በግፍ እስር ላይ የሚገኙት አቶ ናትናኤል ያለምዘውድ እና አቶ ካሳሁን ደስታ እስር ህገ ወጥ በመሆኑ የገዥው ፓርቲ እንዲፈታቸው ባልደራስ አበክሮ ያሳስባል

የባልደራስ ለእውነተኛ ዴሞክራሲ ፓርቲ የብሔራዊ ምክር ቤት አባል አቶ ናትናኤል ያለምዘውድ እና የፓርቲው ንቁ አባልና ጉዳይ አስፈፃሚ አዲስ አበባ ውስጥ ትላንት ህዳር 03/2015 ዓ.ም. በፖሊስ በቁጥጥር ሥር መዋላቸው ታውቋል፡፡ በቅድሚያ የታሠሩት አቶ ናትናኤል ያለምዘውድ ሲሆኑ ለእሳቸው ስንቅ ለማቀበል አቶ ካሳሁን ደስታ በሄዱበት ወቅት እሳቸውንም ፖሊስ አስሮ አስቀርቷቸዋል።

 

የአዲስ አበባ መሥተዳድር እና የኦህዴድ/ብልጽግና መር መንግሥት ቆሜለታለሁ ከሚለው ህገ መንግሥቱ ከሚደነግገው ውጭ የአዲስ አበባ ትምህርት ቤት ተማሪዎች የኦሮሚያ ክልል ባንዲራ እንዲሰቅሉና የኦሮሚያ ክልል መዝሙርን እንዲዘመሩ ሲያስገድዱ ተማሪዎች፣ መምህራንና ወላጆች ተገቢ አለመሆኑን በመግለጽ ተቃውሟቸውን እየገለጹ መሆናቸው ይታወቃል፡፡ ይህ ሰላማዊ ተቃውሞ እየተደረገ ያለው ደግሞ በማንም ፓርቲ ቀስቃሽነት ሳይሆን፣ የአዲስ አበባ ከተማ ህዝብ በገዥው ፓርቲ እየደረሰበት ባለው አስከፊ ጭቆናና በደል ምክንያት ብሶትና ምሬት ተሰምቶት በራሱ አነሳሽነት የሚያካሂደው መሆኑ የሚያጠያይቅ አይደለም፡፡

 

የኦህዴድ/ብልጽግና መንግሥት ከዚህም በፊት ሲያደርገው እንደቆየ ሁሉ አሁንም የባልደራስ ፓርቲን የጦስ ዶሮ በማድረግ አባላቱን ማሰርና ህጋዊ የፓርቲ እንቅስቃሴውን ማወክ ቋሚ ተግባር አድርጎ ይዞታል፡፡ በአሁኑ ጊዜ የባልደራስ ፓርቲ ሁለተኛ ጉባኤውን ለማካሄድ አስፈላጊውን ዝግጅት በሚያከናውንበት ወቅት ያለምንም በቂ ምክንያትና መረጃ አባሎቻችንን በህገወጥ መንገድ በፖሊስ ጣቢያ ማሰርና ማሰቃየት ጉባኤውን እንዳያደርግ እንቅፋት ለመፍጠር እየተደረገ ያለ ሸፍጥ መሆኑ መገንዘብ አስቸጋሪ አይሆንም፡፡ ስለዚህም የኦህዴድ-ብልፅግና መራሹ መንግሥት ይሄን ቆሜለታለሁ ከሚለው ህገ መንግስት ከሚደነግገውና ከአዲስ አበባ ከተማ ነዋሪ ፍላጎት ውጭ በኃይል እየተገበረ ያለውን ድርጊት እንዲያቆም ባልደራስ ያሳስባል፡፡ ከዚህም በተጨማሪ በሦስተኛ ፖሊስ ጣቢያ በግፍ እስር ላይ የሚገኙት አቶ ናትናኤል ያለምዘውድ እና ላዛሪስት ሚሲዮን ት/ቤት አካባቢ በሚገኘው ጉሌሌ ፖሊስ መምሪያ ታስረው የሚገኙት አቶ ካሳሁን ደስታ እስር ህገ ወጥ በመሆኑ የገዥው ፓርቲ እንዲፈታቸው ባልደራስ አበክሮ ያሳስባል፡፡

 

የባልደራስ ለእውነተኛ ዲሞክራሲ ፓርቲ የብሔራዊ ሥራ አስፈጻሚ ኮሚቴ

አዲስ አበባ

ታህሳስ 05/2015