀጠር፣በሥራ ላይ ዕድገት ለማግኘትና የከፍተኛ ትምህርት ዕድል ለማግኘት መስፈርቱ በወንዝ ልጅነት መጠቃቀም፣ ጎጠኛ መሆንና በጎጠኞች መረብ ስር መሆን ነው:: ይህን ያደረገ ካድሬ ሹም ይመሰገናል እንጂ አድሎ እንዳደረገ አይቆጠርም:: ይህ ክፉ ሥራ በዘመነ ብልጽግና ተጠናክሮ በመቀጠሉ ”ዓሳው – የመንግሥት ሠራተኛ” እንደ ዶሮው እንቁላሉን ሳይሆን ራሱን እየሰጠ እየተበለተ መሆኑን ቁልጭ አድርጎ የሚያሳይ ነው::

ዶሮው – ካድሬ ሹም

 “መልከ ጥፉን በስም ይደግፉ” እንዲሉ ብልጽግና ፓርቲ የቀድሞው ኢሕአዴግ ቁጥር 2 ነው:: ከኢሕአዴግ ላይ ሲቀነስ ሕወሓት፤ ሲደመር አጋር ድርጅቶች (ኢሕአዴግ – ሕወሓት + አጋር ድርጅቶች) ማለት ነው::

ሕወሓት የበጋ መብረቅ ወርዶበት ሳያስበው ከአራት ኪሎ ቤተ መንግሥት ከተባረረ ማግስት ጀምሮ ሕወሓትን የተኩት ከተላላኪነት ያለፈ ሚና ያልነበራቸው ያሳደጋቸው ተላላኪዎቹ ከእሱ ብሰው ተገኝተዋል:: የታዘብነውም ተተኪዎቹ ይሉኝታ የሌላቸው፣ በጎሳ ፍቅር ያበዱ፣ከብሔራዊ ልማትና ከብዙኃን ፍላጎት ይልቅ የግል ስልጣንና ሀብት በማካበት ላይ ያተኮሩ መሆናቸውን ነው:: የሕወሓትን “ተራራ ማንቀጥቀጥ” ገድል የማስተጋባት ተግባር ፈጽመው አሁን ደግሞ ብልጽግናን የማጋነን ዘይቤ የጀመሩት የትናንቱ ካድሬዎች መርሕ አልባ በመሆናቸው ፈጥነው የሚሰለፉት ከአሸናፊዎች ጋር እንደሆነ ይታወቃል::

አብዛኛዎቹ ካድሬ ሹማምንት ከሁሉም በላይ ራሳቸውን የሚያስቀድሙ፣ የሾማቸው አካል ፊቱን ካጠቆረባቸው የሚኖሩበት ቪላ ቤትና ኮብራ መኪና ሲነጠቁ እየታያቸው ሌት ተቀን የሚቃዡ እንጂ በራሳቸው የሚተማመኑ አይደሉም::

እነዚህ ካድሬ ሹማምንት በኅብረተሰቡ ውስጥ የተሻለ ኑሮ የሚኖሩ፣ መንግሥት ማለፊያ ቤትና ምርጥ መኪና የሰጣቸው፣ የተሻለ ደመወዝና ጥቅማ ጥቅም ያላቸው፣ በውጭ ሀገር ጉዞ ዶላር የሚሰበስቡ እና ኢመደበኛ በሆነ ዘዴም መሬቱን እና ገንዘቡን የሚሰበስቡ ናቸው:: ጠቅላይ ሚንስትሩንና እሳቸውን የከበቧቸውን ለማስደሰትና “ንሴብሆን” ለመሻማት እሽቅድምድም ውስጥ ገብተዋል:: እነዚህ ባለስልጣኖችና የብልጽግና ካድሬዎች ለ”ገበታ ለሀገር” የወር ደመወዛቸውን ቢሰጡ እንደ ዶሮው እንቁላሉን ሰጡ እንጂ እንደ ዓሳው ራሳቸውን አልሰጡም::

በሀገራችን እየተለመደ የመጣው አንድ ባለስልጣን በጎሳ ሰንሰለት ውስጥ እስከታቀፈና የፖለቲካውን ቀይ መስመር እስካላለፈ ድረስ የፈለገውን ቢያጠፋ ጠያቂ የሌለው መሆኑ ነው:: አጥፍቷል ተብሎ ቢነሳም ሌላ የተሻለ ወንበር ላይ ይቀመጣል እንጂ ተጠያቂ አይሆንም:: ከዚህም አንጻር የመንግሥት ሠራተኛውና ሌላው የኅብረተሰብ ክፍል እንደ ዓሳው ራሱን እየሰጠ ካድሬው ሹም ደግሞ እንደ ዶሮው ዕንቁላሉን እየሰጠ በሹመት ላይ ሹመት እየጨመረ ዕድሜውን ይገፋል::

በመጨረሻም ዐብይ አህመድ (ዶክተር) በኑሮ ውድነት ከቤተሰቡ ጋር በመሰቃየት ላይ የሚገኘው የዓሳ ተምሳሌት የሆነውን የመንግሥት ሠራተኛ “ገበታ ለሀገር” በሚል ሰበብ የሚቆረጥበት ሙሉ ደመወዝ በፍጹም አግባ አለመኾኑን ሊረዱት እንደሚገባ መልእክቴን አስተላልፋለሁ::

ውስጠ ወይራው ያለመለወጥ ‘ለውጥ’ (በቃሉ ሰውመሆን (የሕግ ባለሙያ)

አቢቹ ሰብሮ የወጣው ወያኔ የጣለውን እቁላል ነው፤ በጥቅሉ ከ 1960 ዓ.ም ወዲህ እስካለንበት በተከሰተው እንዘጭ እቦጭ ውስጥ ኢትዮጵዊነትን ለከፍተኛ ኪሳራ የዳረገ እራስ በል እና እራስበሉን አስቀጣይ የሆነ ሽግግራዊ ክሽፈት አጋጥሞናል፤ አንደኛው የክሽፈት አንጓ የንጉሳዊ ስርአቱን አንጸባራቂ ውርሶች አዘምኖ ማሸጋገር ሲገባ ለአውዳሚ አቢዮት መዳረጋችን ሲሆን፤ ሁለተኛው ደግሞ የኢሕአዴግን አራሙቻ ስርአት የሚነቅል አብዮታዊ የስርአት ለውጥ ማዋለድ ሲገባን ጠጋግነን ማስቀጠላችን ነው:: ቅኝ እንደተገዛ ህዝብ ከኢትዮጵዊነት ጥነተ ውርስ እና ሀገር በቀል የእውቀት መሰረት ላይ ተነቅለን ተቅበዝባዥ እንድንሆን የዳረገን የፖለቲካ ታሪካችን አንዱ ዝንፈት ይህ ይመስለኛል:: አብዮት ለማይገባው አብዮት፤ ለሚገባው ደግሞ የአስቀጣይነት ሥራ ነው የተሠራው:: በተለይ የያኔው ትውልድ የኢትዮጵያዊ ብሄርተኛ መልካም እሴቶቻችን እና ተቋማትን ተከላክሎ እና ዘመኑን እንዲዋጅ አድርጎ ማስቀጠል ሲገባው፤ ከጭቃ እሾህ ዘውገኞች ጋር አብሮ ተሰልፎ የኢትዮጵያዊነትን ጎን መሸንቆሩ ከታሪክ ተዋቅሽነት አያድነውም:: ከመሰረታችን ተነቅለን ስናበቃ ነቃዩን አስተሳሰብ ደግሞ ለማስቀጠል ከመዋተት ያለፈ ምን እራስበልነት አለ:: መንቀል እና ማስቀጠል ያለብንን ውርሰ መሰረት ካላወቅን ዘላቂ ስርዓት ማንበር ተስኖን ፕሮፌሰር መስፍን እንዳሉት ለእዘጭ እቦጭ ተዳርገናል:: የስርዓት ለውጥ የሂደትም የግብም ጉዳይ መሆኑን መገንዘብ ያስፈልጋል:: ጅምሩን እና ሂደቱን ካለጎምነው ውጤቱ እዘጭ እቦጭ ይሆንና በለውጥ ሽፋን ተረኛ ጨቋኝ የማንበር አዙሪት ውስጥ መዳከርን ያስከትላል:: የሀገራችን ፖለቲካዊ ስነ ልቦና ትልቁ ጠባሳ ይህ ስለመሆኑ የሀሳቡ ተጋሪ ነኝ:: ለአምባገነኖች በአድር ባይነት አድፍጦ መገዛት፣ ገንፍሎ መንቀል እና መልሶ አምባገነን ማንበር፤ ለዚህ አዙሪት ዋናው መንስኤው ዘለቄታዊ ስርዓት ከማዋለድ በፊት የእርካብና መንበርን መሰላል የመጨበጥ ግለኝነት አስተሳሰብ ቀድሞ የመጋረጡ አባዜ ይመስለኛል::

 ህዝባዊ ስርዓትን ጸነሰን ስናበቃ አገዛዝን እያዋለድን ቀጥለናል:: ከለውጥ ተብዬው ወዲህም እየሆነ ያለው ይሄው ነው:: በየትም በኩል ለውጥ ይከሰት መሰረታዊ የስርዓት ንቅለ-ተከላ ማስፈን የመጨረሻ ግብ መሆን ነበረበት:: “በለውጡ” ዋዜማ ህዝባዊ ትግሉ ፍሬ ሊያፈራ የሚችልበት መንታ የቢሆን ትንታኔዎች እንደ ጉም እየተነኑ ነው፤ በአንድ በኩል ህዝባዊ ትግሉ የመንግሥትን መዋቅር ከውጭ ወደ ውስጥ የሚያጸዳ የለውጥ ምዕራፍ ላይ ደርሶ ቢሆን ኖሮ አንድም ውርሰስንጥቁ አገርሽቶ የርስበርስ ሽኩቻ ሊከሰት ይችል ነበር፤ አልያም የደፈረሰው ጠርቶ ክሱት ስር ነቀል የስርዓት ለውጥ የማዋለድ ዕድል ይፈጠር ነበር:: ሁለተኛ የህዝቡን የለውጥ ፍላጎት ከሚጋራ የውስጥ ሀይል ጋር የተቀናጀ እና ከውስጥ ወደ ውጭ የሚፈነዳ አዝጋሚ ስር ነቀል የሽግግር ሂደት መጠንሰስ ነበር:: ይህም ለክሱት ሽግግር የሚከፈለውን ዋጋ ሊቀንሰው ይችላል:: ለለውጥ ተብዬውም ድጋፍ የተቸረው ከዚህ አኳያ ነበር:: የሆነው ግን ህዝባዊ ትግሉ የመንግስትን መዋቅር አጽድቶ ወደ ስርዓታዊ ሽግግር ከማምራቱ በፊት የህዝቡን መሰረታዊ የለውጥ መሻት የሚያዋልድ መስሎ የሚያጨነግፍ አስመሳይ የውስጥ ሀይል ነው የተከሰተው:: በመሆኑም ሀገራዊ መሻትን በቡድናዊ መሻት እና ተረኛ ጨቋኝ ለሚለውጥ ቁልቁለት ተዳርገናል:: የአስቀጣዩ ዳግማዊ ኢሕአዴግ ውስጠ ወይራ አላማው ከውርሰመሰረቱ በአውዳሚ አብዮት የተዳፈነውን የኢትዮጵያዊ ብሄርተኝነት ከፖለቲካዊ ውክልና እንደተነቀለ አንሳፎ ማስቀረት ሲሆን፤ በአንጻሩ ደግሞ በአብዮታዊ ለውጥ መነቀል የነበረበት ኢሕአዴጋዊ ውርሰ ጥፋት በለውጥ ሽፋን አለባብሶ ማስቀጠልን ያለመ ነው:: የለውጥ ተብዬው መዘውር መንትዮሻዊ ፍላጻ ያለው ኢትዮጵያዊ ብሄርተኝነትን አዳፍኖ ማቆየት እና የዘውግ አረሙን ደግሞ አስቀጥሎ ምርቱን መሰበሰብ ነው::

