እስክንድር ነጋና ስብሀት ነጋን በአንድ ክፍል ውስጥ ለምን?

በግፍ የታሰሩት የባልደራስ ለእውነተኛ ዴሞክራሲ ፓርቲ (ባልደራስ) ከፍተኛ አመራሮች አቶ እስክንድር ነጋ እና አቶ ስንታየሁ ቸኮል በሚኖሩበት ጠባብ የእስር ቤት ክፍል ውስጥ የት.ሕ.ነ.ግ. አማፂያን ቡድን መሪዎች አቶ ስብሃት ነጋ እና ዶ/ር አብርሀም ተከስተ ተጨምረዋል። የአማፂው መሪዎች በቁጥጥር ስር ከዋሉ ጀምሮ በፌዴራል ፖሊስ ወንጀል ምርመራ ክፍል ውስጥ የቆዩ ሲሆን ዛሬ ወደ ቃሊቲ ወህኒ ቤት ተወስደዋል። ከሌሎች ክፍሎች ተመርጦ እነ እስክንድር ያሉበት ጠባብ ክፍል ውስጥ እንዲያርፉም ተደርጓል።

ይህም የተደረገው በመካከላቸው ያለውን የአመለካከት ልዩነት ተጠቅመው እርስ በእርስ ለትንኮሳ እንዲገባበዙ ታቅዶ እነደሆነ እነ እስክንድር ገልፀዋል። “ሌሎች ክፍሎች አሉ። እኛን ወደዚያ ቀይሩን፤ ይህ ካልሆነም እነርሱን ወደ ሌላ ክፍል ውሰዱልን” የሚል ጥያቄ ለወህኒ ቤቱ አገዛዝ እንዳቀረቡ የገለፁት የህሊና እስረኞች ‘ከበላይ አካል ታዝዘናል’ በሚል ጥያቄያቸው ተቀባይነት አለማግኘቱን ገልፀዋል።

ኦሕዴድ/ብልፅግና እንደሚፈልገው ፈፅሞ ለትንኮሳ እና ለብሽሽቅ እንደማይጋበዙም ጠቁመዋል። ይህንን ለእስር ቤቱ አገዛዝ ጨምረው አስረድተዋል።

መንግሥት ሓላፊነት ተሰምቶት እስረኞች አዕምሯቸው ሳይረበሽ እንዲኖሩ ያደርግ ዘንድ ባልደራስ ያሳስባል። ይህንን ሳያደሮግ ቢቀር ግን በእስረኞች ላይ ለሚደርስ ማንኛውም አይነት ችግር በሕዝብ፣ በታሪክና በሕግ ፊት ተጠያቂ መሆኑን በድጋሜ ሊያጤነው ይገባል።

ዛሬም ድል ለዴሞክራሲ!