አለሙ ጌታቸው

#በልደታ ክ/ከተማ የምርጫ ክልል 4

ሀሎ አዲስ አበባ ! ልጆችህን በመምረጥ ራስህን ማስተዳደር የምትጀምርበት ጊዜው አሁን ነው!

አለሙ ጌታቸው እባላለሁ። ገላን ፣አቃቂ ጨርቃጨርቅና አቃቂ አድቬንቲስት ሚሽን ት/ቤቶች የመጀመሪያና ሁለተኛ ደረጃ ትምህርቴን ተከታትያለሁ። ከአዲስ አበባ ዩኒቨርሲቲ በአርኪቴክቸርና ከተማ ፕላን (ልደታ ከሚገኘው ህንፃ ኮሌጅ) በ1989 ዓ.ም. በዲግሪ ተመርቄ በአዲስአበባ፣በተለያዩ የኢትዮጵያ ክፍሎችና በምስራቅ አፍሪካ ሀገራት በሰለጠንኩበት ሙያ አገልግያለሁ።

በ6ኛው ሀገራዊ ምርጫ የባልደራስ ለእውነተኛ ዴሞክራሲ ፓርቲ እጩ ሆኜ በልደታ ክ/ከተማ የምርጫ ክልል 4 ለተወካዮች ም/ቤት እወዳደራለሁ።

አዲስ አበባ የሀገራችን ኢትዮጵያ፣የአፍሪካና አለም አቀፋዊ ማዕከል ብትሆንም ከተማችንና እኛ ነዋሪዎቿ በስሟ ብቻ ከመጠራት ባለፈ እንደግለሰብ ለመኖር የሚያስችሉን የሥራ እድልና መኖሪያ ቤት የመሳሰሉ መሠረታዊ ፍላጎቶች እንደ ሰማይ የራቁን ሲሆን፡ እንደ ማኅበረሰብ የሚያስፈልጉን ደረጃቸውን የጠበቁ የጤና፣የትምህርት፣የትራንስፖርት የመሳሰሉት አገልግሎቶች የሉንም። ይባስ ብሎ በከተማችን ዙሪያ ካለው ማህበረሰብ ጋር የጎሪጥ እንድንተያይና ግጭቶች ውስጥ እንድንገባ ተደርገናል።

ለዚህ ሁሉ ችግር ዋናው ምክንያት በማያውቁን ፖለቲከኛ ሞግዚቶች እንድንተዳደር መደረጉ ሲሆን መፍትሄው በሀገራችን በኢትዮጵያና በከተማችን አዲስ አበባ በማንደራደር የአዲስ አበባ ልጆች እጅ መሆኑን አምናለሁ።

የልደታ ህዝብ እኔን ልጅህን ብትመርጠኝ የቆየ ችግራችንን በራሳችን እንፈታዋለን ለምንወዳት ሀገራችንም ምሳሌ እንሆንላታለን።

የምርጫ ካርድ መሳሪያህ ነው! አሁኑኑ እንድትመዘገብና ካርድህን በእጅህ እንድታስገባ ወንድማዊ ጥሪዬን አስተላልፋለሁ።

ፍትህ ለአዲስ አበባ! ፍትህ ለኢትዮጵያ!