በመሆኑም በተለይ ከኢትዮጵያዊ ብሄርተኛው አኳያ በለውጥ መሻቱ እና በለውጥ ሽፋን እየተሰራ ባለው ተግባር መካከል መሰረታዊ መዛነፍ፣ ተቃርኖ እና መተላለፍ ተፈጥሯል:: በኢሕአዴግ ፍጻሜ ላይ የለውጥ መሻቱ እውን መሆን ሲገባው በአንጻሩ በለወጡ ኪሳራ ኢሕአዴግን ከነጥንተ ርእዮቱ የማዳን ሥራ እየተሠራ ነው:: “የለውጥ ሀይል” ተብዬው መሰረታዊ ጭንቀት ስር ነቀል ለውጥ ከመጣ ኢትዮጵያዊ ብሄርተኝነት አብዮታዊ ውድመት (በ1960) ከማስተናገዱ በፊት ወደነበረ ልዕልናው ያንሰራራል የሚል ነው:: ሁኔታው የሚከፋው ደግሞ ኢሕአዴግ ከተፈጥሯዊ እና ከሚገባው የፖለቲካ ሞቱ እንዲያንሰራራ እየተደረገ ያለው በአዲስ ርእዮት፣ ሕገ መንግሥታዊ እና መዋቅራዊ ለውጥ ሳይሆን የነበረውን ቡቱቶ ደርቶ በማስቀጠል ነው:: እየሆነ ያለው ድራፍት እንዳይጠጣ በሀኪም ለተከለከለ ሰው ቢራ እንደማጠጣት ያክል ነው:: ታማሚው ያንኑ እየተጋተ አዲስ መድሃኒት እንደተገኘለት ያክል ይቦርቃል:: በለውጥ ሽፋን ለውጥን የመከላከል ስልት፤ ወደፊት እያዩ ወደኋላ የመራመድ የአስመሳይነት፣ የአበያነት እና የልግመኛነት ቁልቁለት ውስጥ ነን:: ለውጡን እናግዝ እያለ ትውልድን የሚያደናግረው የፖለቲካ አደንጓሪ በኢሕአዴግ እና በዳግማዊ ኢሕአዴግ(ብልጽግና) መካከል መሰረታዊ የርዕዮት ልዩነት ስለመኖሩ ምን ማሳያ አለው? በአመዛኙ በሂደት ይለወጣል የሚል መከራከሪያ ሲያቀርቡ ይደመጣል:: ቀድሞውንም ጥያቄው ያለው ጥንስሱ ላይ ነው እንጂ በአንድ ጀምበር ሁሉ ይከሰት የሚል አይደለም:: ዳግማዊ ኢሕአዴግ ርዕዮቱን ሳይቀይር ዘዋሪውን ብቻ ቀይሮ የተረኝነት ሀዲድ ላይ አሳፍሮን ሳለ በሂደት የሚጠበቀው ለውጥ ከተረኛ አስቀጣይነት ሊዘል ይችላል ወይ? ፖለቲካችን የሚያስፈልገው እንቁላሉን ሰብሮ የሚወጣ የውረሰ ጥፋት አስቀጣይ ሳይሆን እንቁላሉን እራሱን የሚቀይር ስርዓታዊ ለውጥ ነው:: አቢቹ ሰብሮ የወጣው ወያኔ የጣለውን እቁላል መሆኑን አንዘንጋ:: ለዚህም ነው ኢትዮጵያዊ ብሔርተኛው በራሱ ጥንተ ውርስ እና ማህበራዊ መሰረት ላይ በተበባበረ ክንድ ለትግል መነሳት አለበት የምንለው:: የሆነው ሆኖ በለውጥ ሽፋን ለውጥን የመከላከል ቁልቁለቱ አያሌ ርዕዮት-አለማዊ፣ ተቋማዊ፣ ህገ መንግስታዊ እና ስርዓታዊ መገለጫዎች አሉት:: እነሆ በቅጭቡ፤ ሀ/ የአዳፍኔነት እና አስቀጣይነት መንታ ስለት፤ ውስጠ ወይራው ያለመለወጥ ‘ለውጥ’ በቃሉ ሰውመሆን (የሕግ ባለሙያ) 6 ቁጥር 04 ታህሳሥ 10 ቀን 2013 ዳሰሳ የሚዳፈነው ማን ነው? የሚቀጠለውስ? የሀገራችን ፖለቲካ በተውሶ ጥብቆ መቀንበብ ከጀመረበት የተማሪዎች አብዮት ጀምሮ በተለይም ከወያኔ መከሰት ወዲህ በመሰረታዊነት በሁለት የፖለቲካ አሰላለፍ ተቃርኖ ተሰቅዟል:: የተቃርኖው ስንጥቁ በዋናነት ከላይ ከተገለጸው የሽግግር ክሽፈት አንጓ፣ ከታሪክ አረዳድ እና የነባራዊ ሁኔታ ትንታኔ ተቃርኖ ይመነጫል:: ክሱት ብያኔውም የመደብ እና የዘውግ ጭቆና ትርክት በሚለው ይሸከፋል:: በጥቅሉ የስንጥቁ አንድ መከሰቻ ከኢትዮጵዊ ውርሰ-እሴት የሚቀዳው ኢትዮጵያዊ ብሄርተኝነት/civil nationalism ሲሆን ሌላኛው የጨቋኝ ተጨቋኝ ትርክት ላይ የተጠነሰሰው የዘውግ ብሄርተኛው/ ethnic nationalism ነው:: ወያኔ የተቀዳችበት ዥረት በቅኝ ገዢዎች ሀገር አፍራሽ ሴራ ተጣብቶ፣ በራስ በሉ ሌኒኒስታዊ አብዮታዊ ዴሞክራሲ ታጅሎ በሻቢያ አውቆ አጥፊ ትርክት አጎንቁሎ አንቀጽ 39 ላይ የተቋተ የደም እዳ ነው:: በአመዛኙ የዘውግ ጭቆና ትርክት መሰረቱ የእውነታ ጥመት/ Distortion ነው፤ በነባራዊ ሁኔታ ትንታኔ እውነትን ሳይሆን የሚበጀውን ሀሰት ፈጥሮ፣ ለነበረው እውነት አዲስ ትርጉም ሰጥቶ ለፖለቲካ ፍጆታ የማብቃት ጥመት ነው:: ጥመት ደግሞ ከዜሮ ጀምሮ፣ በራሱ ዥረት ቀልብሶ የሚፈስ እና ሁሉን በራስ የመለወጥ ውርሰ ጥፋት ነው፤ የሻቢያ፣ የወያኔ እና የኦነጋውያን ርእዮት ውርሰ መሰረቱ፣ የፍሰት አቅታጫው እና መዳረሻው ስልቻ ቀልቀሎ ቀልቀሎ ስልቻ እነደሚባለው ከዚሁ የሚቀዳ ነው::

ሀገሪቱ የቆመችበትን መሰረታዊ የህላዌ ምሰሶዎችን ለግዜያዊ የፖለቲካ ትሩፋት መሰዋት፣ ማጠልሸት፣ እንደ አዲስ መበየን፣ ከዜሮ መጀመር፣ በቅልብስ እሳቤ እና ቁልም አረዳድ የታጀለ ነው፤ የቁልቁለቱ መዳረሻ ራስ ጠልነት ነው:: የ“ብሄር ብሄረሰቦች ህዝቦች” ምናባዊ ምስል ክሰታ፣ የተጨቋኝነት እና ቅኝ ተገዥነት ተረት፣ የአማራ ጨቋኝነት የጋራ ጠላት ምስል ክሰታ፣ እራስን በራስ… እስከመገንጠል፣ ወዘተ እውነታን እንደሚበጅ አጣሞ ለነበረው አዲስ ትርጉም መስጠት የፖለቲካ ትርፍ ማሳለጫ እና የትግል መሳሪያዎች ናቸው:: በሌኒኒስታዊ የዘውግ ጨቋኝ-ተጨቋኝ የፖለቲካ ትርክት ውስጥ ሁሉም ነገር የትግል መሳሪያ ነው:: እግዚያብሄርን ከመካድ ይነሳል፤ ታሪክ፣ ሀገር፣ ተቋማት(የሀይማኖትም ሆነ ማህበራዊ) ሰው፤ መሬት ሁሉ የፖለቲካ ትጥቅ ነው:: በትግሉ ውስጥ የሚከሰቱ ስብእናዎችም እራሳቸውን የጥቅሉ አለም ወይም የሀገር አንድ አካል አድርገው አይረዱም:: ይልቁኑ ሁሉም ነገር ለነሱ ሲል የሚኖር የሚመስላቸው ግላውያን/ narcist ሲሆኑ እራሳቸውን ብቻ እንደግብ ያያሉ:: በዚህ ቁልቁለት ወያኔ ስንጥቁን አስምሮ ሲያበቃ ከስንጥቁ አንዱን(የጨቋኝ ተጨቋኝ ትርክትን) በዋና መሳሪያነት ተጠቅሞ የሀገሪቱን ሁለንተና እንደ ነቀዝ በልቶ ለአስቀጣዩ አስረክቦታል:: አብላጫ ማህበራዊ ቅቡልነት እያለው ከፖለቲካ ውክልና ተገፍትሮ በተንሳፋፊነት ይልበላውን እያከከ የቀጠለው ኢትዮጵያዊ ብሄርተኛው ነው::

ከዚህ አኳያ “የለውጥ ሀይል” ነኝ ባዩ አቢቹ(ኦነጋውያን) ተልእኮ እንዴት ይመዘናል? ላለፉት ሁለት አመታት በነባራዊ ሁኔታ ትንታኔ፣ በትርክት እና በተግባር እንደታየው እነ አቢቹ የጨቋኝ- ተጨቋኝ ትርክት ወራሾች እና አስቀጣዮች ለመሆናቸው በቂ ማሳያ አለ:: ኢትዮጵያዊ ብሄርተኛው እዚህ ላይ ብዥታ ውስጥ ገብቶ እራሱን ባያታልል መልካም ነው:: ማሳያውን ሁሉ መተንተን ለቀባሪው እንደ ማርዳት ነው:: የመደመር መጽሀፍ እስኳል መልክቱ የጨቋኝ ተጨቋኝ ርእዮት አስቀጣይነት ነው፣ የሽመልስ አብዲሳ ሰበርናቸው ትርክት እና አማራን እያጠፋነው ነው ድብቅ ንግግር፣ የአቢቹ የአስከሬን ዘር ቆጠራ እና ለአንድ ብሄር ብለን ህገመንግስት አናሻስልም ንግግር፣ ወዘተ ውስጠ ወይራ መልእክቱ የተዳፈነውን ኢትዮጵዊ ብሄርተኝነት አዳፍኖ ማቆየት እና መራሹን የዘውግ ፖለቲካ አረም ደግሞ አስቀጥሎ ምርቱን መሰበሰብ ነው:: የአዙሪቱን አንድምታ ከለውጥ ተብዬው አኳያ በዚህ መልክ ልቀንብበው፤

1ኛ እነ አቢቹ የፖለቲካ ውርሰ ስንጥቁን ለፖለቲካ ሚዛን ማስጠበቂያነት መጠቀማቸው አስቀጣይነት አንድ ማሳያ ነው፤ በስንትቁ ተቃርኖ የተሰቀዙትን አሰላለፎች እንደ ጽንፈኛ በመሳል እራሳቸውን በመሀል ሰፋሪ እና በለዘብተኛነት አቅርበው የቅቡልነት ማሳለጫ ቢያደርጉትም እራሳቸው በስንጥቁ አንድጫፍ የሚሰለፉ ናቸው::

2ተኛ ኢትዮጵያዊ ብሄርተኝነት ቀና ለማለት ሲሞክር በጽንፈኝነት ፈርጆ የማደከም ልምምድ ያላቸው መሆኑ ሌላው የአዳፍኔነት ማሳያ ነው:: በመሰረቱ ልብ ማለት የሚገባው ኢትዬጵዊ ብሄርተኝነት የፖለቲካ ተቃርኖው ጥቅል አሰላለፍ ማሳያ እንጂ በራሱ ጽንፍ አይደለም:: ምሰሶው እንዴት ጽንፍ ይሆናል? አሜሪካዊነት ለአሜሪካውያን ጽንፍ ይሆናል ወይ? ከዚህ አኳያ እየተሰራ ያለው ሴራ ሆን ብሎ ሀሳዊ መንትዬሽ/ false dichotomy እና ሀሳዊ ንጽጽር/false equivalence በማስረጽ ምሰሶውን(ኢትዮጵያዊ ብሄርተኝነትን) ከመሀል የመገርሰስ፣ ገርስሰው ሲያበቁ መሀል መንገድ ላይ እንገናኝ በሚል ፈሊጥ ጭብጦውን ይዞ ወደምሰሶው የመንኳተት፣ ብሎም መሀሉን ለብቻ የመጠቅለል እና የመሰልቀጥ አደገኛ አካሄድ ይስተዋልበታል:: ሰዋዊው እስክንድር እና ዘውገኛው ጀዋር በጽንፍና ጽንፍ የሚፈረጁ ናቸው ወይ? የሰማይ መሳላል የሆነችው ሰንድቅ አላማችን እና የድርጅት አርማው የኦነግ ባድራ በጽንፍና ጽንፍ የሚፈረጁ ናቸው ወይ? OMN እና የድሮው ESAT ወይም ያሁኑ መረጃ ቲቪ በጽንፍና ጽንፍ የሚፈረጁ ናቸው ወይ? እውን የአማራ ራስን የመከላከል ተፈጥሯዊ ብሄርተኝነት እና እራስ ጠሉ የዘውግ ብሄርተኝነት የሚነጻጸ ናቸውን? ይህ ሁሉ የሀሳዊ መንትዬሽ/false dichotomy እና ሀሳዊ ንጽጽር/false equivalence ሰሊጡን ከኑጉ ጋር ቀላቅሎ የመውቀት የፖለቲካ ታክቲክ ማሳለጫ:: አሁን አሁንማ እስራት፣ ግድያን እና የአስክሬን ቆጠራን በራሱ በዚሁ መነጽር በብሄር ተዋጽኦ እና ከሁለቱም ጽንፍ የማዳረስ አሰራር እየተለመደ ነው:: ሁኔታው ቅኝ ብንገዛ ኖሮ ይሰራብን ከነበረው ባልተናነሰ የሀገራችንን እና ህብራዊ ማንነታችንን መሰረታዊ እሴቶች የማሳጣት ብሎም ለብቻ የመጠቅለል አደገኛ ውጤት ሊያስከትል የሚችል ነው::

 3ኛ በጓያ አውድማ ላይ ጤፍ መውቃት ሌላው የአዳፍኔነት እና አስቀጣይነት ማሳያ ነው፤ እነአቢቹ(ኦነጋውያን) በትርክት ደረጃ የኢትዮጵያዊ ብሄርተኝነት ማቀንቀናቸው ከፖለቲካ ስልትነታ የማያልፍ፣ ግን ደግሞ ውስጠ ወይራ አንድምታ ያለው ነው፤ ኢትዮጵያዊ ብሄርተኝነት አብላጫ ማህበረሰባዊ ቅቡልነት ቢኖረውም ህገመንግስታዊ እና መዋቅራዊ መሰረት እንዳይቆናጠጥ በወያኔ እና በመሰሎቹ አውዳሚ ስራ ተሰርቶበትል:: ይህን ከማስቀጠል አኳያ በትርክት ደረጃ ኢትዮጵያዊ ብሄርተኝነትን ማዥጎድጎድ የፖለቲካ ማህበራዊ መሰረቱን በማሳከር በጋራ እንዳይቆም ከማድረግ ባለፈ በፖለቲካ መዋቅር ደረጃ ጠብ የሚል ውጤት እንዳማያስከትል እነአቢቹ ያውቁትል:: ምክንያቱም ስንኩል ማህበራዊ መሰረት ኖሮት ሳለ ህገመንግስታዊ እና መዋቅራዊ መሰረት ተቆናጦ ያለው በተጨባች የዘውግ ጨቋኝ ተጨቋኝ ትርክ በመሆኑ ነው:: መሰረት የያዘውን የዘውግ ፖለቲካ ለማስቀጠል አንዱ ስልት መሆን ያለበት ደግሞ ኢትዮጵዊ ብሄርተኛው እውነተኛ እና መሰረታዊ ሽግግር የሚያስከትል ለውጥ እንዳያዋልድ በመከላከል ነው:: ይኸውም ኢትዮጵያዊ ብሄርተኛውን በትርክት ሸንግሎ ወደሰገባው በመመለስ ማዳፈን ሲቻል ነው:: በለውጥ ሸፋን ለውጥን የመከላከል አዳፍኔነት እና እስቀጣይነት ይሉሀል እንዲህ ነው:: በተለይ የአቢቹን ፖለቲካዊ ትርክቶች መአከላዊ መልክት ለመረዳት አንዱ ዘዴ ትርክቱን ገልብጦ ማንበብ ጠቃሚ ይመስለኛል:: እያሞገሰ ይቀብርሀል፣ የልብህን እየተናገረልህ በተግባር ያልነገረህን ሴራ ያጎናጽፍሀል:: የኦነጋውያን ዋና አላማ የተካደውን ኢትዮጵዊ ብሄርተኝነት አዳፍኖ ማቆየት እና መራሹን የዘውግ ፖለቲካ አረም ደግሞ አስቀጥሎ ምርቱን ለመሰብሰብ ይቻል ዘንድ በለውጥ ካባ ለውጥን በዘላቂነት መከላከል ነው:: ቀድሞውንም ለመቀልበስ የሚበቃ የለውጥ ፍላጎት እና ጅምር ስላልነበረ ባለንበት ሁኔታ የውድቀት አዙሪት ቀጠለ ነው እንጂ ለውጥ ተቀለበሰ ማለት አይቻልም::

ለ/ የውርስ እዳ ደብዳቤውን ማን ይቅደደው? (ክፍል ሁለት ይቀጥላል)

አኬልዳማዋ ኢትዮጵያ(ውቤ ደነቀው መኮንን)

