ኢትዮጵያን እና ኢትዮጵያዊነትን የማፍረስ ዘመቻ ይቁም!

ባልደራስ ለእውነተኛ ዴሞክራሲ ፓርቲ (ባልደራስ) በአፋር አርብቶ አደር ወገኖቻችን ላይ በተፈፀመው ግድያ የተሰማውን ጥልቅ ሀዘን ይገልፃል። ለሟች ቤተሰቦችና ለመላው የአፋር ብሎም የኢትዮጵያ ሕዝብ መፅናናትን ይመኛል። ኦሕዴድ/ብልፅግና ኢትዮጵያን ከቻለ አፍርሶ በራሱ ቀለም እንደገና ለመሥራት ይህ ካዳገተውም እንደ ሐረሩ የራስ መኮንን ሀውልት አፈራርሶ ለመተው እየተንቀሳቀሰ እንደሆነ እናምናለን። ቅርሶችን ጨምሮ ነባር የኢትዮጵያ መገለጫዎችን የማፍረስ እና አንዳዶችን በአዲስ የመተካት እንቅስቃሴው መዳረሻም ይህ ነው። በሀገሪቱ የእርስ በእርስ ግጭቶችን በመቆስቆስ ማሕበራዊ ረፍት የመንሳት እንቅስቃሴው ቀጥሏል።

በአፋርና በሶማሌ ጎሳዎች መካካል የተፈጠረው መንግሥት ሰራሽ ግጭት አላማው ኢትዮጵያን እና ኢትዮጵያዊነትን ማጥፋት ነው። መንግሥታዊ ጥቃቶች፣ ትንኮሳዎችና ለወራሪ አሳልፎ የመስጠት ተግባራት እርስ በእርሳቸው ለማጠፋፋት መሆኑን ተረድተው የሶማሌ እና የአፋር ወንድማማች ጎሳዎች አንድነታቸውን እንዲያጠናክሩ ባልደራስ ጥሪውን ያቀርባል።