ትሕነግ/ኢሕአዴግ ባለፉት ሀያ ሰባት ዓመታት ኢትዮጵያ ሀገራችንን ሊበላትና ሊበታትናት ሲሠራ ቆይቷል:: ሲያስገነጥል ውድ ታጋይ ልጆቿንም ቁም ስቅል ሲያሳይ የነበረው ይህ ቡድን በቆራጥ፣ ግንባራቸውንና ደረታቸውን ለሀገር ሲሉ ራሳቸውን ለጥይት የሰጡት ጀግና ከሕዝብ አብራክ የተገኙ የእማ ኢትዮጵያ ውድ ፍሬዎች በከፈሉት የህይዎትና የአካል መስዋዕትነት የተገረሰሰው ነውረኛና ሆዳም ቡድንን ተከላከልኩ ብሎ አዲስ ለመጣውና ኢትዮጵያን ወደ ሰላምና ዴሞክራሲ ይወስዳል ተብሎ የተገመተው ራሱን የለውጥ ኃይል ብሎ የሰየመው ቡድን ወደ ሥልጣን ሲመጣ የዚህን ጽሑፍ አቅራቢ ጨምሮ የብዙዎቻችን ደስታ እጥፍ ድርብ አድርጎት እንደነበር የቅርብ ጊዜ ትዝታ ነው::

ይህ ኃይል ወደ ስልጣን ማማው በሚወጣበት ጊዜ ቲም ለማ ይባል፤ ቲም ገዱ ወይም ቲም ደመቀ፤ ዞሮ ዞሮ በዚህ ጽሑፍ አቅራቢ ግምት ከ90% (ዘጠና እጅ ከመቶው) በላይ የኢትዮጵያን ሕዝብ ይሁንታና ድጋፍ ያገኘ እንደነበር የሚታወቅ እውነታ ነው::

ተረኛው ኃይል ወደ ሥልጣን ከመጣበት ጊዜ ጀምሮ የቡድኑ አምበል የሚያደርጓቸው የታሰበባቸው (calculated) ንግግሮች ለብዙዎች መሸንገል ምክንያቶች ነበሩ:: አሁንም እየተሸነገሉ ያሉ መኖራቸው ደግሞ ቡድኑ እስካሁን ካደረሳቸው የዜጎች ግድያ፣ መፈናቀል፣ መታገትና መሰል ችግሮች በበለጠ ወደ ፊት የሚመጣውን ችግርም አሳሳቢ ያደርገዋል:: እዚህ ላይ የአቶ ሽመልስ አብዲሳን የማደናገር ወይም ማሳመን (Confuse or Convince) አባባል ማሰብ የነገሮችን አካሄድ ግልጽ ያደርግልናል:: ለህዝባዊው ድጋፍ ምክንያት የነበሩትና ከተደረገው ዲስኩር አንጻር በሕዝብ ዘንድ ይፈፅሙልናል ተብለው ተስፋ ከተጣለባቸው ውስጥ፡-

  1. ከፋፋዩን፣ በታኙንና አፍራሹን የሀገሪቱ የበላይ ህግ ህገ መንግሥት ተብዬው የጠላት ማኒፌስቶና አንድን ቋንቋ ተናጋሪን በሙሉ ለማጥፋት በሰው በላዎቹ በትህነግና በኦነግ የተዘጋጀው እድሜው አእምሮ በሌላ ህዝባዊ ህገ መንግሥት ይተካል በሚል ተስፋ
  2. የፌዴራል መንግሥቱ አወቃቀር ቋንቋንና ዘርን ምርኩዝ ባደረገና በሕዝብ ምርጫና ፍላጎት መሠረት አዲስ የፌደራል መንግሥት አወቃቀር ተግባራዊ እንደሚደረግ ተስፋ በማድረግ፣
  3. ከላይ ይደረጋሉ ተብለው የታሰቡ ለውጦችን መሠረት በማድረግ ነፃ፣ ተአማኒና ዴሞክራሲያዊ መብቶችን ያከበረ ምርጫ ይካሄዳል ተብሎ ስለታመነ፣
  4. ለዚህ ለተከናወነው ለውጥ በዋነኛነት ቀስቃሽና አቀጣጣይ የትግል ስልት በነበረው የማንነትና የውክልን ጥያቄዎች በአስቸኳይ እንደሚፈቱና ፍትሀዊ የውሳኔ እልባት እንደሚያገኙ በእርግጠኝነት በመተማመንና በአጠቃላይ ተግባራዊ ይደረጉ የነበሩት ፀረ ሕዝብና ፀረ ዴሞክራሲ የሆኑት ህጎች ተወግደው ለመጨረሻ የተገረሰሱና ተመልሰው እንደማይተገበሩ በመተማመን ለአዲሱ የለውጥ ኃይል ነኝ ላለው መንግሥት ሙሉ ድጋፍ ተችሮት እንደነበር ሁላችንም በህሊናችን የቀረ የትናንት እውነት ነው::

በአንድ ሀገር የመንግሥት ለውጥ አስፈላጊ ሆኖ በሚከናወን ጊዜ ታግሎና መስዋዕትነት ከፍሎ ለውጡን ያመጣው ሕዝብ ይሁንታውን የሚሰጠው መንግሥት ተቀዳሚ ተግባሩ መሆን ያለበት የሀገሩን ዳር ድንበርም የህዝቡን የዕለት ከእለት የፀጥታ ጉዳይ ማረጋገጫ ለነገ የማይባል ግዴታው እንደሆነ የታመነና ለአለማቀፋዊ እውነታ መሆኑ አስረጅ አያስፈልገውም::

በዚህ አኳያ ሲቃኝ በመጀመሪያዎቹ የለውጥ ወራት በሀገራችን የሆነው ሁሉ ድንቅ ይመስል ነበር:: የሀገራችንን ውስጣዊ ሰላም ለማረጋገጥና ከውጭ ሊመጡ የሚችሉ በጎ ያልሆኑ ተጽዕኖዎችን ለማስቀረት ያለመ በሚመስል መልኩ ያኮረፈና የትጥቅ ትግል መሰል ትግል እናካሄዳለን የሚሉትን ኃይላት ከግለሰብ ጀምሮ እስከ አነስተኛና ከፍተኛ ቡድኖች ከያሉበት ጠርቶና ኤርትራ ድረስ የልዑካን ቡድን በመላክ ወደ ሀገር ቤት አስመጥቷል:: ሁሉም ግለሰቦች፣ ልዩነት አለኝ ብሎ በሀገሩ ጉዳይ ያገባኛል የሚል ቡድንና የፖለቲካ ድርጅት ቀጣዩን ትግል በሀገር ውስጥ በመሆን ሰላማዊና የአስተሳሰብ ትግል በማድረግ ብቻ ወደ ተፈለገበት አላማና ግብ መድረስ እንደሚቻልና የብረት ትግሉን አስወግደን ሀገራችን ኢትዮጵያን ሌሎች የለሙ ሀገራት ከደረሱበት የእድገት ደረጃ ለማድረስ እንድንተጋ ጥሪ ተላልፎ ከጎረቤት ሀገሮችም ጋር ፍፁም ሰላማዊና ትብብር የተሞላበት ግንኙነት ይኖረን ዘንድ አዲስ የተሰየመው የአብይ አህመድ መንግሥት ትጋትን ያሳዩ ይመስል ስለነበር እስከ ቅርብ ጊዜ ድረስ የሕዝብ ድጋፍ አልተለያቸውም ነበር::

 ሕልም እልም፤ ሕልም እልም!

አበው ጉድና ጅራት ከወደኋላ ነው እንዲሉ፣ የሰላሙን ጥሪ ተቀብለው ትጥቃቸውን ፈተው (እዚህ ላይ ትጥቅ ሳይፈቱም ከእነመሳሪያቸው የገቡም እንዳሉ ይታወቃል) ወደ ሀገር የገቡ በፊቱ የትህነግ/ ኢህአዴግ መንግሥት (ወሮ በላ ቡድን) ተቃዋሚ ነን የሚሉ ድርጅቶችና ግለሰቦች ወደ ሀገር ቤት በደማቅ አቀባበል (እንዳንዶቹ እጅግ በተጋነነ የአቀባበል መስተንግዶ ጭምር ከገቡ በኋላ ግማሽ እንደ እንጀራ ልጅ ባለእጁን ጋባዥነትና ከፋይነት በባለ አምስት ኮከብ ሆቴል እንደሚንፈላሰስ መስማታችን ሳያንሰን ይኼው የባለ አምስት ኮከብ ሆቴል ቅምጥል በሶስት ወራት ጊዜ ውስጥ የመንግሥትን ስልጣን እቆጣጠራለሁ በሚል ቀቢፀ ተስፋ ምዕራብ ኢትዮጵያን የጦር አውድማ በማድረግ ከ20 (ሀያ) ያላነሱ የሕዝብና የመንግሥት ባንኮችን ያለማንም ከልካይና የተፈቀደ በሚመስል ውንብድና ዘረፈ:: አስዘረፈ::

የሀገር ያለህ፣ የመንግሥት ያለህ!!! ተባለ:: በወቅቱ ደራሽ አልነበረም ብቻ ላይን ሀይ ባይ በመጥፋቱ ያላስፈለገና ዘግናኝ አካል፣ የህይወትና የንብረት ውድመት መስዋዕትነት የምዕራብ ኢትዮጵያ ልጆች ከፈሉ:: ቄሱም ዝም መጽሐፉም ዝም ሀነና ታለፈ የተረኝነቱ የመጀመሪ መጀመሪያ አትሉም?

ይህ ከሆነ ከጥቂት ወራት ቆይታ በኋላ በአዲስ አበባ ከተማ በስተምዕራብ አቅጣጫ በሚገኘውና ቡራዩ ተብሎ በሚጠራው የከተማይቱ ክፍል ብሔርን በመሠረት ያደረገ ጭፍጨፋ፣ እርድና የንብረት ውድመት እቃን በመሰባበር፣ማቃጠልና መዝረፍን ጨምሮ ሊካሄድ ያስተዋሉ የመሀል አዲስ አበባ ወጣቶች ድርጊቱን በመቃወም በሰላማዊ መንገድ ውቤ ደነቀው መኮንን አኬልዳማዋ ኢትዮጵያ ዳሰሳ 12 ቁጥር 03 ጥቅምት 25 ቀን 2013 ዓ.ም. ለሕዝብና ለመንግሥት ለማሳወቅ ሰልፍ ለወጡ ንፁሃን ወጣቶች ተመጣጠኝ ያልሆነ የአፀፋ እርምጃ ግድያን ጨምሮ የተወሰደ ሲሆን ለእስር የተዳረጉት ወጣቶች እስከአሁን ድረስ በእርስ እየማቀቁ እንደሆነ ይነገራል::

ከዚህ ከቡራዩ እልቂት ጀርባ ከነበሩት የሥውርና ረጅም እጃቸውን ካስገቡት የፅንፈኛ ቄሮ አባላት በተጨማሪ የፅንፈኛ ቄሮ አምበልና አዛዥ የአል ሐጂ በደል በካይ ወራሽ አልሐጂ ጀዋር መሀመድ እንደሆነ ቢታወቅም አሁንም ቄሱም መጽሐፉም ዝም ሆነላችሁ! ተረኝት ቁጥር ሁለት አትሉም ጎበዝ?

ከዚህ የቡራዩ የእልቂትና ማንነት መር የጅምላ ጭፍጨፋ ጥቂት ወራት ቆይቶ የፅንፈኛው ቄሮ አምበል ጀዋር መሐመድ ጥቃቶቹን አፏፋመ:: የደቡቧ ፈርጥ ወደ ሆነችው ውቧ አምባ (ሀዋሳ ጎራ ብሎ የኢጄቶም አምባል እኔው ነኝ በሚል መንፈስ እናንተ የክልልነት ጥያቄአችሁን አፋፍማችሁ ቀጥሉ መልስ ካላገኛችሁ በኃይል በመጠቀም ክልል እናደርጋችኋለን እናም ለ11/11/11 ቀጠሮ ሰጡና እስከዚያው የክልልነት ጥያቄአቸው ካልተፈፀም ጉድ ይወለዳል ብሎ ቀጭን ትዕዛዝ አስተላልፎ መጣ::

ውድ እንባቢያን እደምታስታውሱት በ11/11/11 የተወለደው ከጉድም በላይ ነበር በዝርያ ሲዳማ ያልሆኑ ኢትዮጵያዊያን እየተፈለጉና እየታደኑ በሀዋሳ ብቻ ላይሆን በአጎራባች ወረዳዎች ተጨፈጨፉ፣ በቤት ውስጥ እንዳሉ ሕፃናትና አረጋዊያን ሳይቀሩ ከነነፍሳቸው በእሳት እንዲጋፉ ተፈረደባቸው:: ሀብት ንብረታቸው ወደመ የተረፈውም ያለማንም ከልካይ ተዘረፈ አካላቸው ተጎድቶ ከሞት ያመለጡትም ተሰደዱ ተፈናቃይና ለማኝ እንዲሆኑ ተደረጉ::

ከሀዋሳው ሰቆቃ በግምት ከ3 ወራት በኋላ ለሚከበረው የኢረቻ በዓል አከባበር ውትወታ የተጀመረ በጣም ቀደም ብሎ ሲሆን ቅስቀሳውም የዘንድሮውን የኢሬቻ በዓል ለየት የሚያደርገው ከአንድ መቶ ሀምሳ(150) ዓመታት በፊት አዲስ አበባ ከተማ እንዳይከበር ተከልክሎ የነበረ በመሆኑና ዘንድሮ “ፊንፊኔ” በአዲስ አበባ ከተማ የሚከበር መሆኑ አቦ ሽመልስ አብዲሳ እንደ ማስታወቂያ ሠራተኛ በተደጋጋሚና በተለያዩ ጊዜ በመናገር የስልጣናቸው ማዳበሪያ ያደረጉት ሲሆን ለማ መገርሳን በመተካት አዲስ ሹም ስለነበሩ የስልጣንና የመድረክ ሙቀቱን ግለቱን የተቋቋሙት አይመስሉም ነበር::

አይደረስ የለም የ2012 ዓ.ም የኢሬቻ በዓልም ደረሰና ከዋዜማው ጀምሮ የመዲናችን የአዲስ አበባ አውራ ጎዳናዎች በትንሹ ከ5 ኪሎ ሜትር ራዲየስ (RADIOUS) ክርችም ተደርጎ የትራፊክ እንቅስቃሴ ከዜሮ በታች ሆኖ አደረ::

በዋዜማው የዚህ ጽሑፍ አቅራቢ ከካዛንቺስ አካባቢ እስከ መገናኛ ድረስ በትራንስፓርት እጦት መንገዱ በመዘጋቱም ምክንያት በእግር ጉዞ መሄዱን ያስታውሳል::

 የበዓሉ እለት ማለትም የ2012 የኢሬቻ እለት ሀገሬ (አዲስ አበባ ነዋሪ ሕዝብ) እቤቱ ቁጭ ብሎ በመዋል ሊከሰት ይችል የነበረውን ያላስፈላጊ ረብሻና ሊከፈል ይችል የነበረውን ያላስፈላጊ መስዋዕትነት በኢትዮጵያዊ ጨዋነትና ትዕግስት ቁጭ ብሎ በመዋል ታላቅነቱን አስመስክሯል ጨዋውና ወገን ወዳጁ አዲስ አበቤ::

 የሥልጣ ትኩሳቱን ያልቻሉትና ነፍጠኛንና ነፍጠኝነትን የክብረ በዓሉ ማድመቂያና ማጣፈጫ ያደረጉት ኦቦ ሽመልሽ አብዲሳ በበዓሉ ዋዜማ መቸም የማይረሳላቸውና ነውረኛውን ዲስኩራቸውን እንዲህ ሲሉ አቅራርተው ነበር::

አጠቅላለሁ “ከአንድ መቶ ሃምሳ ዓመት በፊት ተከልክሎ የነበረውን ኢሬቻን በዓል በፊንፊኔ ስናከብር በተሰበርንበት ቦታ ነፍጠኛን ሰባብረነዋል እንዲሁም 150 ዓመት በኋላ የሀገሪቱን መዲና ተቆጣጥረነዋል!! አሉልኝ ታላቅ ጦርነት ድል አድርጎ እንደገባ የጦር ጄኔራል::

ከዚህ በኋላማ አዲዮስ ዴሞክራሲ፣ አዲዮስ አንድነት፣ አዲዮስ መደመር ተረኝነቱ አፍጥጦና አግጥጦ የለውጥ ኃይሉ መመሪያ እንደሆነና የአንድነት፣ እኩልነት የመደመር ሰበካው የተረኝቱ ጭምብል መሆኑ በይፋ ተገልጦ የታዩበት ሆኖ አለፈ::

የአብይ አህመድ የመደመር የፎቶ ሾው ፍልስፍና ሆነ የፓርክ ግምባታ ጭምብል እንዲሁም የቲም ለማ የኦሮሚያ ሪፖብሊክን የመመሥረት ድብቅ አጀንዳ በኦቦ ሽመልሽ የመድረክና የሥልጣን ሙቀት አለመቻልና መቃተት ራቁቱን ሆኖ ፀሐይ ይመታው ጀመረ::

የኢሬቻ በዓል አካባበር ሙቀት ሳይበርድ ምናልባትም ከአንድ ወር ባልበለጠ የጌዜ ርቀት ጉደኛ አጀንዳ ብቅ ያለ ሲሆን ይኸውም ጠቅላይ ሚኒስትር አብይ አህመድ ያሉትንና የተናገሩትን ሁሉ ያላንዳች ማንገራገርና ማወላወል ለሚቀበላቸው የትህነግ/ ኢህአዴግ ፓርላማ በመጠቀም ሀገራችን ለጉዳትና ለብጠብጥ ለሚዳርጉ ሰዎች ያለንት ትዕግስት አልቋል በዚህ የሚቀጥሉ ከሆነና ከእኩይ ድርጊታቸው የማይታቀቡ ከሆነ የማያዳግም ህጋዊ እርምጃ እንወስዳለን በማለት ካስጠነቀቁ በኋላ በማታው አውሮፕላን ወደ ሞስኮ እብስ አሉ ተባለና በማታው ዜና ሰማን::

ይህችን የጠቅላዩን ንግግር የሰማን ሁሉ ጎሽ ለካ ለካ ጠቅላይ ሚኒስትራችን በጣም ትዕግስተኛ ስለሆኑ ነው እስካሁን የሖነው ሁሉ ሊሆን ዝም ያሉት::

ከአሁን በኋላ OMN ሰይጣናዊ መልእክት የሚያስተላልፍና ሕዝብን ከሕዝብ ለማባላት የዘር ማጥፋት ቅስቀሳ የሚያካሄድ ጽንፈኛ ሚዲያ (ቴሌቪዥን ስርጭት ይዘጋል ወይም የዚሁ ሚዲያ ባለቤት ጀዋር መሐመድ የተባለው ሰይጣዊ ሰው አደብ ይገዛል በሚል የእፎይታ ስሜት ሰላም ወዳዱ የኢትዮጵያ ሕዝብ የሰላም ተስፋ ሰነቀ::

ጠቅላዩ በዚያው ለፓርላማቸው ንግግር ባሰሙበት ቀን ምሽት ላይ ወደ ሞስኮ (ሩሲያ) መብረራቸው ከተሰማ ከጥቂት ሰዓታት ቆይታ በኋላ ንጉሠ ነገሥት አልሃጂ ጀዋር በካሳ በፌስ ቡክ ገፁ ተከብቤአለሁ ጥበቃዬም ተነስቶብኛል ቶሎ ድረሱልኝ በማት ለመናጆ መንጋው በማስተላለፍ ኡኡታውን አቀለጠዋል!!!

ከዚህ በኋለ የሆነውና የተፈፀመው እውን ይኼ ነገር እየተደረገ ያለው በቅድስት ሀገር ኢትዮጵያ ስም ነው ወይስ ሌላ ቦታ በማለት የታየውንና የሚታየውን የግፍ ተግባር ማመን እስኪያቅት ድረስ የሰው ልጅ በብሔርና በእምነቱ እየተመረጡ እንደ ከብት ታረደ፣ ጭንቅላቱ በመንጋ ድንጋይ ተፈጠፈጠ፣ በቤት ውስጥ እንዳለ ከውጭ ተዘግቶበት ከእነነፍሱ በእሳት ላንቃ እንደ ጧፍ ተንቀለቀለ፣ የሰው ልጅ አስከሬን እየተጎተተ ፎቶግራፍ መነሻና መሳለቂያ ተደረገ፣ ከ80 ዓመት እድሜ ታማሚ አልጋ ቁራኛ ሽማግሌ እስከ የአራት አመት እድሜ ህፃን ላይ የሰው ልጅ ለእርድ ቀረበ እጅግ ዘግናኝና አሳዛኝ ትዕይንት!!!

 ከ3 እስከ 2 ተከታታይ ቀናት ይኸ ሰቆቃ ኦሮሚያ ተብሎ በተሰየመው በተለያዩ ቦታ ተከናውነ:: ጀዋር መሐመድም ፎከረም አቅራራም በመጨረሻም አሁን ያለንን አቅም፣ ጉልበትና ኃይል አሳይተናል አቁሙ ብሎ መንጋውን አዘዘ:: ንጉሠ ነገሥት ዘ- ቄሮ ወ- አራጅ አል ሃጂ ጃዋር መሀመድ ያዘዘው ሁሉ ሆነ::

ስለዚህ የጀዋር መሐመድ በዘርና በእምነት ለይቶ ንፁሐን ኢትዮጵያዊያንን ማሳረዱና አቅምና ጉልበቱን ያላየበትን ሁኔታ በማድረቅና ደስታና አጋርነታቸውን ለመግለፅ

  1. ኦቦ ሽመልስ አብዲሳን የቀደማቸው ያለ አይመስለኝም እሳቸውም አሉ፡- የጀዋር መሐመድን ጥበቃ ያነሳ በህግ ይጠየቃል ጀዋርን እንጠብቀዋለን እና ባስቸኳይ ጥበቃው እንዲመለስለት ሲሉ ትዕዛዝ ሰጡ ለማን? ለፌዴራል ፖሊስ ኮሚሽነር ጄኔራል (ለፌዴራል ፖሊስ ጠቅላይ አዛዥ) ይታያችሁ አንድ የክልል አስተዳደር የሐገሪቱን የፌዴራል ፓሊስ አዛዥ አሻቅበው ትእዛዝ ሲሰጡ ይህ እንግዲህ ከተረኝት እብሪት በስተቀር ሌላ ምን ሊባል ይችላል? “የድርጅቱ እናቲቱን አንቺ ልጅየውን አንቱ”
  2. ኦቦ ደውድ ኢብሣ (የዛሬን አያድርገውና ሳይንሳፈፍ በፊት)
  3. ኦቦ ብርጋዴር ጄኔራል ከማል ገልቹ እና ሌሎችም የተለያዩ ባለስልጣናት በኦሮሚያ የሚንቀሳቀሱ የፓርቲ መሪዎች የእንኳን ደስ አለህ የአጋርነት መግለጫ በህብረት በዚያው በጀዋር OMN TV አስተላለፉ ጉድ ተባለ!!!

ይኼ ሁሉ የግፍ ግፍ ሲፈፀም በመሪ የሚያምነውና በመሪውም ተስፋ ያልቆረጠው ሰላም ወዳዱ የኢትዮጵያ ሕዝብ እንባውን እያነባም እያበሰም አንዳች ነገር ከጠቅላዩ ይጠብቅ ነበር እንዳው ጠቅላይ ሚኒስትሩ ይህን ሁሉ ጉድ አልሰሙ ይሆን? ለሞስኮ ጉብኝታቸውን ዳሰሳ ቁጥር 03 ጥቅምት 25 ቀን 2013 ዓ.ም. 13 አቋርጠው ይመጡና ሀገር ያረጋጋሉ ተብሎ ቢጠበቁ እሳቸው ምን በወጣቸው ቀስ ብለው፣ ዘንጠው ፎቷቸውን ተነስተው ስብሰባቸውን ጨርሰው እንኳን የ86 ንፁሃን ዜጎች ህይወትና ንብረታቸው (ይሄ ቁጥርር መንግሥት ባመነው መሠረት እንደሆነ ልብ ይሏል) የጠፋበት ሀገር መሪ ሊመስሉ አንድ ሰባራ ሳንቲም የጠፋበትም ነጋዴም አልመሰሉ ያልተነካ ግልግል ያውቃል አይደል ወጉስ!!!

 ከሞስኮ ከተመለሱም በኋላ ከዛሬ ነገ መግለጫ ይሰጣሉ በፓርላማቸውም ፊት ለኢትዮጵያ ሕዝብ ባለሙት ንግግርና ለጀዋር መሀመድ በሰጡት ማስጠንቀቂያ መሠረትም ጀዋርን በቁጥጥር ስር አውለው ለህግ ያቀርባሉ ተብለ ሲጠበቁ እሳቸው እቴ!!! ወይ ንክች ያባቢለዋ ልጅ!!!

ለካስ ጀዋር መሀመድ የተፈቀደለት ወንጀለኛና ኢትዮጵያ ሀገራችንን ለመበተን ቡራኬ የተሰጠው አካይስት ኖሯል ወገን?

በግምት ከሞስኮ ከተመለሱ (ጠቅላዩ ማለት ነው) ከ10 ቀናት በኋላ ይመስለኛል በማንነታቸውና በሚያራምዱት እምነት ምክንያት እየተለዩ በምስራቅ፣ በደቡብ ምስራቅና የመአከላዊ ኢትዮጵያ ለተጨፈጨፉ አስከሬኖች ብሔርን ቁጥር በመስጠት በጉጉት ይጠበቅ የነበረውን መሪያዊ መግለጫ ውሃ በመቸለስ አይነት ኩም ካደረጉን በኋላ የጃዋር መሐመድ መንጋ በዋንኛነት በሰዎች አካልና ህይዎት እንዲሁም በንብረት ማውደምና አቢያተክርስቲያናትን በማቃጠል አደጋ ከደረሰበት የሀገራችን ክፍል ወደ ሐረር ከአጋር ባለሥልጣኖቻቸው ጋር በመሄድና ስብሰባ በመቀመጥ ጃዋር መሀመድ ወንድማችን ነው ለምን እንገለዋለን እስካሁን አብረን እየሠራን ነበር አሁንም አብረን እንሠራለን እንጠብቀውማለን በማለት ቢደሰኮሩልንና ጀዋር ኢስኮርታችን ነው ብለው ቁርጣችንን የነገሩንን በማሰብ ወደፊት የጨለማ ጊዜ እንደሚመጣና ትግሉ የመረረና የከረረ እንደሚሆን ነቢይ መሆን አላስፈለገንም ነበር::

ከዚያም ጊዜ በኋላና ያንን ሁኔታ ተከትሎ በተለያዩ የሀገራችን ክፍሎች በተለይም በቤኒሻንጉል ክልል ማንነትን መሠረት ያደረጉ እርዶችና የሰው ልጅ ደረትና ጭንቅላት የቀስት ጦር ማነጣጠሪያ እስኪሆን ድረስ በቁጥር ለሚታክት ጊዜ በተደጋጋሚ የሰው ህይዎት ሲቀስፍ የከረመበት ሁኔታ የትናንት ትዝታ ሲሆን በተለይ ደግሞ ከዛሬ 1 ወር በፊት በሚሆን ጊዜ አቦ ሽመልስ አብዲሳና አቶ አሻድሊ ሀሰን የቤኒሻንጉል ጉሙዝ ርዕሰ መስተዳደርን የአማራ ክልል ባለሥልጣናት የክብር ካባ ብለው ከሸለሙ ምናልባትም ከሽልማቱ 15 ቀናት በኋላ በቤኒሻንጉል ጉሙዝ ክልል በሚገኘው የመተከል ዞን (የቀድሞው ጎጃም ክፍለ ሀገር አንድ አውራጃ የነበረ መሆኑን ያጤናል) አስተዳደር አካላት በሆኑት የተለያዩ ወረዳዎች የአማራ/አገው ማንነት ባላቸው ነፃ በሆኑ የኢትዮጵያ ዜጎች ላይ በቀስት ወንጭፍና ዘመናዊ ትጥቅ በታጠቁ ወንበዴዎች ግድያ የንብረትና የቤት ቃጠሎ በተካሄደበት ወቅት የነፍሰጡር እናት ሆድ በሳንጃ ተቀዶ በማሕፀን ውስ የነበሩና ለመወለድ ጥቂት ጊዜ የሚቀራቸው ህፃናት ሜዳ ላይ ጫካ ውስጥ ተጥለው የታዩበትን ሁኔታ ወላድ ሁሉ ምን ሊል እንደሚችል ፍርዱን ለአንባቢ እተወዋለሁ::

 እንግዲህ እኚህ የክልል አስተዳደር ናቸው ም/ጠቅላይ ሚኒስቴር ደመቀ መኮንን መተከል ከጎበኙ በኋላ ህብረተሰቡ መንግሥት ይደርስልናል ብሎ መጠበቅ የለበትም:: ይልቅስ ራሱን አስታጥቆ አካባቢውንና ቤተሰቡን እንዲሁም ራሱን መከላከል ይገባዋል አሉ:: አቶ አሻድሊ ሀሰን ይክፉም ይልማ የሀገሪቱን ም/ ጠቅላይ ሚኒስትር ሲተቹ የም/ጠ/ሚ/ውን ንግግር ከአንድ ከማይረባ ሰው የሚጠበቅ ንግግር አይነት እንደሆነና እኛ ከፈለግን “እነ አቶ አሻድሊ ሀሰን” በአንድ ቀን ድምጥማጡን ነው የምናጠፋው ማንን? አማራውንና አገውን ስለዚህ ብንከባበር ይሻላል በሚል ዛቻ አቶ ደመቀን አሻቅበው ያስጠነቀቁበት ሁኔታ አሁንም የፍንጅርቱ እናቲቱን አንቺ ልጅየውን አንቱ” ብሄል እንድናነሳ ያስገድደናል::

 ይህ በአንዲህ እንዳለፈና ምናልባትም ከዚህ ትዕይንት ቀደም ብሎ በሀገራችን በደቡብ ክፍል የሚገኘው የወላይታ ዞን የክልልነት ጥያቄ አንስቶ ተግባራዊነቱን ለማፍጠን የአደባባይ ተቃውሞና የጥያቄው መልስ ይፈጥን ዘንድ ሰልፍ በወጡ ዜጎች ላይ የግድያና የአካል ማጉደል ርምጃ የተወለደበት ሁኔታ ሳንዘነጋ አሁን በዚህ ወቅት የዚህ ጽሑፍ እራቢ የታዘባቸውን ነገሮች በሚከት ትብብር ሁኔታ አሁንም በሀገራችን ደቡብ በሚገኘው የጉራ ፈረዳ ወረዳ ማንነትን መሠረትና ምርኩዝ ያደረገ ከላይ በተጠቀሱት አረመኔያዊ የአገዳደል የጭካኔ ስልት በመጠቀም አካባቢውን የዞን ደረጃ ለመስጠት የሚፈልጉ የታጠቁ ኃይላት (ሽኮዎች) ይላቸዋል:: ዜናው ንፁሐን ዜጎች እየተጨፈጨፉ ይገኛል::

 መንግሥት እርምጃ ምን ይሆን? ይህን? የነፍስ አድን እርምጃ መውሰድ ይሆን? ወይስ አሁንም መጽሐፉም ዝም ቄሱም ዝም ይሉ ይሆን::

 ስለዚህ ይህች ቅድስት ሀገር ኢትዮጵያ ለሰላም ወዳዱ ህዝቧ ላይን ለአምባገነንና ጨፍጫፊ መሬዎችና ጀሌዎቻቸው የገፀ በረከት የተሰጠች ሀገር እስከምትመስል ድረስ የሚተካኩት መሪዎች ሁሉ በተለይም ከሺህ ዘጠኝ መቶ ስልሳ ሰባት ዓ.ም (1967) ወዲህ በኢትዮጵያ የቅዥት መንበር ላይ ፊጥ ያሉ መሪዎ የኃይማኖት መሪዎ የማይገደዷቸው፣ ሚኒስተሮቻቸው ተቃውሞ የማያቀርቡባቸው ይልቅ እጅ በመንሳትና ሲያስነሳላቸው ጭምር በማጨብጨብ በአምባገነንነት እብሪት እንዲያብጡ የሚያበረታቷቸው፣ በቅርብ ጓደኛ ምክር የማይሰማቸው ሲፈልጉ የሚበትኑት ሲፈልጉ የሚደምሩት ሕዝብና ሀገር ነው ለካ ያላቸው::

የካቢኔ ሚኒስትሮች የጠ/ሚው፣ እንጂ የኢትዮጵያ ሕዝብ እንዳልሆነ የጠርና የጠርና የፀጥታ ኃላፊዎችም እንዲሁ የሾሚ አለቃቸው እንጂ የኢትዮጵያ ሕዝብ እንዳልሆኑ ሁሉ ሕዝብ በዘፈቀደ በሚሰቀጥጥ ሁኔታ ተጨፍጭፎ ሲያልቅና የሀገር ሀብትና ንብረት ሲወድም፣ ሀገር መስራች ብቻ ሳትሆን በራሷ ሀገር የሆነችና የብዙ የሀገር ውለታዎች ባለቤት የሆነችው እናት ተዋህዶ ቤተክርስቲያን ስትደፈር፣ ስትቃጠል ስትወድም ዝም ብሎ ባልታዘዝኩም አባዜ ቆሞ የመመልከት ነውር እየተሰራባት ያለች ምናልባትም ከአምላክ በስተቀር ባለቤት የሌላት ሀገርና የዓለም አቀፍ ማህበረሰብም በአላየሁም አልሰማሁም አውቆ አይን የመጨፈን ተንኮልና ይች ሀገር ከሊግ ኦፍ ኔሽንስ (League of Nationes) የመጀመሪያውና የከሸፈው እንዲሁም በኢትዮጵያ ምክንያት የፈረሰው የንጉሠ ነገሥቱ የድረሱልኝ ጥሪ ውድቅ ያደረገበትና በኢትዮጵያና በወራሪው ኢጣሊያ ላይ እኩል የመሣሪያ ሽያጭ ማዕቀብ የጣለበት ክህደት::

በሁለተኛው ደረጃ በ1990 እ.ኢ.አ የኢትዮጵያ ኤርትራ ጦርነት ወቅት ወራሪንና ተወራሪን በአንድ የተንኮል አይን በማየትና ኢትዮጵያ እንድትፈራርስ በእነኸርማን ኮህን የተደረገብን አለማቀፋዊ ደባ ከዛሬ ሦስተኛው ደረጃ ከዛሬ ሦስት ዓመት ወዲህ፣ በዚህ ባለንበት ዘመንና በአሁኗ ሰዓት ጭምር ተከታዮችን እንዲሁም ቅድስት የተዋህዶ ቤተክርስቲንን ለይቶ ኢላማ በማድረግ በራሳችን መሪዎችና በጽንፈኞች ብሔርተኞች እየደረሰ ያለውን ስብአዊ፣ ቁሳዊና መንፈሳዊ ውድመት ሊተባበሩት መንግሥት ጽ/ቤት ለተለያዩ ሰብዓዊ ጉዳይ ይመለከተናል ለሚሉ ዓለማቀፋዊ የሰብዓዊ መብት ተሟጋቾችና የሰላም ወዳዱ አለማቀፋዊ ህብረተሰብ በጀግናው የሕዝብ ልጅ ጋዜጠኛና የሰብዓዊ መብት ተሟጋች በሆነው እንቁ ኢትዮጵያዊ በታላቁ እስክንድር ነጋ አማካኝነት ኢትዮጵያ ለመላው ዓለም ብታሳውቅም አሁንም በቸልታ በማዬትና እንደ ሩዋንዳ የሁቱና ቱትሲ ኢንተር ሀሞይ ፍጅት አስከሬን ሊቆጥሩ ይመጡ ይሆን? ከዚህ በፊት ለኢትዮጵያ የሚደርስላት የነገሥታት ንጉስ የአማልካቾች አምላክ ቸሩ መድኃኒያለም አይዘነጋትም አሁንም ኢትዮጵያ እጆቿን ወደ እግዚአብሔር ትዘረጋና የህዝቧም እንባ ወደ አምላካቸው ጎርፍ ሆና ይፈስ ዘንድ ግድ የሚለን ጊዜ ላይ ነንና አምላካችን ይድረስልንና ፅናትና ጥንካሬውን ይቸረን ዘንድ ሁላችንም በአቋማችን እንፅና!!!

 ንቁም በበህላዊነ እስከንረክቦ አምላክነ ያለውን የሊቀመላኩ ቅ/ገብርኤልን ጽናት ጥንካሬ ይስጠን።

ወስበሀት ለእግዚአብርሔር! አሜን (3)

የማንነት ፖለቲካ ምንነትና አደጋዎቹ ባህላዊ ማንነትን ፖለቲከኛ ስናደርግ ያመረትናቸው ችግሮች(ገለታው ዘለቀ )

የማንነት ፖለቲካ ይህን ስያሜውን ያገኘውና በሚታይ መልክ ብቅ ያለው በ20ኛው ክፍለ ዘመን አጋማሽ ላይ ነበር። በዚሁ ወቅት የሴቶች ንቅናቄ፣ የጥቁሮች ንቅናቄ፣ የአካለ ስንኩላን ንቅናቄዎች፣ የብሔር ንቅናቄ በስፋት የታዩበት ጊዜ ነበር። የማንነት ፖለቲካ ወደ አካዳሚክ ዲስኩር የገባውም በዚሁ በቅርቡ ነበር።

የማንነት ፖለቲካ ስንልም በእነዚህ ማንነቶች ላይ የሚሰራ የፖለቲካ ቤት ማለታችን ነው። ወደዚህ ፖለቲካ የሚገቡ ሃይሎች ደግሞ የፕራይሞርዳያሊዝም ፍልስፍና አማኞችና ኢንስትሩመንታሊስቶች ናቸው ማለት ነው።

የማንነት ፖለቲካ በቡድን የወል ግብር፣ የወል ስብእና፣ የወል እሴት፣ የወል ቋንቋ፣ የወል መልክ ላይ የሚቆም የፖለቲካ ስልጣን ሩጫ ሲሆን ከማንነት ፖለቲካ ውስጥ አንዱ ቅርንጫፍ ደግሞ የብሄር ፖለቲካ ነው።

 ሃይማኖታዊ ፖለቲከኛነት ከማንነት ፖለቲካ ጋር የተያያዘ በመሆኑም ዓለም ያሳለፈችበትን የፖለቲካ ሕይወት ስናይ በተለይ በሃይማኖት ላይ የተመሠረተ የሕዝብ አስተዳደር ቀደምትነት ያለው ሆኖ እናያለን።

 ወደ ብሔር ፖለቲካ ስንመጣ እንደሌሎቹ የማንነት ፖለቲካዎች ሁሉ ማዕከላዊ ጉዳዮች ይኖሩታል። ከነዚህም ውስጥ የእውቅና ጉዳይና የሶሺዮ ኢኮኖሚክ ጉዳይ ዋና ዋናዎቹ ናቸው። ገለታው ዘለቀ (የባልደራስ ፅህፈት ቤትና ሕዝብ ግንኙነት ሓላፊ) የማንነት ፖለቲካየማንነት ፖለቲካ የማንነት ፖለቲካ የማንነት ፖለቲካየማንነት ፖለቲካ ምንነትና አደጋዎቹ ባህላዊ ማንነትን ፖለቲከኛ ስናደርግ ያመረትናቸው ችግሮች ቁጥር 02 መስከረም 19 ቀን 2013 ዓ.ም. 11 በማንነት ፖለቲካ ውስጥ በተለይም የአሜሪካ የጥቁሮችን ንቅናቄ ስናይ፣ የሴቶችን ንቅናቄ ስናይ የእውቅና ጉዳይ ማዕከላዊውን ቦታ ይይዛል። በአንፃሩ የኢትዮጵያን የብሔር ተኮር ፖለቲካ ስናይ ከእውቅናም ባሻገር የሶሺዮ ኢኮኖሚክና ሌሎች እድሎችን በቀጥታም በህቡዕም ይዞ የመነሳት ፍላጎት ይታይበታል።

የማንነት ፖለቲካ የምንለው በእንግሊዘኛው Identity የሚል ስያሜ ያለው ሲሆን የመለየት (separation) ፖለቲካ ማለት ነው። ራሳችንን ከሌላው የሚለየንን ነገር በማውጣት በዚያ ላይ የሚቆም ፖለቲካ ማለት ነው። አይደንትቲ የሚለው የእንግሊዘኛ ቃል ምን ያህል በሚመጥን መልኩ ተተርጉሞ ማንነት እንደተባለ አላውቅም። የማንነት ፖለቲካ ከሚባል የመለያ ፖለቲካ ቢባል የተሻለ ይመስላል። ለማናቸውም ግን ፖለቲካችን በአይደንትቲ ላይ ከቆመ በልዩነት ላይ ቆመ ማለት ሲሆን በዚህ ጊዜ በከፍተኛ ሁኔታ ዜጎች ራሳቸውን ከሌላው በሚለያቸው ነገር ላይ ትኩረት እንዲሰጡ የሚያደርግ ከባቢ ውስጥ እንገባለን። ቡድኖች ልዩነታቸውን ያጠብቃሉ። ልዩነት በጣም ሞቅ ያለ ጉዳይ ይሆናል ማለት ነው። ለምን ልዩነትን ይፈልገዋል? ለምን ያጎላዋል? ካልን አንዳንዱ በአሲምሌሽን ደንብሮ ሲሆን አንዳንዱ ደግሞ በብሄር ኢንተርፕሩነርስ እየተነዳ የሚሄድ ስለሆነ ነው። አሲምሌሽን ያስፈራው አካል ደንብሮ ጽንፍ ሄዶ የልዩነት ፖለቲካ አምጥቶ ራስን በራስ ማስተዳደር በየቤት ማደር እያለ ሲሰብክ እንዲሁም ደግሞ አንዳንድ የፖለቲካ ስልጣን ጥም ያላቸው ነገር ግን ተወዳድረው ማሸነፍ ሲያቅታቸው አቋራጭ የስልጣን መስመር አድርገው የሚያዩት ይህ የልዩነት ፖለቲካ በመሆኑ በዚያ ላይ ለመወጣጣት ስለሚጠቀሙበት ነው። ኢትዮጵያን መቃረጥ ይፈልጋሉ። በተለይ በብዙህ ሃገራት ውስጥ በኣንጻራዊነት የብሄር ፖለቲካን የሚፈልጉት ለሂቃን የሚነሱት ከሁለት ኣቅጣጫ ሲሆን በጣም ኣነስተኛ ብዛት ካለው ቡድንና ከፍተኛን ቁጥር ከሚይዘው የብሄር ኣባላት መካከል ሆኖ ይታያል። ይህ የሚሆንበት ምክንያት ኣነስተኛ ቁጥር ያለውን ቡድን ወክለው ማእከላዊ መንግስትን ለመቆጣጠር የሚሹት የብሄር ኢንተርፕሩነርስ የሚኖራቸው ድብቅ ኣጀንዳ በብዙሃኑ ዋጋ በቀላሉ ቡድናችንን መለወጥ እንችላለን፣ ቡድናችንን ካሳመጽነው ብዙሃኑን ስለሚፈራና ለውጥን ስለሚፈራ ኣጥብቆ ይደግፈንና ረጅም ዘመን እንገዛለን የሚል ሲሆን ብዙ ከሆነው ብሄር የሚወጡ ኢንተርፕሩነርስ ደግሞ ይህን ብዛት ይዘው ስልጣን ይገባኛል ለማለት ትልቅ የመከራከሪያ ሎጂክ ስለሚመስላቸው ነው። ቁጥሩን ይዘው በዚህ ቁመት ልክ ይገባኛል እያሉ መቆየቱ ወደ ስልጣን ያመጣናል ብለው ስለሚያምኑ ከዚህ ብዙሃን የሚወጡ ኢንተርፕሩነርስ ይህንን ግዝፈት ለስልጣን መወጣጫ ሊጠቀሙበት ስለሚፈልጉ የብሄር ፖለቲካ እንዲጠፋ ኣይፈልጉም። ወደ ስልጣን ለመሄድ መንገድ ያቀላል ብለው ያምናሉ። ብዛቱን ይዘው ፍረዱን ይላሉ። ያ ኣነስተኛ ቁጥር ያለው ስልጣን ላይ ካለ ደግሞ በብዙው የምጠቀመው ኣለ ብሎ ስለሚያምን እንዲሁ የብሄር ፖለቲካው ይጠቅመኛል ብሎ ኣለቅም ይላል። በዚህ መሃል ቁጥራቸው በመሃል ያሉ ወደ ስልጣን ያልመጡት ብሄሮች ደግሞ ብሄራዊነት ይሻላል፣ በኣይዲዮሎጂ ላይ ተመስርተን ወደ ስልጣን እንሩጥ የሚል ነገርን ማራገብ ይመርጣሉ። በኣጠቃላይ የብሄር ፖለቲካ በዚያም በዚህም ከፍትህ ጥያቄ ይልቅ የጥቂት የስልጣን ጥመኞች ኣቋራጭ መንገድ ተደርጎ ስለሚወሰድ በጣም ተወጋዥ ያደርገዋል።

በአጠቃላይ በአሁኑ ጊዜ በዓለማችን ላይ በማንነት ፖለቲካ ጐልተው የሚገለጹት የብሔር ፖለቲካና የሃይማኖት ፖለቲካ ሲሆኑ መንግሥታቸውን በሃይማኖት ማንነት ላይ ያቆሙ እንደ ሳውዲ አረቢያ ያሉ አገራት በቀደምትነት ይጠቀሳሉ። እነዚህ አገሮች ሃይማኖታዊ በሆነ ሕግ የአገሮቻቸውን ሕገ-መንግሥት የሚያስተዳድሩ ሲሆን ብዙ አገራት ግን መንግሥትንና ሃይማኖትን፣ ዘርን ወይም ብሄርንና ፖለቲካን ነጥለው ወደ ዘመናዊ አስተዳደር ተሻግረው ይታያል። ወደ ብሔር ፖለቲካ ስንመጣ በአንዳንድ አገራት ለምሳሌ ሕንድና ኔፓል እንዲሁም በተወሰነ ደረጃ ኢንዶኔዥያ የሚታይ ሲሆን በብሔር ፖለቲካ ውስጥ ደፍሮና ጠልቆ የገባ እንደ ኢትዮጵያ የለም። ኢትዮጵያ ከሌሎች አገራት በተለየ መንገድ በጥልቀት የብሔርን ፖለቲካ የምታራምድ አገር ናት። የብሄር ፖለቲካዊ ማንነት እስከ መገንጠል የሚሄድባት አገር በዚህች ፕላኔት ላይ ኢትዮጵያ ናት። ኢትዮጵያ ወደዚህ ፖለቲካ በመምጣት ያተረፈችውንና ያጣችውን እያነሳን ከመወያየታችን በፊት በአጠቃላይ የብሔር ፖለቲካ ምን ተፈጥሮ እንዳለው እንይ።

የብሔር ፖለቲካ የማንነት ፖለቲካ ነው ስንል በተለይ ብዙህ በሆኑ አገሮች ብሔሮች በባህላዊ ቡድነኝነት ላይ የተመሠረተ የፖለቲካ ድርጅቶችን ይመሠርቱና በዚህ ባህላዊ ማንነት ላይ ለዚህ ባህላዊ ማንነት ጥላ ሆነው የሚቆዩበት ጠገግ ነው። በርግጥ ፖለቲካ ምንጊዜም ቢሆን ከማንነት አይወጣም። ብሔራዊ አጀንዳ ይዞ የሚመሠረት የፖለቲካ ድርጅትም ያው ብሔራዊ ማንነትን እንደ ማንነት መገለጫው አድርጎ ነው የሚቆመው። ጥያቄው ፖለቲካ ከአካባቢ ማንነት ወደ ሃገራዊ ማንነት ማደግ አለበት ነው።

የብሔር ፖለቲካ ችግር የቡድንን ማንነት እንደማይለወጥ አልፋና ኦሜጋ ማየቱ ነው። ይሁን እንጂ ብዙ ብሔር ባለበት አገር አንድ ብሔር የራሱን ቡድን ልዩ ቋንቋ ሲናገር በማየቱ ለይቶ ቢያየውም ሁዋላ ወደ ውስጥ ማየት ሲጀምር ማይክሮ ማንነቶች መታየት መጀመራቸው አይቀርም። ከብሔር በታች ያሉ ጎሳ እንበለው ወይም ሌላ እንበለው ሌሎች አነስተኛ ክፍፍሎች መድመቅ ይጀምራሉ። የመልክዓ ምድር ክፍፍሎች፣ የአነጋገር ዘየዎች ሳይቀሩ ለብቻ ስንሆን ልዩነት ሆነው መውጣታቸው አይቀርም። በመሆኑም የልዩነትን የመጨረሻ ቅንጣት ፍለጋ ያንከራትተናል። ለዚህ ነው ዘመናዊ ዴሞክራሲ በሰው ልጆች ልዩነት የመጨረሻ ቅንጣት በሆነው የግለሰብ ልዩነት ላይ መመሠረት ይሻላል ብሎ የሚያምነው። በግለሰቦች መብት ላይ ያተኮረ ከዚያም ቡድኖችን የሚንከባከብ የፖለቲካ መሠረት መፍጠሩ መንግሥት የገዛ ህዝቡን ለመድረስና ለመርዳት ቀና መንገድ ይሆንለታል። እንደ ኢትዮጵያ ባለች አገር ውስጥ ልዩነትን እናንሳ ካልን ከብሔር በላይ ነገድ አለ። ከዚያም ደግሞ ሰሜን፣ ደቡብ፣ ምስራቅ፣ ምእራብም ልዩነትን ሊሰሩልን ይችላሉ። ከፈለግን።

 በሳይንሳዊ ክፍፍል የዘር ቆጠራ የናይሎ፣ የኩሽ፣ የሴምና የኦሞ ቋንቋ ተናጋሪዎች ነን። ወደ ታች ደግሞ በብሔር ከዚያም ጎሳ እያለ የደም ሃረግን ተከትሎ ይወርዳል። በብሔር ላይ የፖለቲካ ቤትን ለመሥራት የሚያስችል የፍልስፍና መሠረቱ ብዙ ግልጽ አይደለም። አንዳንዶቹ ብሔርን ከደም ሐረግ ጋር በማያያዝ ቡድኖች በብሔር ላይ የተመሠረተ የፖለቲካ ጨዋታ ቢያደርጉና ፌደራሊዝም በዚያ ቢቀረጽ አስተዳደሩ ትጋትንና ርኅራኄን ተግባቦትን ያመጣል ከሚል ይመስላል። ችግሩ ግን ማይክሮ ማንነቶች ማለቂያ ስለሌላቸው ይህ ፍልስፍና ትርጉም እንዲያጣ ያደርገዋል፡ : በአጠቃላይ ስናይ የብሄር ፖለቲካ በሁለት ይከፈል ይመስላል። አንደኛው ፕሪሞርዲያሊዝም ሲሆን ይህ ኣስተሳሰብ ብሄርን የደም ሃረግ ውጤት አድርጎ ያያል። የብሄሩን አባላት የሚያስተሳስረው ውጪያዊ የሆነው ባህልና ቋንቋ ብቻ ሳይሆን የስነ ህይወት ትስስር ጉዳይ አለ ብሎ ያምናል። በዚህ ፍልስፍና ላይ የሚቆም የብሄር ፖለቲካ የፕሪሞርዲያሊዝም እምነት የሚከተል ነው ማለት ነው። በሌላ በኩል በብሄር ላይ የተመሰረተ ፖለቲካ ባህልንና ቋንቋን እንደ ማንነት መገለጫ ኣይቶ በነዚህ ልዩነቶች ላይ የፖለቲካ ቤቱን ሰርቶ ነገር ግን ብሄርን የደም ትስስር ውጤት ኣድርጎ ኣያይም። የፕሪሞድሪያሊዝም ተቃራኒ የሆነው አስተሳሰብ ብሄርን ማህበራዊ ስሪት ወይም ሶሻሊ ኮንስትራክትድ ነው ብሎ ያምናል። ይሄ እምነት ብዙ የዓለም ምሁራንንና ፖለቲከኞችን ይገዛል። ይህ ማለት አንድ ሰው እናትና ኣባቱ ኦሮሞ ሆነው ትግራይ ውስጥ ተወልዶ ቢያድግና ትግርኛ ቢናገር የትግራይ ብሄር ይሆናል ማለት ነው። ማንነት የሚገጸው በዘር ሳይሆን በቋንቋና ባህል ነው። በዚህ አገባብ ብሄር የፖለቲካ ጽንሰ ሃሳብ ነው ማለት ነው። በኢትዮጵያ ሁኔታ ስናይ ግን የብሄር ፖለቲካው የተመሰረተው በፕራይሞር ዳያሊዝም ኣስተሳሰብ ነው። ስለሆነም የብሄር ፖለቲካ ወይም ብሄር በኢትዮጵያ ውስጥ የፖለቲካ ጽንሰሃሳብ ሳይሆን የማይነካ የማይገሰስ የደም ሃረግ ጨዋታ ነው ማለት ነው።

 ኢትዮጵያ እንግዲህ የፖለቲካ መሠረቶቿን ያደረገችው በዚህ ከላይና ከታች ልዩነትን ፖሊሲ የማንነት ፖለቲካ የማንነት ፖለቲካ 12 ቁጥር 02 መስከረም 19 ቀን 2013 ዓ.ም. በከላና በአንድ ቋንቋ ተናጋሪ ማህበረሰብ ላይ በቆመ የፖለቲካ መሠረት ላይ ሲሆን ኢትዮጵያ ከሌሎች አገሮች ማለትም የብሔር ማንነትን ወደ ፖለቲካ ካስጠጉ አገሮች የምትለየው ከብሄር ፌደራሊዝሙ ባሻገር የብሄር ፖለቲካን በማስተናገዷ ነው። ለዚህ ነው እንደ ኢትዮጵያ የብሔር ፖለቲካን ጠልቆ የገባበት አገር የለም የሚያስብለን። ለምሳሌ ስዊዘርላንድን ብንወስድ አስተዳደሯ ለቋንቋ ትኩረት የሰጠ ሲሆን ነገር ግን የፌደራል ስርዓቷ በካንቶኖች የተከፋፈለ ነው። ስዊዘርላንድ ውስጥ አራት የቋንቋ ኮሚኒቲዎች ያሉ ሲሆን አስተዳደሯ ግን በሃያ ስድስት ካንቶኖች ወይም ስቴቶች የተዋቀረ ነው። ገዢ ፖለቲካዋም በብሄራዊ ማንነት ላይ የተመሰረተ በስዊዝ ማንነት ላይ የተመሰረተ ነው። በአንፃሩ ኢትዮጵያ ብሔራዊ ማንነት ያላቸውን ፓርቲዎች ከውጪ በሪዘርቭ አስቀምጣ ዋናውን የፖለቲካ ሜዳ የያዙት የብሔር ፖርቲዎች ናቸው። በኢትዮጵያና በስዊዘርላንድ መካከል ያለው ዋና መሰረታዊ ልዩነት የስዊዘርላንድ ቡድኖች ለስዊዝነት የሰዋቸው ጉዳዮች አሉ። ከነዚህም ውስጥ ፖለቲካዊ ማንነትና ግዛት ናቸው። እነዚህን ሁለቱን ስዊዝ የወሰደችው ሲሆን ከዚያ በመለስ ያለውን ቋንቋና ባህልን ግን ቡድኖች ጠብቀው ይኖራሉ። ኢትዮጵያ በአንጻሩ ለኢትዮጵያዊነት ያስቀረችው ቁምነገር የለም። ፖለቲካዊ ማንነት፣ ግዛት፣ ታሪክ፣ ቋንቋ ፣ባህል ሁሉ በየቡድኑ የተያዙ ናቸው። ለኢትዮጵያዊነት እንደስዊዝ የሰዋነው ባለመኖሩ ነው ትልቁ ልዩነት።

 ሕንድ አገር በርግጥ አንዳንድ በማንነት ላይ የቆሙ አካባቢያዊ ፓርቲዎች ቢኖሩም ሥልጣኑን የያዘው በብሔራዊ ማንነት ላይ የተመሠረተ ፓርቲ ነው። ጥቂት የሆኑት የብሔር ፓርቲዎች ከኢትዮጵያ በተቃራኒው ከውጪ በተጠባባቂነት የተቀመጡ ተፅዕኖ የሌላቸው ናቸው። እንዴውም ህንድ አሁን ከማጠፋቸው ራሱ ጊዜ እየጣላቸው ይሄዳል ብላ ለጊዜው ችላ ያለቻቸው ነው የሚመስሉት።

የኢትዮጵያ የብሄር ፖለቲካና ፌደራሊዝም ከውስጥ ወደ ውጭ ሲታይ

 የብሄር ፖለቲካ ዓለማቀፋዊ ቢሆን ዓለም ምን ትሆናልች?

በአጠቃላይ ዓለም በተለይ የብሄር ፖለቲካን ከሰፈሯ አርቃ ነው የሚታየው። ርግጥ ነው በጥንት ጊዜ የፖለቲካ ርእዩት ባልዳበረበት ጊዜ ዓለም በጎሳና በነገድ አስተዳደር ስር ቆይታለች። ይሁን እንጂ የአሁኗ ዓለም ከጎሳ ይልቅ በርእዮት ላይ የተመሰረተ ፖለቲካና ዴሞክራሲ ስለማረካት ይህንን ፖለቲካ ትታው ይታያል።

እስቲ እንደዚህ እናስብ። ከፍ ሲል እንዳልነው የብሄር ፖለቲካን አለማቀፍ እናድርገው እስቲ። በእንበል ገበያ ውስጥ እንሁንና የዓለም ሃገራት የኢትዮጵያን የፖለቲካ ተመክሮ ወስደን ፖሊሲ በብሄር እንደራጅ ቢሉ ዓለም ምን ትሆናለች? ብለን እንጠይቅ። ዓለም የብሄር ፌደራል ስርዓትን ልከተል ብትል፣ በየብሄሯ በየቋንቋዋ ፖለቲከኛ መሆን ቢያምራት ዓለም ትፈርሳለች። ሃገሮች ሁሉ ይፈርሳሉ። የብሄር ፖለቲካ ዓለምን ያፈርሳል። ሩቅ ሳንሄድ አህጉራችንን አፍሪካን ስናይ አንድ ቋንቋ የሚናገሩ አፍሪካውያን በሁለትና በሶስት የአፍሪካ ሃገር ተበትነው ይታያል። ለምሳሌ የኪንያሩዋንዳን ቋንቋ የሚናገሩ ማህበረሰቦች በሩዋንዳ፣ በዴሞክራቲክ ሪፐብሊክ ኮንጎና በኦጋንዳ ይገኛሉ። አፍሪካ እንደ አህጉር 3000 የሚገመቱ ብሄሮች ያሏት ሲሆን በአማካይ 56 ብሄር በአንድ የፖለቲካ ጠገግ ስር ሰፍሯል ማለት ነው። አፍሪካ በብሄር ፖለቲካ ውስጥ ብትገባ ወይም ወደየ ብሄሯ ማሸጋሸግ ብትፈልግ አህጉሪቱ ትፈርሳለች ብቻ ሳይሆን ፈርሳም አገር አትመሰርትም። የብሄር ፖለቲካን በዓለም አደባባይ ላይ ስናየው ዓለምን የሚያፈርስ ሲሆን በኛ አገር ተጨባጭ ሁኔታ ደግሞ በገዛ ቤታችን ውስጥ ያመጣብንንና ሊያመጣብን የሚችለውን ችግር ዝቅ ሲል እንመልከት። በዚህ ዘመን የብሄር ፖለቲካን እንከተል ስንል የሚከተሉትን ችግሮች እናተርፋለን። ሚዛናዊ ለመሆን ያሉትን ጥሩ ጎኖችም እንዘረዝራለን። በመጀመሪያ ከሚበዛው አሉታዊ ጎኑ እንነሳ።

አሉታዊ ጎኖቹን አንድ ሁለት እያልን ከማንሳታችን በፊት እስቲ አንድ ዝንባሌ የሚስብ ጥያቄ በአረማሞ እናንሳ። ጥያቄው ይህ ነው። የሰውን ልጅ ማንነቶቹን ሁሉ ፖለቲከኛ ስናደርግበት ሰው ምን ይሆናል? ምን ዓይነት ማህበር ይመሰርታል?

የሰውን ሁለንተናዊ ማንነት ፖለቲካዊ ስናደርግ ምን ችግር ይገጥመናል?

የሰው ልጅ የተደራራቢ ማንነቶች ውጤት ነው። ይህ ማንነቱ ግለሰቡን ከግለሰብ ማንነቱና ከቡድን ህይወቱ አንጻር ይገልጸዋል። በሃገር ጥላ ስር የሚሰፍሩ ዜጎች በጉልህ ከሚገልጿቸው የቡድን ማንነቶች መካከል ሃይማኖት፣ ብሄር፣ ጎሳ፣ መልክዓምድር የመሳሰሉት ይጠቀሳሉ። ታዲያ የሰው ልጅ ሃገራዊ ማህበር ሲመሰርት ይህንን ማንነቱን ሁሉ የፖለቲካ መደራጃ ቢያደርገው ምን ይሆናል? የሚለው ጥያቄ በጣም መሳጭ ነው። ዜጎችን ባህላቸውን፣ ቋንቋቸውን፣ የተወለዱበትን አካባቢ፣ እሴቶቻቸውን ሁሉ ፖለቲከኛ ብናደርግባቸው መጀመሪያ የምናጠፋው ይህንን ማንነታቸውን ራሱን ነው። ከዚያ ሲለጥቅ ደግሞ ወደ ጎን ከሌሎች ማንነቶች ጋር ግጭትን እንዲያመርቱ እናደርጋቸዋለን:: ከዚያ ሲለጥቅ ደግሞ ለዋናው ማህበራቸው የጋራ ማንነት እናሳጣለን:: ከዚያ ሲለጥቅ ደግሞ የዋናውን የህብረት ቤታቸውን ወይም የሃገራቸውን የፖለቲካ ጨዋታ ሴማ እናሳጣዋለን። አንድ ሃገር ስብስብ የተባለን ሁሉ ፖለቲከኛ ማድረግ ቢፈልግና ብሄርን፣ ሃይማኖትን፣ ብሄራዊ ማንነትን፣ ጂኦግራፊን፣ ነገድን ሁሉ ለፖለቲካ ቤት መስሪያነት ቢፈቅድ ያ ሃገር የሚፈጥረው የፖለቲካ መስመር ምርጫውን ያበላሻል። ሃገራችን ኢትዮጵያ ከሰውነቶቻችን መሃል ፖለቲከኛ እንዳይሆን የከለከለችው ሃይማኖታችንን ብቻ ነው። በሃይማኖት ላይ መደራጀትን በህገ መንግስት ከልክላለች። የኢትዮጵያ ህገ መንግስት ኣንቀጽ 11 ይህንን ይደነግጋል። ከዚህ ውጭ ግን ብሄርን፣ መልክዓምድርን፣ ብሄራዊ ማንነትን ወይም ኢትዮጵያዊነትን፣ ነገድን፣ ጥምረትን፣ ሃሳብን ሁሉ መሰረት ኣድርጎ ፖለቲካ መጫወት ይቻላል። ይህ ደግሞ እጅግ ብዙውን የሰውን ማንነት ፖለቲከኛ ከማድረጉም በላይ በዚህ ዓይነት ኣሰላለፍ ሃገራዊ ራእይ ማየትና ሃገራዊ ምርጫ ማሰብ ለጋራ ቤት ኣብሮ መስራት የማይታሰብ ነው። ሃገር የሚባለውን ትልቅ ማህበር ስንፈጥር ከሚኖሩት ስብስቦች መካከል ፖለቲከኛ የምናደርገውን መምረጥ ኣለብን። ዓለም ካሉት ስብስቦች መካከል ብሄራዊ ማንነትን ለፖለቲካ መደራጃነት ይፈቅድና ሌላውን ማለትም በብሄር መደራጀትን፣ በሃይማኖት መደራጀትን፣ በመልክዓምድር መደራጀትን ወዘተ ይከለክላል። ኢትዮጵያ ብዙውን ማንነታችንን ፖለቲሳይዝ ማድረጓ ያመጣብን ችግር ሃገራችን ወደ መድብለ ፓርቲ ስርዓት እንዳትሻገር ከማድረጉም በላይ ለምርጫ እንዳንመች ለቅንጅት እንዳንመች ኣድርጎናል። የሰውን ሁለንተና ፖለቲከኛ ካደረግንበት የምናጋጨው ነገር ብዙ ነው። ፖለቲካ በተፈጥሮው ግጭትን የያዘ ነው። በፖሊሲ መጋጨት፣ እኔ እበልጥ እኔ እበልጥ ማለት በፖለቲካ ውስጥ ጤነኛ ነገር ነው። አንዱ ፓርቲ ከሌላው የተሻለ ፖሊሲ እንዳለው እያሳየ ሌላውን እያኮሰሰ በማሳየት ነው ለምርጫ የሚሮጠው። በመድብለ ፓርቲ ስርዓት ውስጥ ይህ እኔ እበልጥ እኔ እበልጥ ጨዋታ መልካም ነገር ነው። የፖለቲካ ወጉም ይሄ ነው። ነገር ግን ይህ የመድብለ ፓርቲ የፖለቲካ ጨዋታ ወደ ብሄር ማንነት ሲሄድና ብሄርን ፖለቲከኛ ስናደርግ በቀጥታ ግጭቶችን ወደ ብሄር እናወርዳለን ማለት ነው። ብሄር ፖለቲከኛ ሲሆን በብሄሮች መካከል እኔ እበልጥ እኔ እበልጥ ግጭትን እናመጣለን ማለት ነው። ይህ ችግር በጣም ኣደገኛ የሆነ ችግር ስለሚያመጣ ማህበራችንን ይበጠብጣል። ስለዚህ ነው ማንነትን ፖለቲከኛ ስናደርግ የማህበራችንን መንጋ ይበትናል የሚያስብለን። ከማንነቶች መካከል ብሄራዊ ማንነትን ለፖለቲካ መደራጃነት መርጦ ሌሎቹን ማንነቶች በራሳችሁ ምህዋር ላይ ዙሩ ማለት ዴሞክራሲያዊና የመድብለ ፓርቲ ስርዓት መርህ ነው። እኛ በአንጻሩ ማንነትን ሁሉ ለፖለቲካ መደራጃነት ስንፈቅድ የወጣልን ዴሞክራቶች የሆንን መስሎን ከሆነ ተሳስተናል። ስለዚህ ማንነቶችን ሁሉ ፖለቲከኛ ከማድረግ መውጣት ያስፈልጋል።

ስር የሰደደው የዐቢይ የተቋም አተካከልና ክትትል ችግር (ገለታው ዘለቀ)

ከሁለት አመታት በፊት በሃገራችን የፖለቲካ ለውጥ የሸተተን መስሎን ስለ ሽግግር ብዙ አልን፤ እጅግ በጣም ጥቂት ሰዎች ለውጡ መጣሁ መጣሁ ሲል በፍጥነት የሽግግር መንግሥት ማቋቋም አለብን የሚል ድምጽ አሰሙ:: ይህ ድምጽ ግን በጣም የጥቂቶች ነበር:: አብላጫው ሰው ዶ/ር አብይ የሚመሩት መንግሥት የሽግግሩን ሥራ ይስራው የሚል ነበር:: ለለውጡ በጣም የሳሱ ኢትዮጵያውያን ምሁራን የዶ/ር አብይን መንግሥት በርታ፣ ጎበዝ፣ እሰየው—– ካልነው እየገፋ ይሄዳል የሚል ሳይንስ የጎደለው ዝንባሌ አሳይተዋል:: ያለ ሽግግር መንግሥት ኢትዮጵያ ወደ ተፈላጊ ለውጥ ልታልፍ አትችልም:: ስለዚህ በአስቸኳይ የሽግግር መንግሥት ይቋቋም የሚለው ቀጭን ድምጽ ከዚህም ከዚያም ዱላ በዛበት:: የሽግግር መንግሥት አያስፈልግም በዚህ የለውጥ ኃይል ላይ ሌሎች ለሽግግሩ የሚያግዙ ተቋማት ከተገነቡ እነዚህን ተቋማት ይዞና ክፍተቱን ሞልቶ የለውጡ ኃይል ራሱ ሽግግሩን ይመራዋል ተባለ:: ብዙ ሰው ለለውጥ ስለጓጓና የህወሃት ዘወር ማለት ስላስደሰተው ጠንከር ብሎ ሳይመራመርና ሳይጠይቅ ለዶ/ር አብይ ዲስኩሮች ጭብጨባውን አቀለጠው:: እኚህ ሰው ወደ ስልጣን ሲመጡ የለውጥ ኃይል በራሱ ሽግግር ለመምራት ምሉዕ የመሆን ተፈጥሮ ስለማይኖረው ለሽግግሩ አጋዥ የሆኑ ተቋማትን መፍጠሩ ነገር በጉጉት ተጠበቀ::

 ታዲያ ሲጠበቁ የቆዩት ጠቅላይ ሚ/ር ከሚጠበቁት ተቋማት መካከል የብሔራዊ እርቀ ሰላም ኮሚሽንና የማንነት፣ የአስተዳደርና ወሰን ጉዳይ ኮሚሽንን አቋቋሙ:: “ጠቅላይ ሚኒስትሩ” እነዚህን ተቋማት ሲተክሉ የነበሩትን ችግሮች በመዘርዘር የእኚህን ሰው የሲስተምና የተቋም አገነባብ ችግር እስቲ ዛሬ እንወያይበት፡

1.ሲስተምና ሚኒስትሪ የዶ/ር

አብይን የተቋም አተካከል መሠረታዊ ችግር ያየሁትና የፍልስፍና ችግሮቻቸውን የተማርኩት የሰላም ሚንስቴር የሚባል የሚንስቴር መስሪያ ቤት ሲመሰርቱ ነው:: ይህ ተቋም ሲመሰረት የመጀመሪያው ጉዳይ “ሰላም” የሚባለውን ጽንሰ ሃሳብ የተረዱበት መንገድ ነው የገረመኝ:: ሰላም እውነት ነው ለአንድ ማህበር / ሃገራዊ ሕብረት / እጅግ ወሳኝ የሆነ መተሳሰሪያ መርሆ ነው:: ሰላም ብቻ አይደለም ነገር ግን ፍቅር፣ በጎነት፣ መተሳሰብ፣ የመሳሰሉት ረቂቅ በጎ ነገሮች ሁሉ ለሕብረተሰባችን እጅግ አስፈላጊ መተሳሰሰሪያ መርሆዎች ናቸው:: ሀብታም ሆነን ነገር ግን ሰላም ባይኖረን ሃብታችን ምን ይፈይዳል? ምን ዋጋ አለው? ሁሉ ኖረን ፍቅር ግን ቢጎድለንና በብሔሮች መካከል ወይም በዜጎች መካከል መተማመን ቢጠፋ ፍቅራችን ቢተንብን ሃብታችን ከቶ ምን ይጠቅመናል? እውነት ነው ሰላም ፣ ፍቅር፣ በጎነት፣መተማመን፣መረዳዳት እና ሌሎች አስፈላጊ መርሆዎች ሁሉ የህብረታችን እጅግ አስፈላጊ የመተሳሰሪያ መርሆዎች ናቸው።

 ይሁን እንጂ እነዚህ መተሳሰሪያ መርሆዎች ሚኒስቴር መስሪያ ቤት የምናቋቁምላቸው አይደሉም። የፍቅር ሚንስቴር፣ የበጎነት ሚኒስቴር፣ የሰላም ሚንስቴር፣ ወዘተ እያልን መንግሥታዊ ተቋም አንመሰርትላቸውም። ለምን ቢባል እነዚህ ‹ኤለመንቶች› በተፈጥሮ አንድ ገዢ ፓርቲ የሚመራቸውና የአንድ አካል ውጤት አይደሉም። የብዙ ተቋማት፣ የሃይማኖትና የባህል ውጤቶች ናቸው እንጂ በተፈጥሯቸው የመንግሥት ተቋማት አይደሉም:: ነፃ ተቋማት ናቸው:: መንግሥት ሰላምን ፖለቲካዊ ሊያደርገው አይችልም:: ሰላም በተፈጥሮው ገለልተኛነትን፣ ነፃነትን ይጠይቃል:: መንግሥት ከአንድ ሃገራዊ ኃይል ጋር ቢጋጭ የሰላም ሚኒስቴር ጣልቃ ገብቶ የመካከለኛነት ሚና ሊጫወት አይችልም:: የዶ/ር አብይ ፍልስፍና ችግር ይህ ነው:: ሰላምን ፖለቲካዊ በማድረጋቸው ሠላምን ጎድተዋል፤ ተቋሙን ጎድተዋል:: በሀገራችን ሊመሠረቱ የሚችሉ የሰላም ገለልተኛ ተቋማት እንዳይፈጠሩ አሉታዊ ሚና ተጫውተዋል::

ሁለተኛው የዚህ የሰላም ሚኒስቴር ተቋም ችግር ይዘቱ ነው:: በሰላም ሚኒስቴር ስር ያሉት ተቋማት ከዚያም ከዚህም የተሰበሰቡ ተቋማት ናቸው:: እነዚህን ሁሉ በአንድ ቋት ውስጥ አስገብቶ የሰላም ሚኒስቴር ማለት እውቀት የጎደለው ብቻ ሳይሆን እርስ በርስ የሚጋጩ ሁኔታዋችን ያመጣል:: ስለ ሰላም ስናስብ ትምህርት፣ ፖሊስ፣ ወታደር ሁሉም በአንድም በሌላም መንገድ ለሰላም አስተዋጽኦ ያደርጋሉ ተብሎ ይታሰባል:: ነገር ግን እኚህ ሰው ከተቋማቱ የተወሰነውን መርጠው ለሰላም የቀረበ ሌላውን ራቅ ያለ አድርገው ማሰባቸው ሌላው የአምክኖት የተቋም አተካከል ችግራቸውን ያሳያል:: ሰላም በገለልተኛ ተቋማት፣ በሃይማኖት፣ በባህል፣ በትምህርት ተቋማት ቢያዝ ተፈላጊውን ውጤት ለማምጣት ሽምግልናን ለማምጣት ያስችላል። ለምሳሌ መንግሥት ከአንድ ኃይል ጋር ቢጣላ የሰላም ሚንስትር ወ/ሮ ሙፈርያት ሽማግሌ ሆነው መቅረብ አይችሉም፤ ለሰላም መካከለኛ ስር የሰደደው የዐቢይ የተቋም አተካከልና ክትትል ችግር ገለታው ዘለቀ (የባልደራስ ፅህፈት ቤትና ሕዝብ ግንኙነት ሓላፊ) ፖሊሲ 10 አይሆኑም። ዶክተር አብይ ሰላምን የተረዱበት መንገድ ስህተት ነው።

ለሰላም ሚንስቴር ተጠሪ ከሆኑት ተቋማት አንዳንዶቹ ከዚህ በፊት ለደህንነት መስሪያ ቤቱ ተጠሪ የነበሩ መሆናችው ይታወቃል:: ለአብነትም ፌዴራል ፖሊስ፣ ይጠቀሳል::

 የሰላም ሚንስቴር ወደ ‹ክልሎች› እና ከተማ አስተዳደሮች በሚወርድበት ጊዜም በቀጥታ ከደህንነት መስሪያ ቤቱ ጋር የተዳበለ ነው:: በ‹ክልል›ና ከተማ አስተዳደር ደረጃ ‹የሰላምና ደህንነት ግንባታ ቢሮ›፣ በዞን/ክፍለ ከተማና ወረዳ አደረጃጀት ደግሞ በዚሁ ስያሜ መምሪያና ፅህፈት ቤት ተብሎ በቅደም ተከተል ይወርዳል:: ዛሬ አዲስ አበባ ላይ የፖለቲካ ፓርቲዎችና አቻ ተቋማት የሚሰጧቸውን ጋዜጣዊ መግለጫዎች የሚፈቅደውና የሚከለክለው የሰላም ሚንስቴር ሆኗል:: ነገሮች ለመንግሥት ሥልጣን አስጊ መሆን አለመሆናቸውን የሚሰልለው ሀይል በዚሁ በሰላም ሚኒስቴር በኩል ነው:: በመሆኑም ሰላም ሚንስቴር ከላይ ሲታይ የአሸማጋይነት ሚና ያለው የሚመስል ስም ተሸክሞ ውስጡ ግን የስለላ ድርጅት ነው ማለት ይቻላል::

2.የአዲስ አበባ የሰላም ም/ቤት

ይህ ተቋም ወይዘሮ አዳነች አቤቤ የጠቅላይ ሚንስትሩን ፈለግ ተከትለው ከታከለ ኡማ የምክትል ከንቲባነት ሥልጣኑን እንደተቀበሉ ያቋቋሙት ነው:: ሥራው በቀጥታ ፀጥታን ከማስከበር ጋር የተያያዘ ሊሆን እንደሚችልም ገልፀዋል:: አዲስ አበባ የራሷ መደበኛ ፖሊስ አላት፣ ‹ተወርዋሪ ኃይል› የሚባል ልዩ የፖሊስ ሰራዊት እንዲሁም ከላይ በተጠቀሰው ተዋረድ መሠረት የሰላምና ደህንነት ግንባታ ቢሮ አላት:: አዲሷ ከንቲባ የፈጠሩት ተቋም ተመሳሳይ ሥራ የሚሠራ ሌላ ተቋም ነው:: ሰላምን ፖለቲካ የማድረጉን ሥራ በቀጥታ የወሰዱት ከጠቅላይ ሚንስትሩ ነው::

  1. የማንነትና አስተዳደር ወሰን ኮሚሽን

 ሁለተኛው የዶ/ር አብይ የተቋም አተካከል ችግር የሚታየው ደግሞ በማንነት አስተዳደርና ወሰን ኮሚሽን ላይ ነው:: ይህ ተቋም ሲተከል ወደ ግማሸ መቶ ሰዎችን የያዘ ሲሆን የተለያዩ የፖለቲካ መሪዎችን ከዚያም ከዚህም አጠራቅመው የተከሉት ተቋም ነው:: ከማንነት ጋር፣ ከአስተዳደር ወሰን ጋር የተያያዙ ችግሮችን ለመፍታት ገለልተኛ ሆኖ የመፍትሄ ሃሳብ የሚያቀርብ ነው ተብሎ ነበር የታሰበው:: ይህ ኮሚሽን ሲቋቋም እኔ እራሴ ደስ ብሎኝ ነበር:: ይሁን እንጂ በጽሞና ሳየው ይህንን ኮሚሽን ያቋቋሙት ከፖለቲካ ፓርቲዎች ከዚያም ከዚህም ተሰባስበው በመሆኑ የውቅር ችግር እንዳለው ያሳያል።

ይህ ኮሚሽን ከአተካከሉ ችግር እንዳለበት ማሳያ ከሆኑት ምክንያቶች መካከል በኮሚሽኑ ውስጥ ኢትዮጵያዊ ዜግነት የሌላቸውን ሁሉ ማካተቱ ነው:: ይህ ምን ማለት እንደሆነ አይገባኝም:: በአጠቃላይ የማንነት፣ አስተዳደርና ወሰን ኮሚሽን ለኢትዮጵያ እጅግ አስፈላጊ ሆኖ፣ ሽግግሩን መስመር ለማስያዝ አጋዥ ኮሚሽን ሆኖ ሳለ፣ ነገር ግን የጠ/ሚኒስትሩ ተቋም አመሠራረት ችግር ይሄውና ይህንን ኮሚሽን አንካሳ አድርጎታል:: ለሽግግሩ ደራሽ አልሆነም:: ባለበት ሳይንቀሳቀስ የሥራ ዘመኑም ሊጠቃለል ነው:: በአሁኑ ሰዓት እኚህ ሰው ከዚያም ከዚህም የማይግባቡ ፖለቲከኞችን ሰብስበው አጠራቅመው የመሰረቱት ኮሚሽን በአሁኑ ሰዓት ብዙዎቹ ከኮሚሽኑ ጋር ግንኙነትም የላቸውም:: ይህንን አስፈላጊ ኮሚሽን ዶ/ር አብይ ሲተክሉ ስላበላሹት ለሽግግሩ ደራሽ አልሆነም:: እኚህ ሰው በአንድ በኩል ይህንን ኮሚሽን አቋቋሙና ደቡብ የማንነት ጥያቄ ተነሳ ሲባል በአባ ዱላ የሚመሩት የማንነት ኮሚቴ መሠረቱ እየተባለ ሲወራ ነበር:: እውነት ሆነ ውሸት ሰውየው ግን የተቋም አተካከልና ክትትል መሠረታዊ ችግር እንዳለባቸው በጣም ተምረናል:: ይህ ኮሚሽን ነጻ ሆኖ መፈጠር ነበረበት።

  1. የብሔራዊ እርቅ ኮሚሽን

ኢትዮጵያ ወደ ለውጥ ስትገባ ሽግግሩ የተሻለ እንዲሆን ከሚያስፈልጉት ወሳኝ ተቋማት መካከል የብሔራዊ እርቅ ኮሚሽን ነበር:: ይህ ኮሚሽን እንዲቋቋም ብዙ ግፊት ነበር:: ዶ/ር አብይ ይህንን ኮሚሽን በፍጥነት አቋቁመው ሽግግሩን እንዲያሳልጡ ሲመከሩ ቆይተዋል:: የኮሚሽኑ አስፈላጊነት በኢትዮጵያ ውስጥ ያለፉ ክፉ ትውስታዎችን ለማጽዳት፣ በካሳ ላይ ያተኮረ ፍትህ በማምጣት ብሔራዊ ፈውስ ማውረድ፣ በመካከለኛነት አገልግሎት ለጠፉ ጥፋቶች ፍትህን ማውረድ፣ የተጣላን ማስታረቅ ነበር:: ይሁን እንጂ እኚህ ሰው ይህንን ኮሚሽን ሲያቋቋሙ ወዳጃቸውን የኢዜማ መሪ ዶ/ር ብርሃኑን ጨምረው ሌሎች የፖለቲካ መሪዎችን ሳይቀር ከሃይማኖት መሪዎቹ ጋር አቀላቅለው ፈጥረውታል:: ብሔራዊ እርቅ ኮሚሽን በገለልተኛነት የሚመራ ተቋም ነው:: የሽምግልና ቁጥር አንድ መርህ ገለልተኛነት ነው ይባላል:: እኚህ ሰው አወላክፈው የፈጠሩት ብሔራዊ እርቅ ኮሚሽን ሽግግሩን እያገዘ አይደለም:: አልፎ አልፎ የተወሰኑ ሰዎች በቴሌቭዥን ብቅ እያሉ አለን ቢሉም ኮሚሽኑ የለም:: የማንነት አስተዳደርና ወሰን ኮሚሽንም ሆነ የብሔራዊ እርቅ ኮሚሽን ሽግግሩን ለማገዝ ከፍተኛ አስተዋጽኦ ሊያደርጉ ይችላሉ ተብሎ ይጠበቅ ነበር:: ይሁን እንጂ ዶ/ር አብይ አወላክፈው ስላቋቋሙት እነሆ ቢሮው ክፍቱን እንዲሁ ይውላል::

  1. የኢትዮጵያ ዲያስፖራ ትረስት ፈንድ

ዶክተር አብይ ወደ ስልጣን ሲመጡ በመጀመሪያዎቹ ቀናት ብዙ ሰው ደግፎ ነበር። አብዛኛው ድጋፍ በህወሃት ጥላቻ ላይ የተመሠረተ መሆኑ ግን ትክክል አልነበረም። የትግላችን ግብ ህወሃትን ገለል ማድረግ ብቻ ሳይሆን መዋቅራዊ ለውጥ ማምጣት ነበር። የሆነ ሆኖ ዶክተር አብይ ከሃገር ውጭ ያሉ ኢትዮጵያውያንን ድጋፍ ለመሰብሰብ ሞክረው ነበር። ያቺን ጊዚያዊ ተቀባይነት አይተው ይሆናል ውጭ ያሉ ኢትዮጵያውያን ለሃገራቸው ገንዘብ እንዲያዋጡ አንድ ሃሳብ አመጡ። ይህ ሃሳብ በራሱ መልካም ነበርና ሁላችንም ደግፈናል። ውጭ ሃገር ያሉ ኢትዮጵያውያን ሃገራቸውን ተደራጅተው ቢረዱ በጣም ተገቢ ነው። እንዴውም እስካሁን ብዙ በዚህ ጉዳይ ላይ አልሠራንምና ብዙ ልንሠራ ይገባል። የዶክተር አብይ ችግር ይህንን ሃሳብ ወደ ተቋም ሲቀይሩ ነው። እንደ ጠቅላይ ሚንስትር ኢትዮጵያውያን ሃገራችሁን ደግፉ የሚል ምክርና ድጋፍ ማድረግ ተገቢ ነው። ነገር ግን ራሳቸው ቦርድ ሾመው አደራጅ መሆናቸው ግን ከባድ ስህተት ነበር። ይህ ተቋም በተፈጥሮው ነጻ ነው መሆን የነበረበት። ይህ ተቋም በዶክተር አብይ ሹመት የሚመራ ከሆነና ፖለቲካዊ ከሆነ የህዝቡ ድጋፍ ከፖለቲካው ሙቀት ጋር ይዋዥቃል። ለዚህም ነው የዶክተር አብይ ቅቡልነት መውረድ ሲጀምር አንዳንዶች ያዋጡትን ገንዘብ መልሱልኝ እስከማለት የደረሱት። ይህ ተቋም ከፖለቲካ ሹመት ጋር ባይገናኝ ኖሮና ነጻ ቢሆን ሁሉን አቃፊ ስለሚሆን ተቋሙ ያድግ ነበር። የዶክተር አብይ የተቋም አመሠራረት ችግር አንዱ ማሳያ ይህ ነው። ዛሬ ይህ ተቋም ከፍተኛ የቅቡልነትና የማንነት ኪሳራ ውስጥ ገብቷል። ትረስት ፈንድ በአንድ በኩል አሜሪካ ውስጥ መንግሥታዊ ያልሆነ ድርጅት ሆኖ የተመዘገበ ቢሆንም ነገር ግን የዶክተር አብይ ተቋም ሆኖ ያገለግላል። ሲቪክ ድርጅቶች ነጻ መሆን አለባቸው።

  1. የዶክተር አብይ ርዕይ

 ስለተቋም ስናነሳ ተቋም የርዕይ ማስፈጸሚያ አንድ ብርቱ መሳሪያ ነው። የዶክተር አብይ ርዕይ አረንጓዴ አሻራ ነው ይላሉ። መቼስ ልዩ ልዩ ተክሎችን መትከል መናፈሻ መሥራት አስፈላጊ ነገር ነው። ይሁን እንጂ ለዚህ ጠቅላይ ሚንስትር መሆን አያስፈልግም። ከከንቲባዎች በታች ባለሙያዎች ይህንን ይሠሩታል ያስተባብራሉ። አሁን ኢትዮጵያ የምትሻው ጠቅላይ ሚንስትር ከፍተኛ የሆኑ መዋቅራዊ ለውጦችን ማምጣት፣ ብሄራዊ መግባባትን ማምጣት፣ ሃገሪቱን ለምርጫ ማዘጋጀት፣ መተሳሰሪያ መርሆዎቻችን እንዲሻሻሉ መሥራት፣ የመንግሥት ቅርጻችንን ለማሻሻል መሥራት የመሳሰሉትን ጉዳዮች ለመሥራት ነው። ዶክተር አብይ ይህንን ነበር ማለም የነበረባቸው። ነገር ግን የሳቸው ህልም የተለያዩ መናፈሻዎች ሆነው ቀርተዋል። ለውጥ ያስፈልገናል።

አስቸኳይ መልዕክት!ለጋዜጠኞች !

ባልደራስ ለእውነተኛ ዴሞክራሲ ፓርቲ በነገው ዕለት የካቲት 18 ቀን 2013 ዓ.ም ከጠዋት 3 ሰዓት ጀምሮ በሀርመኒ ሆቴል ” የአዲስ አበባ የራስ ገዝ ጥያቄ ” አስመልክቶ ፕሮግራም አዘጋጅቶ ለብዙሃን መገናኛ ጥሪ ማስተላለፍ የሚታወቅ ነው።

ሆኖም ግን በሀርመኒ ሆቴል ምክንያት ማምሻውን በደረሰን መረጃ መሠረት፤ የነገውን ዝግጅት ማካሄድ እንደማይችል ተገልጿል ።

ይህም በመሆኑ ባልደራስ ጉዳዩን አጣርቶ የደረሰበትን ነገር የሚገልጽ መሆኑን እየገለጽን ፤ ጥሪ ያስተላለፍንላችሁ የብዙሃን መገናኛ በሙሉ ፤ የነገው ጥሪ ለሌላ ቀን መተላለፉን እንድታውቁ በአክብሮት እንጠይቃለን።

#ማስታወሻ ፦ ባልደራስ የነገውን ዝግጅት አስመልክቶ ለሚመለከተው የመንግስት አካል ከታች በተገለጸው መልኩ አስፈላጊውን ሁሉ አድርጓል ።

ለሚዲያ አካላት የቀረበ ጥሪ !

ለሚዲያ አካላት የቀረበ ጥሪ !

በባልደራስ ለእውነተኛ ዴሞክራሲ ፓርቲ በነገው ዕለት የካቲት 18 ቀን 2013 ዓ.ም ከጠዋት 3 ሰዓት ጀምሮ በሀርመኒ ሆቴል ” የአዲስ አበባ የራስ ገዝ ጥያቄ ” አስመልክቶ በተጋባዥ እንግዶች ጥናታዊ ጽሑፍ የሚቀርብ ሲሆን ፤ በእለቱ ጥሪ ከተደረገላቸው እንግዶች እና አባላት ጋር ውይይት ይካሄዳል ።

ዝግጅቱ ለሁሉም የብዙሃን መገናኛ ክፍት በመሆኑ ባልደራስ ጥሪውን ያቀ

Load More